ირაკლი კობახიძე: დღეს საქართველო შემდგარი დემოკრატიული სახელმწიფოა

დღეს საქართველო შემდგარი დემოკრატიული სახელმწიფოა, საპარლამენტო რესპუბლიკის ყველა ატრიბუტით, რომლის პოლიტიკურ სისტემასა და ინსტიტუტებს საფუძველს უმაგრებს თანამედროვე, ევროპული სტანდარტების მიხედვით აგებული კონსტიტუცია- ამის შესახებ პარლამენტის თავმჯდომარემ საქართველოს ევროპის საბჭოში გაწევრიანების 20 წლის იუბილისადმი მიძღვნილ საზეიმო სხდომაზე განაცხადა.

ირაკლი კობახიძის თქმით, საქართველოს პროგრესის გზაზე ერთ-ერთი ყველაზე დიდი და მნიშვნელოვანი ნაბიჯი ოცი წლის წინ საქართველოს ევროპის საბჭოში გაწევრიანება იყო.

„რაც დრო გადის, მით უფრო აქტუალურად და დამაჯერებლად ჟღერს საქართველოს პარლამენტის მაშინდელი თავმჯდომარის, ბატონ ზურაბ ჟვანიას მიერ წარმოთქმული სიტყვები: „მე ვარ ქართველი და, მაშასადამე, ვარ ევროპელი!“ ევროპელობა ჩვენთვის ნიშნავს დასავლეთთან სრულფასოვან ინტეგრაციას, დემოკრატიის განვითარებას და თანამედროვე სახელმწიფოს მშენებლობას"- განაცხადა პარლამენტის თავჯდომარემ.

ირაკლი კობახიძემ სიტყვით გამოსვლისას საკონსტიტუციო რეფორმაზე გაამახვილა ყურადღება.

„თანამედროვე სახელმწიფო შესაქმნელად, რომელიც ჩვენი თაობის მთავარი ამოცანა იყო, არის და იქნება, დემოკრატია, სამართლის უზენაესობა და ადამიანის უფლებების დაცვა-აუცილებელი პირობებია. ხაზგასმით უნდა ითქვას, რომ ეს ღირებულებები ქართველი ერის ისტორიული და არა მხოლოდ დღევანდელი არჩევანია. ნიშანდობლივია, რომ საქართველო დღესაც იმ პრინციპებზე და ღირებულებებზე დგას, რომლებიც ასი წლის წინ, საქართველოს პირველი პარლამენტის მოწვევისას გამოიკვეთა"- განაცხადა კობახიძემ.