მდინარაძე: ნაციონალებსა და „ევროპულ საქართველოს“ ერთი წარსული, აწმყო და მომავალი აქვთ

"ევროპული საქართველო" ყოფილ თანაგუნდელებზე ნაწყენია. როგორც აღმოჩნდა, მიუხედავად იმისა, რომ შეთანხმება არსებობდა, შუალედური არჩევნების წინ "ნაციონალურმა მოძრაობამ" ეს შეთანხმება დაარღვია.

უთანხმოება მათ ორ საარჩევნო ოლქში აქვთ. "ევროპულ საქართველოში" უკვე იმაზეც დაფიქრდნენ, საერთოდ ღირს თუ არა იმ პარტიასთან თანამშრომლობა, საიდანაც თავად წამოვიდნენ. საბოლოოდ, ერთად თუ ცალ-ცალკე, მმართველი პარტიისთვის ძველი ხელისუფლების ორ განაყოფს შორის ახალი დაპირისპირება აქტუალური არ არის. 

ჩვენ ორივე პარტიასთან, „ევროპულ საქართველოსა“ და „ნაციონალურ მოძრაობასთან“ კონკურენტული არჩევნების ჩასატარებლად და გამარჯვებისთვის მზად ვართ, – ამის შესახებ საპარლამენტო უმრავლესობის ლიდერმა, არჩილ თალაკვაძემ განაცხადა. მისი თქმით, ამ ორ პარტიას შორის კონფლიქტში „ქართული ოცნება“ შუამავალი ვერ იქნება.

"თუ კანდიდატებთან დაკავშირებით „ნაციონალურ მოძრაობასა“ და „ევროპულ საქართველოს” ერთმანეთთან შეუთანხმებლობა და კონფლიქტი აქვთ, შუამავლის როლში „ქართული ოცნება“ ნამდვილად არ გამოადგებათ. ჩვენ ორივე პოლიტიკურ პარტიასთან კონკურენტული არჩევნების ჩასატარებლად და გამარჯვებისთვის მზად ვართ. ასე რომ, მათ არჩევნების დღეს ველოდებით“, – განაცხადა თალაკვაძემ.

„ნაციონალურ მოძრაობასა“ და „ევროპულ საქართველოს“ ერთი წარსული, ერთი აწმყო და ერთი მომავალი აქვთ, - ამის შესახებ პარლამენტის ფრაქცია „ქართული ოცნების“ ლიდერმა, მამუკა მდინარაძემ განაცხადა.

მისი თქმით, ამ ორი პარტიის შეხედულებები საზოგადოების შეხედულებებს არ ემთხვევა.

"ისინი ხან იჩხუბებენ, ხან შერიგდებიან. მათ აქვთ ერთი წარსული, ერთი აწმყო და ერთი მომავალი, საერთო პრინციპები, საერთო შეხედულებები, რომელიც საზოგადოების შეხედულებებს არ ემთხვევა და არც საზოგადოების ინტერესებს ემთხვევა, არც სასამართლოსთან, არც ადამიანის უფლებებთან, არც ქვეყნის განვითარებასთან დაკავშირებით. წინ გვაქვს ამის ბევრი მაგალითი“, - განაცხადა დეპუტატმა.

„ნაციონალური მოძრაობის“ წევრი ლევან ბეჟაშვილი აცხადებს, რომ შუალედურ არჩევნებთან დაკავშირებით „ევროპულ საქართველოსთან“ შეთანხმება არ დარღვეულა.

ლევან ბეჟაშვილმა ამ განცხადებით „ევროპული საქართველოს“ წევრს, დეპუტატ აკაკი ბობოხიძეს უპასუხა, რომელმაც განაცხადა, რომ „ნაციონალურმა მოძრაობამ“ „ევროპულ საქართველოსთან“ შუალედურ არჩევნებთან დაკავშირებით მიღწეული შეთანხმება დაარღვია. მისი თქმით, ახლა ერთმანეთთან ბრიფინგებით საუბრის დრო არ არის.

„ბრიფინგის შინაარსი არ შეესაბამება სინამდვილეს. მიუღებელი და გაუმართლებელია გაერთიანებული ოპოზიციის და სხვა პოლიტიკური პარტიების მიერ ბრიფინგებით საუბარი, როდესაც კონსულტაციების შედეგად იმთავითვე ცნობილი იყო, რომ ზესტაფონში და მარნეულში გაერთიანებული ოპოზიცია თავის კანდიდატურას დააყენებდა. რაც შეეხება ჭიათურას, შეთანხმებისამებრ, საკრებულოს წევრის, მაჟორიტარი კანდიდატის წარდგენა მოხდა. მერის არჩევნებში გაერთიანებული ოპოზიცია და „ნაციონალური მოძრაობა“ არ მონაწილეობს“, – განაცხადა ბეჟაშვილმა.

შუალედური არჩევნები 19 მაისს გაიმართება.