სამი ვეტერანის ისტორია. ვიდეო

დღეს 9 მაისია-ფაშიზმზე გამარჯვების დღე. მეორე მსოფლიო ომის დასრულებიდან 74 წელი გავიდა.  

მეორე მსოფლიო ომში საქართველოდან 700 000 ადამიანი წავიდა, აქედან ნახევარი, უკან არ დაბრუნებულა. 1945 წლის 8 მაისს გერმანიის მიერ კაპიტულაციის გამოცხადების შემდეგ მეორე მსოფლიო ომი დასრულდა, 9 მაისი კი ფაშიზმზე გამარჯვების დღედ გამოცხადდა.

„იმედის დღემ“ ომის სამი ვეტერანის ისტორიები ჩაწერა. ისინი არიან 96 წლის იოსებ ტუხაშვილი, 97 წლის ტარას იჩქიტიძე და 100 წლის მერი მაღრაძე.

იოსებ ტუხაშვილმა ის სიძნელეები გაიხსენა, რომლებიც ომის დროს გამოიარა. „4 დღე პური არ მიჭამია. გვეუბნებოდნენ, რომ დაიბომბა და ვერ მოვა. ყველაზე რთული ქერჩის ოპერაცია იყო: იქ 76 000 ადამიანი დაიღუპა", - ამბობს ვეტერანი.

მისი თქმით, ომში 1941 წელს წავიდა და სამშობლოში 1947 წელს დაბრუნდა. „ძალიან ძნელია იმ ემოციის გადმოცემა, რომელსაც შეხვედრა ეწოდება: დედა ტირის, მამა ტირის".

პროფესიით სტომატოლოგი მერი მაღრაძე იხსენებს, რომ ომის დაწყების დროს ის 23 წლის იყო. მისი თქმით, იგი ცოტა ხნით უკრაინაში იყო, თუმცა მალე დააბრუნეს სამშობლოში და ომის დასრულებამდე მუშაობა ადგილობრივი დაცვის პოლკში გააგრძელა.

ტარას იჩქიტიძის თქმით, ომის დაწყებისთანავე მისი ორივე ძმა ფრონტზე წავიდა, რის შემდეგაც ომში ჩაბმა თავადაც გადაწყვიტა. „დედ-მამისთვის და სკოლისთვის არაფერი მითქვამს. კომისარიატში მითხრეს, რომ სნაიპერი უნდა ვყოფილიყავი", - იხსენებს ვეტერანი.

ტარას იჩქიტიძე ფრონტის წინა ხაზზე 3 თვე იბრძოდა, სადაც ფეხსა და ზურგში დაჭრეს. „როცა ჰოსპიტალში მოვხვდი, დედას წერილი მივწერე, რომ ცოცხალი ვარ და გერმანელების წინააღმდეგ ვიბრძვი სტალინგრადში. დედაჩემი თურმე გარეთ იყო გამოსული, 3 შვილი დაკარგული ჰყავდა და ახალი გარდაცვლილი იყო. დედაჩემს უთქვამს, შვილო, გელოდე, გელოდე და ამდენი ხანია აღარ შემიძლიაო, წაქცეულა და რამდენიმე დღეში გარდაცვლილა", - იხსენებს ტარას იჩქიტიძე.

მისივე თქმით, ომიდან მასთან ერთად, მისი ორივე ძმა დაბრუნდა, თუმცა მათ მშობლები ცოცხლები აღარ დახვდნენ.