„დედამიწის საათი“ საქართველოშიც აღინიშნა

„დედამიწის საათის“ მეთერთმეტე რაუნდი საქართველოში აღინიშნა. 30 მარტს ადგილობრივი დროით საღამოს 20:30 საათიდან კამპანიამ მთელი დედამიწა მოიცვა. 

რიყის პარკში ღონისძიების მონაწილეებმა ანთებული სანთლებისგან შექმნეს დედამიწის საათის სიმბოლო 60+, რომელიც გვაფრთხილებს, რომ პლანეტაზე ზრუნვა მხოლოდ ერთი საათით არ უნდა შემოიფარგლებოდეს. საღამო მუსიკალურად მომღერალმა ოთო ნემსაძემ და  ჯგუფებმა MokuMoku და Killages გააფორმა. ასევე, გაიმართა დრამერების შოუ.

ამ დღეს მილიონობით ადამიანი უარს აცხადებს ერთი საათით ელექტროენერგიის გამოყენებაზე. ღონისძიების მთავარი მიზანია კლიმატის ცვლილების შესახებ ინფორმაციის მიწოდება, საზოგადოების გარემოსდაცვითი ცნობიერების ამაღლება, პასუხისმგებლობის გაზრდა, საკუთარი ქცევის შეფასება და გარემოს სასარგებლოდ შეცვლაა. 

ერთი საათის განმავლობაში შუქი ჩაქრა - საქართველოს მთავრობის კანცელარიის შენობაში, პრეზიდენტის რეზიდენციაში, გარემოს დაცვისა და სოფლის მეურნეობის სამინისტროსა და სხვა სამინისტროების შენობებში, გაეროს სახლში, საქართველოს პარლამენტის შენობაში, რიყის პარკის ტერიტორიაზე არსებული გარე განათება, მშვიდობის ხიდი, ნარიყალას ციხე-სიმაგრე, თავისუფლების მოედანზე მდებარე წმიდა გიორგის მონუმენტი, დავით აღმაშენებლის გამზირზე მდებარე შენობები, ძველი თბილისის შენობები, თბილისის სატელევიზიო ანძა, პრეზიდენტის სასახლე, თბილისის მერია, მოსწავლე ახალგაზრდობის სასახლე, სამინისტროებისა და სამთავრობო უწყებების შენობები. 

აქციის ფარგლებში, თბილისის სატელევიზიო ანძა მთელი ღამის განმავლობაში მწვანედ განათდა.