სესიაშვილი: პოლიციელისთვის ქვის სროლაზე რეაგირება სავალდებულოა

პანკისის ხეობაში გუშინ განვითარებულ მოვლენებს პოლიტიკოსები აფასებენ. „პოლიციელისთვის ნასროლი ქვა ეს არის სახელმწიფოსთვის ნასროლი ქვა“, - ამის შესახებ პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილმა განაცხადა. მისი თქმით, პოლიციელისთვის ქვის სროლაზე რეაგირება სავალდებულოა.

"რაც ჩვენ ვნახეთ, პროტესტის ეს ფორმა აბსოლუტურად მიუღებელია. ჩემთვის ასევე აბსოლუტურად მიუღებელია ის შეფასებები, რომლებითაც, პოლიტიკური მოტივებით, ხელისუფლებას ადანაშაულებენ მაშინ, როდესაც პოლიციელისთვის ნასროლი ქვა, ეს არის სახელმწიფოსთვის ნასროლი ქვა. სამწუხაროდ, მოვისმინე ანტისახელმწიფოებრივი განცხადებებიც, ამიტომ ეს ჩემთვის კომპლექსური საკითხია“, - აღნიშნა სესიაშვილმა.

თითოეული ჩვენგანი და სახელმწიფო ვალდებულია, დაადგინოს პანკისში მომხდარი მოვლენების მაპროვოცირებელი მიზეზები, - ამის შესახებ დეპუტატმა კობა კობალაძემ, გაერთიანებული კომიტეტის სხდომაზე განაცხადა, სადაც სახელმწიფო უსაფრთხოების სამსახურის 2018 წლის ანგარიშის მოსმენა მიმდინარეობს.

„ნიშანდობლივია ის, რომ ვცდილობთ იაფფასიანი პიარისთვის გამოვიყენოთ პანკისის თემა. პანკისის ხეობა ეს არის ადგილი, ეს არის საქართველოს შემადგენელი ნაწილი, ტერიტორია, რომელმაც უაღრესად უვაჟკაცესი და ღირსეული შვილები გაუზარდა ჩვენს ქვეყანას და ბევრი მათგანი დღესაც ამ სულისკვეთებით არის. მთლიანად ეს ხეობა იმ სულისკვეთებით არის გაჟღენთილი, რომ ჩვენი ქვეყანა იყოს ძლიერი და ერთიანი. ბევრი ჩართული იყო საქართველოს ტერიტორიული მთლიანობისთვის ბრძოლებში, ბევრი მათგანი გმირულად დაიღუპა. კიდევ ერთხელ ვამბობ, ეს არის უაღრესად თავმდაბალი, შემართული და თავის სამშობლოზე შეყვარებული ხალხი“, - განაცხადა კობა კობალაძემ.

განცდა მაქვს, რომ გარკვეულმა ძალებმა გამოიყენეს პანკისის მოსახლეობის განწყობები, - ამის შესახებ ადამიანის უფლებათა კომიტეტის თავმჯდომარე სოფო კილაძემ პანკისის ხეობაში გუშინ განვითარებულ მოვლენებთან დაკავშირებით განაცხადა. მისი თქმით, ქვეყანაში სიმშვიდის შენარჩუნებისთვის პასუხისმგებლობა, პირველ რიგში, ხელისუფლებას ეკისრება.

"მე მგონია, ჩვენ მაქსიმუმი უნდა გავაკეთოთ მოსახლეობასთან კომუნიკაციისა და მათი დარწმუნებისთვის, რომ თუ ეს ჰესი უნდა აშენდეს, მაშინ ამაში ჩვენს გვერდით, პირველ რიგში, მოსახლეობა უნდა იყოს და მათი ინტერესებიდან გამომდინარე უნდა ხდებოდეს ეს. იმავდროულად, ძალიან მნიშვნელოვანია, სახელმწიფო ინსტიტუტების პატივისცემა. ვფიქრობ, არც ერთ მოქალაქეს არ ეკადრება პოლიციისადმი ის დამოკიდებულება, რაც ჩვენ გუშინ ვიხილეთ. ეს ძალიან სამწუხაროა. მე განცდა მაქვს, რომ გარკვეულმა ძალებმა გამოიყენეს იქაური მოსახლეობის განწყობები. ისეთ მნიშვნელოვან საკითხზე, როგორიც ჰესის მშენებლობა, მოსახლეობა ჩვენი მოკავშირე უნდა იყოს და არა საპირისპირო პლატფორმაზე მყოფი. ასეთი ტიპის დაპირისპირება ქვეყნისთვის არის სახიფათო და პირველ რიგში, პასუხისმგებლობა ხელისუფლებაზეა იმისთვის, რომ მთელ ქვეყანაში იყოს სიმშვიდე", - განაცხადა კილაძემ.

პანკისის ხეობაში მოქალაქეებმა ჰესის მშენებლობა გააპროტესტეს. პროტესტს პოლიციასა და აქციის მონაწილეებს შორის დაპირისპირება მოჰყვა. სპეცრაზმმა აქციის მონაწილეების წინააღმდეგ ცრემლმდენი გაზი გამოიყენა. ხეობაში მომხდარი დაპირისპირების გამო სამედიცინო დახმარება 55 ადამიანს გაეწია, მათ შორის 38 პოლიციელსა და 17 ადგილობრივს.  შსს-მ პანკისის ხეობაში პოლიციელებზე თავდასხმისა და პოლიციის ტექნიკის დაზიანების ფაქტზე გამოძიება დაიწყო.