შალვა შავგულიძე მთაწმინდელებს არჩევნებში მონაწილეობისკენ მოუწოდებს

ბლოკი „ევროპული საქართველო-თავისუფალი დემოკრატების“ მთაწმინდის მაჟორიტარობის კანდიდატმა შალვა შავგულიძემ მთაწმინდის ნომერ მე-10 საარჩევნო უბანზე ჟურნალისტებთან კომენტარი გააკეთა. 

"არჩევნების დღე არის ის მომენტი, როცა კონსტიტუციური დებულება, რომ სახელმწიფო ხელისუფლების წყარო ხალხია, უშუალო და პირდაპირ მოქმედებაშია, ვინაიდან ამ დღეს ხალხი ირჩევს სახელმწიფო ხელისუფლების წარმომადგენლებს. დარწმუნებული ვარ, რომ მთაწმინდელი ამომრჩეველი სწორ არჩევანს გააკეთებს სამართალსა და უსამართლობას, კეთილდღეობასა და სიღარიბეს, თავისუფლებას, საქართველოს დასავლურ ცივილიზაციაში ინტეგრაციას და კოლონიად რუსეთში დაბრუნებას შორის. მივმართავ მთაწმინდელებს არ დავრჩეთ სახლში, მივიდეთ საარჩევნო უბნებზე და დავაფიქსიროთ ჩვენი არჩევანი“, - განაცხადა შავგულიძემ.

შავგულიძე, რომელიც მთაწმინდის მაჟორიტარობის კანდიდატია, საბურთალოს რაიონშია ჩაწერილი, ამიტომ მთაწმინდაზე ხმა არ მიუცია. საარჩევნო უბანზე ის  შვილს მიჰყვა.

21 მარტს პარტიებმა „ევროპულმა საქართველომ“ და „თავისუფალმა დემოკრატებმა“ საარჩევნო ბლოკში გაერთიანების შესახებ განაცხადეს. სანდრო გირგვლიანის საქმის ყოფილი ადვოკატის, შალვა შავგულიძის იმ პოლიტიკურ ძალასთან გაერთიანება, რომელსაც ის წარსულში დანაშაულებრივი რეჟიმის შემქმნელებს უწოდებდა, საზოგადოებაში არაერთგვაროვანი რეაქცია მოჰყვა. 19 მაისის შუალედურ საპარლამენტო არჩევნებში, მთაწმინდის მაჟორიტარულ ოლქში ამ ორი პარტიის კანდიდატი შალვა შავგულიძეა.

დღეს საქართველოში მერების რიგგარეშე და საკრებულოს შუალედური არჩევნებია. ცენტრალური საარჩევნო კომისიის მონაცემებით, 410 საარჩევნო უბანზე 402 091 ამომრჩეველია რეგისტრირებული.

19 მაისის არჩევნებზე მონაწილე საარჩევნო სუბიექტების მიერ რეგისტრირებულია დაკვირვების უფლების მქონე 6 556 წარმომადგენელი.

საკრებულოს შუალედური არჩევნები საგარეჯოს, ახმეტის, ზესტაფონში, ჭიათურის, ტყიბულის, წყალტუბოსა და ოზურგეთის მუნიციპალიტეტში იმართება, მერს კი ხუთ მუნიციპალიტეტში მარნეულში, ზესტაფონში, ჭიათურაში, ზუგდიდსა და ხულოში აირჩევენ.