კახა კალაძე: გუშინდელ აქციას ახლდა პოლიტიკური შემადგენელი რაც სამწუხაროა

თბილისის მერმა, კახა კალაძემ თბილისში შრომის უსაფრთოებასთან დაკავშირებით გამართულ აქციაზე კომენტარი გააკეთა.

დედაქალაქის მერი აცხადებს, რომ წლების განმავლობაში შრომის უსაფრთხოების მხრივ სერიოზულ პრობლემა იყო და გარკვეული საკანონმდებლო ცვლილებები განხორციელდა. ამის შესახებ კალაძემ გლდანში მოსულიშვილის ქუჩაზე მიმდინარე საგზაო სამუშაოების დათვალიერების შემდეგ ჟურნალისტებს განუცხადა.

„რაც შეეხება ფაქტს, რომელსაც ჩემი გამოხმაურება მოჰყვა - თბილისში ვბრუნდებოდი, როდესაც მითხრეს, რომ ახალგაზრდების ჯგუფია, რომელიც აპროტესტებს მუშების უფლებებს და ითხოვენ შეხვედრას.

იქ ჩამოთვლილი იყო პრემიერ-მინისტრი, გახარია, სერგეენკო, სხვადასხვა მინისტრები და მერიაც. თანხმობა განვაცხადე და ვუთხარი, გაავრცელეთ მიმართვა, რომ მზად ვიყავი, შევხვედროდი ამ ადამიანებს. მიმეწოდებინა ინფორმაცია, რა გაკეთდა ამ მიმართულებით. წლების განმავლობაში შრომის უსაფრთხოების მხრივ სერიოზულ პრობლემა იყო და გარკვეული საკანონმდებლო ცვლილებები განხორციელდა.

„თბილისის მერიაც იყო ინიციატორი ცვლილებების, რომელიც გასულ წელს ჩვენ დავაინიცირეთ. ეს ეხებოდა მშენებლობებზე რეგულაციების გამკაცრებას, მშენებლობაზე დასაქმებულების უფლებებს, მათ უსაფრთხოებას და ასე შემდეგ. ვიფიქრე, რომ ამ ყველაფერს ავუხსნიდი ახალგაზრდებს, თუმცა, როგორ განვითარდა მოვლენები, თავადაც დაინახეთ. როდესაც ვნახე კადრები, დავინახე, თუ ვინ იყვნენ ამ აქციის ორგანიზატორები, ჩემთვის ყველაფერი ნათელი გახდა. ამ აქციას ახლდა პოლიტიკური შემადგენელი, რაც სამწუხაროა და არ გავაგრძელებ, ვინ დგას ამის უკან, ვინ მართავს ამ ყველაფერს“, - განაცხადა კახა კალაძემ.

რაც შეეხება მშენებელ კომპანიას, თბილისის მერის ინფორმაციით, მუნიციპალური ინსპექციის შედეგად, ამ კომპანიას დოკუმენტურად ყველაფერი წესრიგში ჰქონდა. 

„შემოწმება იყო - ყველანაირი თვალსაზრისით გამართული იყო არსებულ ობიექტზე მიმდინარე სამუშაოები. დეტალებზე გამიჭირდება საუბარი. ალბათ, შესაბამისი სამსახურები უახლოეს პერიოდში დაადგენენ, თუ რა მოხდა და რასთან გვაქვს საქმე. რაც შეეხება მშენებელ კომპანიას, ჩემი ინფორმაციით, მუნიციპალური ინსპექციის შედეგად, როდესაც განხორციელდა ინსპექტირება და შემოწმება, დოკუმენტურად ყველაფერი წესრიგში ჰქონდათ აღნიშნულ კომპანიას“, - აღნიშნა კახა კალაძემ.

31 მარტს ჭავჭავაძის 5 ნომერში მშენებარე ობიექტზე, სამშენებლო სამუშაოების დროს მიწა ჩამოიშალა და ორი მუშა მოიყოლა. მაშველებმა მიწის მასიდან 25 წლის კაცის ცხედარი მალევე ამოიყვანეს, 8 საათი გაგრძელდა მეორე ცხედრის სამძებრო სამუშაო. ორივე კაცი მიწის რვამეტრიანი მასის ქვეშ იყო მოყოლილი.

მიწა სავარაუდოდ იქ ჩამოიშალა, სადაც საძირკველი იყო გაჭრილი. რა გახდა მომხდარის მიზეზი, ჯერჯერობით უცნობია. პირველ აპრილს ცნობილი გახდა, რომ ჭავჭავაძეზე მშენებლობის დამკვეთ კომპანიას საქმიანობის უფლება შეუჩერდა, ორ ქვეკონტრაქტორ კომპანიას კი ჯარიმა დაეკისრა.