პარლამენტში სახალხო დამცველს უსმენენ

პარლამენტში სახალხო დამცველს უსმენენ. ნინო ლომჯარია დეპუტატებს საკუთარ ხედვას მოსამართლეებთან დაკავშირებული კანონპროექტის შესახებ აცნობს. ლომჯარიამ ხაზგასმით აღნიშნა, რომ პარლამენტმა იმ მოსამართლეთა არჩევის წესი უნდა მიიღოს, რომლებიც უმაღლესი ინსტანციის მოსამართლეები 20-30 წელი იქნებიან, ამიტომ საკითხის განხილვას უფრო მეტი დრო სჭირდება.

“არსებობს ორი უაღრესად ავტორიტეტული ორგანიზაციის დასკვნა, შესაბამისს აქტებზე მითითებით. წარმოდგენილი კანონპროექტი რიგ შემთხვევაში არ შეესაბამება საერთაშორისო სტანდარტებს და ეს ორგანიზაციები კონკრეტულ გამოსავალს გვთავაზობენ.

ასევე აუცილებელია დაზუსტდეს, რომ იუსტიციის უმაღლესი საბჭოს იმ წევრს, რომელიც უზენაესი სასამართლოს მოსამართლეობის კანდიდატად იქნება წარდგენილი, არ შეეძლოს არანაირი ფორმით განხილვაში მონაწილეობა, არ წარმართოს საბჭოს სხდომები, არ ჩაერთოს ადმინისტრაციულ-საორგანიზაციო საქმეებში. იგი ასევე არ უნდა გაეცნოს ინფორმაციას სხვა კანდიდატების შესახებ. კანდიდატად წარდგენილი იუსტიციის უმაღლესი საბჭოს წევრი მაქსიმალურად უნდა იყოს კონკურსის გარშემო მიმდინარე პროცესებისგან დისტანცირებული“, - განაცხადა ნინო ლომჯარიამ.

ვენეციის კომისიის რეკომენდაციების უდიდეს ნაწილს ვითვალისწინებთ და იმ არაძირითად ჩანაწერზე, რომელიც ძირითად რეკომენდაციებში საერთოდ ვერ მოხვდა, აპელირებთ იმიტომ რომ ისევ და ისე ვგავლენებზე ფიქრობთ,- ასე უპასუხა ოპონენტებს ფრაქცია „ქართული ოცნების“ თავმჯდომარემ პლენარულ სხდომაზე, სადაც უზენაესი სასამართლოს მოსამართლეების შერჩევასთან დაკავშირებულ კანონპროექტზე მსჯელობენ.

"დარბაზიდან გაისმა კითხვა, რომელ პოლიტიკურ დაკვეთას ასრულებს დღეს სასამართლო და მან თქვა, რომ ყველა შუამდგომლობას აკმაყოფილებს, ყველას პატიმრობაში ტოვებს, ყველა განაჩენი იგივენაირად დგება, როგორიც არის საბრალდებო, თურმე. დრო აგერიათ უბრალოდ, დრო. სტატისტიკაზე არ არის მარტო საუბარი, თურმე ადამიანები არ მართლდებიან, თურმე ყველა პატიმრობაში რჩებადა გირაოს არ გამოიყენებენ. დრო აგერიათ, ელემენტარულად და ვეღარ ხვდებით, რას ლაპარაკობთ, იმიტომ რომ არგუმენტი აქ არ გაქვთ. წარმოიდგინეთ, რომ დღევანდელ სასამართლოზე ამბობს, რომ ყველა შუამდგომლობას აკმაყოფილებს. ამის იქით რაღა უნდა თქვა, ტყუილის იქით აღარ ითქმება აღარაფერი“,- განაცხადა მამუკა მდინარაძემ.

დღესვე, ომბუდსმენის მოსმენის შემდეგ მმართველი გუნდის პროექტს კენჭს მეორე მოსმენით უყრიან. 

საქართველოში უზენაესი სასამართლოს მოსამართლეების შერჩევის საკითხზე ვენეციის კომისიამ დასკვნა 16 აპრილს გამოაქვეყნა. 

ვენეციის კომისია ხუთ ძირითად რეკომენდაციას გამოყოფს. მათ შორის, უნდა გადაიხედოს არამოსამართლე კანდიდატებისთვის გამოცდის ჩაბარების აუცილებლობა, ხოლო იუსტიციის უმაღლესი საბჭოს წევრი, რომელიც იმავდროულად არის კანდიდატი, გამორიცხული უნდა იყოს კანდიდატების შერჩევა-ნომინირების ყველა პროცედურისგან.