პარლამენტში სუსის ანგარიში მოისმინეს. ვიდეო

პარლამენტმა სუსის ანგარიში მოისმინა. ოკუპაცია, ჰიბრიდული ომი და სხვა გამოწვევები - სამსახურის ხელმძღვანელის მოადგილემ სწორედ ამ მიმართულებებზე ილაპარაკა. ოპოზიცია კითხვების ღია ფორმატში დასმას მოითხოვდა, თუმცა სასაუბრო თემების მნიშვნელობის გათვალისწინებით სხდომა დაიხურა. 

"როდესაც კითხვები იქნება ტერორიზმთან, ოკუპირებულ ტერიტორიებთან დაკავშირებით, სხდომა დავხუროთ, მაგრამ ფულს რომ იპარავენ თქვენი კოლეგები, ამასთან დაკავშირებით კითხვას როდესაც დავსვამთ, არ დახუროთ სხდომა. მე მგონი მარტივია", - ამის შესახებ „ნაციონალური მოძრაობის“ ერთ-ერთმა ლიდერმა ნიკა მელიამ პარლამენტში სამი კომიტეტის გაერთიანებულ სხდომაზე განაცხადა, სადაც სუს-ის 2018 წლის ანგარიშის მოსმენა მიმდინარეობს. 

"თქვენ მოხსენებაში რამდენიმე სხვა თავიც იყო. მაგალითად: კორუფციის წინააღმდეგ ბრძოლა, რომლითაც ასე იწონებდით თავს საანგარიშო პერიოდში. რა არის აქ დასამალი? მე მაქვს კითხვა, როგორ მოხდა, რომ საანგარიშო პერიოდში ქრთამის აღებაზე მხოლოდ 21 საქმეზე აღძარით სისხლის სამართლის საქმე და ქრთამის მიცემაზე სამი?! მცხეთის მუნიციპალიტეტის მერის წარმომადგენელი სოფელ ცხვარიჭამიაში დაგიჭერიათ თურმე ქრთამის აღებაზე, მაშინ, როდესაც ბატონი გოგაშვილი, თქვენი კოლეგა რომ იყო და დღეს პარტიაში მოღვაწეობს, მოვიდა სოციალურად დაუცველის სტატუსით და დღეს არის დეკლარირებული მილიონერი“, - განაცხადა ნიკა მელიამ.

„ნაციონალური მოძრაობის“ წევრმა, დეპუტატმა სალომე სამადაშვილმა სუსის ანგარიშის განხილვის დახურვა გააპროტესტა. როგორც სამადაშვილმა აღნიშნა, საზოგადოებისთვის მნიშვნელოვანია, პანკისში გუშინ განვითარებულ მოვლენებზე სახელმწიფო უსაფრთხოების სამსახურის წარმომადგენლის პასუხი ღიად მოისმინოს.

"ჩემთვის უცნაურია ტონი, რომლითაც დღევანდელი სხდომა დაიწყეთ, რადგან გუშინ ძალიან სერიოზული კრიზისი იხილა საზოგადოებამ. დღეს ჩვენ აქ გასართობად არ შევკრებილვართ. ოპოზიციასთან საუბრისას ტონი შეარჩიეთ და ჩვენ თუ გვაქვს რამე მოსაზრებები, რომ ამ სხდომის ნაწილი საჯარო უნდა იყოს, ალბათ გვაქვს ჩვენი საკუთარი მოტივაცია ამისთვის და არ არის საჭირო კოლეგებთან ასეთი ტონით საუბარი. მაგალითად შემიძლია გითხრათ, ჩემთვის საინტერესოა, ვფიქრობ საზოგადოებისთვისაც და ჟურნალისტებისთვისაც, საჯაროდ მოისმინონ პასუხი, შეკითხვაზე, რომელიც მაქვს სუსის წარმომადგენელთან. ეხმარება თუ არა ჩვენი ქვეყნის ინტერესებს კამპანია, პიარკამპანია, რაც დღეს წარმოებს პანკისის მოსახლეობის წინააღმდეგ, როდესაც მათ აკავშირებენ ისლამურ ფუნდამენტალისტურ მოძრაობასთან თქვენი ხელისუფლების სხვადასხვა პროპაგანდისტული საშუალებით? მაინტერესებს ამაზე პასუხი მოვისმინო საჯაროდ და მნიშვნელოვანია, პასუხი მოისმინონ ასევე მედიის წარმომადგენლებმა, რომლებიც სამწუხაროდ ამ სამარცხვინო კამპანიას აწარმოებენ დღეს, როდესაც უსერიოზულესი გამოწვევის წინაშე დგას ჩვენი სახელმწიფო“, - მიმართა სალომე სამადაშვილმა სხდომის თავმჯდომარეს ირაკლი სესიაშვილს. 

ოპოზიციონერ დეპუტატს თავდაცვის კომიტეტის თავმჯდომარემ ირაკლი სესიაშვილმა უპასუხა და აღნიშნა, რომ ყველა საფრთხეებსა და გამოწვევებზე, უმჯობესი იქნება, თუ სხდომა დახურულ რეჟიმში გაგრძელდება.

"ჩემი ტონი თუ არ მოგწონთ, ეს მიხარია, მაგრამ არის ქვეყნის ინტერესები, სადაც თქვენ კონსოლიდაციის უნარი არ გქონდათ, როცა ხელისუფლებაში იყავით და არც დღეს გაქვთ, როცა ოპოზიციაში ხართ. ესეც ის განსხვავებაა, რომელიც ჩვენს შორის არის ფუნდამენტური, როგორც ხშირად გიყვართ ხოლმე ამ სიტყვის ხმარება. დიახ, ჩვენ უნდა გავაგრძელოთ მუშაობა, მათ შორის თქვენთან ერთად“, - მიმართა სესიაშვილმა სალომე სამადაშვილს.

საბოლოოდ, სხდომის დახურვის საკითხი კენჭისყრაზე დადგა და იურიდიულ საკითხთა, ადამიანის უფლებათა დაცვის და თავდაცვისა და უშიშროების კომიტეტების გაერთიანებული სხდომა, უმრავლესობის გადაწყვეტილებით, დაიხურა.