პრემიერი: ნატო-საქართველოს თანამშრომლობა რეგიონში მშვიდობის უზრუნველყოფისკენაა მიმართული

ნატო-საქართველოს ერთობლივი სწავლება 2019-ის ფარგლებში დღეს კრწანისში საშტაბო სწავლების გასაცნობად წვრთნისა და შეფასების ერთობლივ ცენტრს პრეზიდენტი, პრემიერმინისტრი, თავდაცვის მინისტრი და ნატოს მაღალი თანამდებობის სამხედრო პირები ეწვივნენ.

აღმასრულებელი ხელისუფლების წარმომადგენლებმა სწავლების მონაწილეებს სიტყვით მიმართეს. 

საქართველოს პრეზიდენტის განცხადებით, „ნატო-საქართველოს სწავლება - 2019“-ის წარმატებით დასრულება კიდევ ერთხელ გამოხატავს თავის ძლიერ მისწრაფებას ჩრდილოატლანტიკური ალიანსისკენ. პრეზიდენტის თქმით, ნატო-საქართველოს წლევანდელ სწავლებაში საქართველო უკვე ხელმძღვანელი ქვეყანაა და ეს ძალიან ნიშანდობლივია.

"ეს სტატუსი მეტყველებს იმაზე, თუ რამდენად განვავითარეთ ჩვენი შესაძლებლობები ამ რიგით მეორე სწავლებისთვის და რამდენად გაიზარდა სტრატეგიული პარტნიორების ნდობა და მხარდაჭერა საქართველოს მიმართ. სწორედ ჩვენს თავდაუზოგავ მონდომებაზე პასუხია ასეთი აღიარება. მინდა ამისათვის განსაკუთრებული მადლობა გადავუხადო ჩვენს პარტნიორებს.

აღსანიშნავია, რომ ნატო-საქართველოს არსებითი პაკეტის ფარგლებში ჩატარებული წინა სწავლებისგან განსხვავებით, წელს მონაწილე სახელმწიფოების რიცხვი 10-ით გაიზარდა და უკვე ნატოს წევრი და პარტნიორი 24 ქვეყანაა ჩართული ამ მნიშვნელოვან ფორმატში. სწორედ ასეთი ნაბიჯებით მიიღწევა ჩვენი საერთო მიზანი - მეტი ნატო საქართველოში და მეტი საქართველო - ნატოში", - განაცხადა საქართველოს პრეზიდენტმა. 

მისივე თქმით, საქართველო თავისუფალი, სუვერენული ქვეყანაა და ის თავისუფლად აკეთებს არჩევანს და ირჩევს მოკავშირეებს.

საქართველოს პრემიერმინისტრის მამუკა ბახტაძის განცხადებით კი, ნატო-საქართველოს თანამშრომლობა მიმართულია რეგიონში მშვიდობის, სტაბილურობისა და განვითარების უზრუნველსაყოფად.

მისი თქმით, სწავლების საქართველოში ჩატარება არის ჩვენი ქვეყნის ევროატლანტიკური ინტეგრაციის ურყევი კურსისა და ნატოსთან მჭიდრო თანამშრომლობის კიდევ ერთი მკაფიო დასტური.

„ჩვენთვის ძალიან მნიშვნელოვანია, რომ ნატოს პარტნიორი არაწევრი  ქვეყანა - საქართველო ატარებს სწორედ ამ სწავლებას. საქართველოში მრავალეროვანი სწავლების ჩატარება, რომელშიც 24 მოკავშირე და პარტნიორი ქვეყანაა ჩართული, კიდევ ერთი დასტურია იმისა, რომ ალიანსი მტკიცე მხარდაჭერას უცხადებს ჩვენს ქვეყანას ნატო-საქართველოს არსებითი პაკეტის ეფექტიანი განხორციელებისა და საქართველოს ევროატლანტიკური მისწრაფებების რეალიზაციის პროცესში. ეს არის ნატოს პირველი მრავალეროვანი  სწავლება, რომელსაც თავიდან ბოლომდე ხელმძღვანელობს საქართველო. მე მსურს განსაკუთრებული მადლობა გადავუხადო ჩვენს სტრატეგიულ პარტნიორებს ასეთი ნდობისთვის“, - განაცხადა მამუკა ბახტაძემ.

სამეთაურო-საშტაბო სწავლებაში, რომელსაც JTEC-ი 18-29 მარტს მასპინძლობს, 350-მდე სამხედრო და სამოქალაქო პირი მონაწილეობს. „ნატო-საქართველოს სწავლება 2019" პირველი ერთობლივი მრავალეროვნული ბრიგადის დონის სამეთაურო-საშტაბო სწავლებაა საქართველოს თავდაცვის ძალების ხელმძღვანელობით, რომელიც საქართველოს, ალიანსის და პარტნიორი ქვეყნების შეიარაღებული ძალების ურთიერთთავსებადობის ამაღლებასა და საქართველოს თავდაცვის ძალების მართვისა და კონტროლის შესაძლებლობების გაძლიერებას ისახავს მიზნად.