აფბა: სტუდენტთა დიდ ნაწილს სტატუსი ფინანსური დავალიანების და ორსულობის გამო უჩერდება

არასამთავრობო ორგანიზაცია „ახალგაზრდა ფინანსისტთა და ბიზნესმენთა ასოციაცია“ (აფბა) ჩატარებული მონიტორინგის შედეგებს აქვეყნებს, რომელიც სტატუსშეჩერებულ სტუდენტებს ეხება.

„განათლების ხარისხის განვითარების ეროვნული ცენტრის“ მონაცემებით, 2018 წელს საქართველოში სტატუსი 53 932 სტუდენტს შეუჩერდა.

მონიტორინგის ფარგლებში, რომელიც ბოლო 6 წელს შეეხებოდა (2013 წლიდან 2018 წლის ჩათვლით), დადგინდა, რომ სტატუსშეჩერებული სტუდენტების რაოდენობა მზარდია. 

2013 წელს სტატუსი 21 704 სტუდენტს შეუჩერდა. 2018 წელს ეს მაჩვენებელი ორჯერ არის გაზრდილი. ორგანიზაციის ინფორმაციით, 2018 წელს 2017-თან შედარებით, სტატუსი 8751 სტუდენტით მეტს შეუჩერდა.

2013 წლს სტატუსი შეუჩერდა 21 704 სტუდენტს, 2014 წელს - 28 941 სტუდენტს, 2015 წელს - 34 716 სტუდენტს, 2016 წელს 37 021 სტუდენტს, ხოლო 2017 წელს - 45 181 სტუდენტს. 

მონიტორინგის შედეგად დადგინდა ის ძირითადი მიზეზები, რის გამოც სტუდენტებს სტატუსი უჩერდებათ. აღნიშნული გარემოებებია: ფინანსური დავალიანება; საზღვარგარეთ სასწავლებლად წასვლა; ორსულობა; მშობიარობა და ბავშვის მოვლა; ავადმყოფობა და სხვა მიზეზები.

ორგანიზაცია აღნიშნავს, რომ 2018 წელს 53 932 სტატუსშეჩერებული სტუდენტიდან ფინანსური დავალიანების გამო 20 935 სტუდენტს აქვს შეჩერებული სტატუსი; საზღვარგარეთ სასწავლებლად წასვლის გამო 183 სტუდენტს; ორსულობის, მშობიარობისა და ბავშვის მოვლის გამო 240 სტუდენტს; ავადმყოფობის გამო 155 სტუდენტს, ხოლო 32419 სტუდენტს სტატუსი სხვა მიზეზების გამო აქვს შეჩერებული.