გამსახურდიას მკვლელობის გამოძიება მისი ოჯახისთვის დღემდე მთავარი მოთხოვნაა

პირველი პრეზიდენტის მკვლელობის გამოძიება მისი ოჯახისთვის დღემდე მთავარი მოთხოვნაა. ზვიად გამსახურდიას მეოთხმოცე იუბილეზე ხელისუფლება ამბობს, რომ ეს ღირსების საქმეა და შედეგი უახლოეს მომავალში უნდა დადგეს. 

ზვიად გამსახურდიას სახელს უკავშირდება საქართველოს დამოუკიდებლობა და საქართველოს სახელმწიფოებრიობის აღდგენა. მე, ისევე როგორც ჩემი მეგობრები, ქედს ვიხრით მისი ნათელი ხსოვნის წინაშე, - ამის შესახებ, საქართველოს პრემიერმინისტრმა მამუკა ბახტაძემ, საქართველოს პირველი პრეზიდენტის, ზვიად გამსახურდიას 80 წლის იუბილეს აღსანიშნავად გამართულ გამოფენაზე განაცხადა.

"დღეს, საქართველოს პირველ პრეზიდენტს, ზვიად გამსახურდიას 80 წელი შეუსრულდებოდა. ამ დღესთან დაკავშირებით, საქართველოს რეგიონებში სხვადასხვა ღონისძიებებია დაგეგმილი. მისი ღვაწლი საქართველოს მრავალსაუკუნოვან ისტორიაში არის სრულიად განსაკუთრებული. საქართველოს ფოსტას დაევალა და გამოვუშვით საიუბილეო მარკა. რა თქმა უნდა, ფაქტი, რომ ეს ტრაგედია ჯერ კიდევ გამოუძიებელია, ეს არის ნამდვილად დიდი სირცხვილი და ამ ყველაფერს წერტილი უნდა დაესვას“, - განაცხადა მამუკა ბახტაძემ.

“ზვიად გამსახურდია  იყო  უდიდესი სახელმწიფო მოღვაწე, ის იყო  ინიციატორი რეფერენდუმისა, რომელიც დღემდე ძალიან მყარ სამართლებრივ საფუძველს უქმნის ჩვენს დამოუკიდებლობას და ჩვენს ტერიტორიულ მთლიანობას“,- ამის შესახებ საქართველოს პარლამენტის თავმჯდომარემ ჟურნალისტებს  ეროვნულ ბიბლიოთეკაში განუცხადა.

"აღვნიშნავთ საქართველოს პირველი პრეზიდენტის ზვიად გამსახურდიას 80 წლის იუბილეს. ზვიად გამსახურდია იყო პატრიოტი, რომელსაც მიუძღვის განსაკუთრებული როლი საქართველოს ეროვნული მოძრაობის აღორძინებაში. ის იყო რეფერენდუმის ინიციატორი, რომელიც დღემდე ძალიან მყარ სამართლებრივ საფუძველს უქმნის ჩვენს დამოუკიდებლობას და ჩვენს ტერიტორიულ მთლიანობას. ის იყო უდიდესი სახელმწიფო მოღვაწე და ჩვენი ვალია მის ხსოვნას მივაგოთ სათანადო პატივი.

სამართლებრივი ზომებიც მივიღეთ ამისთვის და კანონში შევიტანეთ სპეციალურად ცვლილება, რომელიც აძლევს გამოძიებას მეტ დროს ამ საქმის გამოძიებისათვის. შესაბამისად, არის სრული მხარდაჭერა ამ კუთხით სამართალდამცავი ორგანოების მიმართ და იმედი გვაქვს, რომ სამართალდამცავი ორგანოები საბოლოოდ მიიყვანენ ამ საქმეს სათანადო დასასრულამდე”, - განაცხადა ირაკლი კობახიძემ”,- განაცხადა პარლამენტის თავმჯდომარემ.

ეროვნულ-განმათავისუფლებელი მოძრაობის ლიდერისა და დამოუკიდებელი საქართველოს პირველი მმართველის დაბადების დღესთან დაკავშირებით ეროვნულ ბიბლიოთეკაში გამოფენა გაიხსნა.