ივანიშვილი: სოციალ-დემოკრატების წასვლა კარგი მაგალითია თუ როგორ უნდა დატოვო გუნდი

პარტია "ქართული ოცნება - დემოკრატიული საქართველოს" თავმჯდომარემ ბიძინა ივანიშვილმა გუნდიდან სოციალ-დემოკრატების წასვლასთან დაკავშირებით განაცხადა, რომ პარტიიდან მათი გასვლა "ევროპული, კლასიკური ვარიანტია იმის, თუ როგორ უნდა დატოვო გუნდი", - ამის შესახებ ბიძინა ივანიშვილმა ტელეკომპანია "იმედის" გადაცემა "პირისპირ"-ის ეთერში განაცხადა. 

ბიძინა ივანიშვილმა ბექა ნაცვლიშვილს, გია ჟორჟოლიანს და მირიან წიკლაურს წარმატება უსურვა. 

"სწორედ რომ ეს ჰგავს იმ კლასიკურ შემთხვევას, თუ როგორ უნდა იყოფოდნენ პარტიები, რატომ უნდა გადიოდნენ  და ტოვებდნენ საკუთარ გუნდს.

მათ გულწრფელად ეცადნენ და საპენსიო რეფორმაზე საკუთარი ვარიანტი წარადგინეს, თუმცა გუნდიდან ვერ მიიღეს მხარდაჭერა. შრომის კოდექსთან დაკავშირებითაც ასევე აქვთ განსხვავებული შეხედულებები და რამდენიმე თვით ადრე აფრთხილებდნენ გუნდს. გუნდში ამის შეჯერება ვერ მოხდა. მათ გააფრთხილეს გუნდი რამდენჯერმე, საჯაროდაც გამოვიდნენ და შემდეგ გავიდნენ პარტიიდან. ეს არის ევროპული კლასიკური ვარიანტი იმისა, რომ დატოვო გუნდი, იმიტომ, რომ ღირებულებებზე და იდეოლოგიაზე ვერ თანხმდები. როგორც გავიდნენ დანარჩენები, ეს აბსოლუტური გაუგებრობა და ღია კარის მტვრევა იყო მხოლოდ", - განაცხადა ბიძინა ივანიშვილმა და „სოციალ-დემოკრატებს“ წარმატება უსურვა.

"ჩემი ოცნებაა, რომ პარტიების ჯანსაღ კონკურენციას მოვესწრო საქართველოში, რომ იდეოლოგიური ბრძოლა წავიდეს და არა ადამიანებზე დაფუძნებული. გულწრფელად ვისურვებდი, რომ მემარცხენე პარტიას მოეკრიბოს ძალა, რაც საკმაოდ რთულია", - დასძინა ბიძინა ივანიშვილმა.