რა ხდებოდა საერთო სასამართლოებზე კანონპროექტის განხილვისას. მთავარი

საერთო სასამართლოების შესახებ კანონპროექტი საბოლოოდ მიღებამდე მმართველმა გუნდმა დღეს არასამთავრობო სექტორთან ერთად განიხილა. როგორც აღმოჩნდა, თავად არასამთავრობო ორგანიზაციებში ამ მხრივ აზრთასხვადასხვაობაა და მათი ნაწილი პოზიტიურად აფასებს იმას, რომ დოკუმენტში მმართველმა გუნდმა ვენეციის კომისიის რეკომენდაციების ნაწილი გაითვალისწინა.

ამ შეხვედრის შემდეგ კანონპროექტი იურიდიულ საკითხთა კომიტეტზე განიხილეს. "ქართული ოცნებიდან" წასულმა დეპუტატმა ეკა ბესელიამ "ევროპულ საქართველოსთან" ერთად, ისევ მოითხოვა დოკუმენტის მეორე მოსმენის ეტაპზე დაბრუნება.

საპარლამენტო უმრავლესობაში კი აცხადებენ, რომ კანონპროექტი მესამე მოსმენიდან მეორე მოსმენაზე ვერ დაბრუნდება.

„იყო ერთი საკითხი რაზეც თანხმობა არ განვაცხადეთ, იქიდან გამომდინარე ვენეციის კომისიის დასკვნა ამ საკითხს სხვაგვარად განიხილავდა რამდენიმე წლის წინ. როდესაც ჩვენი ოპონენტები ამბობენ, რომ მეორე მოსმენაზე დაბრუნდეს კანონი, თავადაც კარგად იციან, რომ ეს არ არის პრაქტიკული და რეალური საკითხი და გამომდინარეობს იქიდან რაზეც ვისაუბრეთ, რამენაირად მოიპოვონ გავლენები,“- აცხადებს მამუკა მდინარაძე.

კონსტიტუცია ადგენს, რომ უზენაესი სასამართლოს მოსამართლეობის კანდიდატებს იუსტიციის უმაღლესი საბჭო წარადგენს და შემდეგ პარლამენტი ირჩევს, ანუ ეს ორი ორგანოს უფლებამოსილებაა, - ამის შესახებ პარლამენტის თავმჯდომარე ირაკლი კობახიძემ მოსამართლეთა შერჩევის შესახებ კანონპროექტთან დაკავშირებით განაცხადა.

"ჩვენ უპრეცედენტოდ ღია და გამჭვირვალე პროცედურა გავწერეთ, რომელსაც ანალოგი არ აქვს არც ერთ, ევროკავშირის ქვეყანაშიც კი. კიდევ ერთხელ ყველას მოვუწოდებ, დაასახელონ თუნდაც ევროკავშირის ერთი ქვეყანა, სადაც ამის მეათედი მაინც არის დადგენილი. ეს უპრეცედენტოდ ღია და გამჭვირვალე პროცედურაა“, - განაცხადა პარლამენტის თავმჯდომარემ.

რაც შეეხება კითხვას ამ საკითხზე საქართველოში აშშ-ის ელჩის მოვალეობის შემსრულებლის, როს უილსონის განცხადებასთან დაკავშირებით, პარლამენტის თავმჯდომარე ამბობს, რომ გაწერილი პროცედურა ევროკავშირის ქვეყნებისა და ამერიკულ პროცედურებთან შედარებით გაცილებით ღია და გამჭვირვალეა.

"ვთქვი, რომ ევროკავშირის არც ერთი ქვეყანა არ არის, სადაც ამის მეათედიც კი არის დადგენილი ღიაობისა და გამჭვირვალობის კუთხით. ამერიკის შეერთებულ შტატებშიც შეგიძლიათ პროცედურა ნახოთ. იმის მეათედიც კი არ არის უზრუნველყოფილი, რაც იმ კანონპროექტითაა უზრუნველყოფილი, რომელიც ჩვენს მიერ არის შეთავაზებული. ეს უპრეცედენტოდ ღია და გამჭვირვალე პროცედურაა, რომლის იქით უბრალოდ არაფერი აღარ არსებობს. 10-ჯერ ღია და გამჭვირვალეა, ამას უხეშად ვამბობ, შეიძლება, 100-ჯერაც, ჩვენი პროცედურა ევროკავშირის ქვეყნებისა და ამერიკულ პროცედურებთან შედარებით“, - განაცხადა ირაკლი კობახიძემ.

საქართველოში უზენაესი სასამართლოს მოსამართლეების შერჩევის საკითხზე ვენეციის კომისიამ დასკვნა 16 აპრილს გამოაქვეყნა. ვენეციის კომისია ხუთ ძირითად რეკომენდაციას გამოყოფს. მათ შორის, უნდა გადაიხედოს არამოსამართლე კანდიდატებისთვის გამოცდის ჩაბარების აუცილებლობა, ხოლო იუსტიციის უმაღლესი საბჭოს წევრი, რომელიც იმავდროულად არის კანდიდატი, გამორიცხული უნდა იყოს კანდიდატების შერჩევა-ნომინირების ყველა პროცედურისგან.