სერგეენკო ქობულიაზე: ასე არ დავარქმევდი, რომ მოხსნეს

ეკონომიკის მინისტრის, გიორგი ქობულიას თანამდებობიდან გადადგომაზე დღეს როგორც მართველი გუნდის, ისე ოპოზიციის წარმომადგენლებმა განცხადებები გააკეთეს.

დამოუკიდებელი დეპუტატი ეკა ბესელია ამბობს, რომ დამატებითი განმარტებების გაკეთებაა საჭირო. "საჭიროა, მკაფიო განმარტებების გაკეთება. შესაძლოა, ცვლილებების აუცილებლობა იყოს, მაგრამ მთავარია, უკეთესი გათვლა, თუმცა არა პერსონალური გადაწყვეტილების მიმართულებით, რომლის იქითაც რაღაც კითხვები ჩნდება“, - განაცხადა ბესელიამ.

„ევროპული საქართველოს“ წევრ ირაკლი აბესაძის აზრით კი, კარგად გამოჩნდა, რომ ეკონომიკის მინისტრი გადააყენეს და მას პრემიერმინისტრთან გარკვეული დაპირისპირება ჰქონდა.

"ქობულიას გადაყენება შესაძლოა, უკავშირდებოდეს სახელმწიფო სტრატეგიული და მნიშვნელოვანი ობიექტების პრივატიზების პროცესს, რომლის ხელში ჩაგდებას შესაძლოა უჩა მამაცაშვილი თუ ივანიშვილის გარემოცვა და ოჯახის წევრები სხვადასხვა ხერხით ცდილობდნენ. ქობულიას გათავისუფლების მიზეზი რომ არ იყო სიღარიბის წინააღმდეგ ბრძოლა და ეკონომიკურ განვითარებაზე ზრუნვა, ეს ცალსახაა. როგორც ჩანს, ამის უკანაც ივანიშვილის ვიწრო ოჯახური ინტერესები იმალება და ახლო მომავალში სხვადასხვა კორუფციულ გარიგებას უნდა ველოდოთ“, - განაცხადა აბესაძემ.

პარლამენტის ადამიანის უფლებათა კომიტეტის თავმჯდომარე სოფო კილაძე აცხადებს, რომ მინისტრების გადაყენება პრემიერმინისტრის პრეროგატივაა.

​"არ ვარ ეკონომიკური გუნდის წარმომადგენელი, აქედან გამომდინარე, დეტალები ჩემთვის უცნობია. ზოგადად, ჩვენთან კონსულტაციები ამ თემასთან დაკავშირებით არ ყოფილა. პრემიერმინისტრის პრეროგატივაა, გადაწყვიტოს კონკრეტული მინისტრის თანამდებობიდან გათავისუფლების საკითხი და მან ეს უფლებამოსილება გამოიყენა“, - განუცხადა კილაძემ ჟურნალისტებს ეკონომიკისა და მდგრადი განვითარების მინისტრის ცვლილებასთან დაკავშირებით.

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის, დავით სერგეენკოს განცხადებით კი, ის გიორგი ქობულიას მიერ თანამდებობის დატოვებას მოხსნას ვერ უწოდებს. 

"ასე არ დავარქმევდი, რომ მოხსნეს. ამ წლების განმავლობაში მინისტრების ცვლილებები სულ იყო და ნამდვილად ვიცი, მომავალშიც იქნება. რაც შეეხება კონსულტაციებს, ვიცოდი, რომ კონსულტაციები მიმდინარეობდა, თუმცა მე თვითონ კონსულტაციებში არ ვმონაწილეობდი, რადგან ეს ამ შემთხვევაში არ არის ჩვენი სამინისტროს ფუნქცია. კონსულტაციებზე წამოჭრილი არგუმენტები და ის ფაქტორები, რამაც ეს ცვლილებები განაპირობა, ჩემთვის უცნობია", - განაცხადა სერგეენკომ.

საქართველოს ეკონომიკისა და მდგრადი განვითარების მინისტრის სავარძელს ნათია თურნავა დაიკავებს.  მანამდე  ეკონომიკის მინისტრმა გიორგი ქობულიამ თანამდებობა პრემიერმინისტრის ბრძანებით დატოვა. გიორგი ქობულია  ეკონომიკის მინისტრად 2018 წლის 12 ივლისს დაინიშნა.

ნათია თურნავა ეკონომიკის მინისტრის პირველ მოადგილედ 2000 წლის შემდეგ სხვადასხვა დროს მუშაობდა. 2013-2018 წლებში „საპარტნიორო ფონდის“ აღმასრულებელი დირექტორის მოადგილე იყო.