მდინარაძე: რიგი ძალები მიზანმიმართულად ცდილობენ ზუგდიდში დაძაბულობის ცენტრი შექმნან

ფრაქცია "ქართული ოცნების" თავმჯდომარე მამუკა მდინარაძემ ბრიფინგი გამართა. როგორც მან თქვა, ამ დროისთვის, ამომრჩევლის ნორმალური აქტივობაა.

"მინდა ხაზგასმით აღვნიშნო, რომ რამე განსაკუთრებულ დარღვევას ადგილი არ ჰქონია. ხმის მიცემის პროცესი საერთო ჯამში, მშვიდ, თავისუფალ და დემოკრატიულ გარემოში მიმდინარეობს.

სამწუხაროდ, ამ დროისთვის ადგილი ჰქონდა გარკვეული სახის პროვოკაციების მცდელობებსაც, თუმცა ყველა შესაბამისი სამსახური არის მობილიზებული საიმისოდ, რომ ყველაფერი იყოს მშვიდ გარემოში. ამისათვის მინდა სამართალდამცავ ორგანოებს განსაკუთრებული მადლობა გადავუხადო, რომლებიც არიან მოწოდების სიმაღლეზე და უზრუნველყოფენ სიმშვიდეს საარჩევნო უბნებთან.

მინდა მკაფიოდ განვაცხადო, რომ ნებისმიერ უკანონო მოქმედებას, შესაბამისი სამსახურების მხრიდან ექნება მყისიერი და უმკაცრესი რეაგირება.

ამავდროულად, კიდევ ერთხელ მოვუწოდებ დიპლომატიურ კორპუსს, საერთაშორისო და ადგილობრივ სადამკვირვებლო ორგანიზაციებს, მაქსიმალური ყურადღება მიაპყრონ ზუგდიდისკენ, რადგანაც ნათლად ჩანს, რომ როგორც განვლილი პერიოდის მანძილზე, ისე დღესაც, რიგი ძალები მიზანმიმართულად ცდილობენ ზუგდიდში დაძაბულობის ცენტრი შექმნან.

თქვენ ნახეთ აუდიოჩანაწერიც, რომელშიც კარგად ჩანს, რომ ნაციონალური მოძრაობის აქტივისტები ეგრეთწოდებულ ადუღებაზე და დესტაბილიზაციაზე საუბრობენ.

გასაგებია მათი მიზანი, ეს ჩანდა წინა პერიოდშიც, მაგრამ ჩვენ ამის უფლებას არავის მივცემთ. ამიტომ სადამკვირვებლო ორგანიზაციებს, ჩვენს საერთაშორისო დამკვირვებლებს, ვთხოვთ რომ განსაკუთრებული ყურადღება მიაპყრონ ზუგდიდს.

მოვუწოდებ ასევე ჩვენს აქტივს, არავის მისცენ საშუალება დისონანსი შეიტანონ პროცესში.

გარკვეული პროვოკაციული ფონი შეინიშნება მარნეულშიც ევროპული საქართველოს მხრიდან, ისინი ხელოვნურად ცდილობენ დაძაბონ სიტუაცია, თუმცა იქაც ყველაფერი ჯერჯერობით მშვიდად არის ჩვენი აქტივისტების და წარმომადგენლების მეშვეობით, ამისათვის მათ დიდი მადლობა

რაც შეეხება სიებს, მთელი დღის განმავლობაში თქვენ ნახეთ, რომ ნაცმოძრაობის წარმომადგენლების მედიასაშუალება  იქნება ეს თუ სხვა წარმომადგენლების მხრიდან, მიზანმიმართულ პროვოკაციულ მოქმედებებს აქვს ადგილი.

მათ ვერ ნახეს მოსყიდვის რეალური ფაქტი და შემდეგ ჯილდოც კი დააწესეს საიმისოდ, რომ ვიღაცას დაებრალებინა მოსყიდვა მეორე ადამიანისათვის ან რომელიმე ორგანიზაციისთვის.

მინდა საზოგადოებას, ჩვენს მოქალაქეებს კიდევ უფრო მეტი აქტიურობისკენ მოვუწოდო, საარჩევნო უბნებზე მისვლისა და სასურველი კანდიდატისთვის მხარდაჭერისკენ მოვუწოდო. არჩევნებზე მაღალი აქტივობის ჩვენება პირველივე ტურში გამარჯვებისთვის უმნიშვნელოვანესია. დარწმუნებული ვარ, ყველანი სწორ არჩევანს გავაკეთებთ და გამარჯვებას დღეს საღამოს ყველა ერთად ვიზეიმებთ", - თქვა მდინარაძემ.

დღეს საქართველოში მერების რიგგარეშე და საკრებულოს შუალედური არჩევნებია. ცენტრალური საარჩევნო კომისიის მონაცემებით, 410 საარჩევნო უბანზე 402 091 ამომრჩეველია რეგისტრირებული.

19 მაისის არჩევნებზე მონაწილე საარჩევნო სუბიექტების მიერ რეგისტრირებულია დაკვირვების უფლების მქონე 6 556 წარმომადგენელი.