საოლქო საარჩევნო კომისიებში 55 საჩივარია შესული

ცენტრალური საარჩევნო კომისიის ინფორმაციით, ამ დროისთვის საოლქო საარჩევნო კომისიებში ჯამში შესულია 55 საჩივარი, მათგან მარნეულში შევიდა 17 საჩივარი, ზესტაფონში დაიწერა ოთხი, ხულოში შვიდი, ხოლო ზუგდიდში - 21 საჩივარი. ერთი საჩივარია ოზურგეთის საარჩევნო ოლქში.

ანა მიქელაძემ მედიასთან რამდენიმე საუბნო საარჩევნო კომისიასთან დაკავშირებით გავრცელებულ ინფორმაციაზეც გააკეთა განცხადება და აღნიშნა, რომ როგორც ცნობილია, წყალტუბოსა და ტყიბულის 8 საარჩევნო უბანზე მიმდინარეობს ხმის მიცემის პროცესი ელექტონული მოწყობილობის საშუალებით. წყალტუბოს მე-15 საარჩევნო უბანზე ხმის მიცემის აპარატს ტექნიკური პრობლემა შეექმნა და დაახლოებით 15 წუთის განმავლობაში აპარატი ჩაანაცვლეს სარეზერვო მოწყობილობით; ამ დროისთვის კენჭისყრის პროცესი აღნიშნულ უბანზე შეუფერხებლად მიმდინარეობს.

ზუგდიდის #97-ე საარჩევნო უბნის კომისიის თავმჯდომარის ინფორმაციით, 3 სადამკვირვებლო ორგანიზაციის დამკვირვებელი ერეოდა და ხელს უშლიდა საქმიანობის განხორციელების პროცესში. მას შემდეგ, რაც აღნიშნული დამკვირვებლები არ დაემორჩილნენ კომისიის თავმჯდომარის მოწოდებას უბნის დატოვების შესახებ, თავმჯდომარე იძულებული გახდა გამოეძახებინა პოლიცია. დამკვირვებლები „პოლიტიკისა და სამართლის ობიექტის“, „სსიპ როპისა“ და „აპრიორის“ წარმომადგენლები არიან.

„ვინაიდან ამ საკითხთან დაკავშირებით დაისვა კითხვები, მინდა, განცხადება გავაკეთო გავრცელებული ინფორმაციის თაობაზე პირადობის მოწმობების გარეშე ხმის მიცემის შესახებ:

საარჩევნო უბნებზე ხმის მიცემის პროცესი მიმდინარეობს კანონმდებლობის სრული დაცვით. ყველა საარჩევნო უბანზე საუბნო საარჩევნო კომისიის წევრების მიერ მკაცრად მოწმდება ამომრჩეველთა პირადობის დამადასტურებელი მოწმობები და ხდება მათი იდენტიფიცირება ბიულეტენის გაცემამდე. ამასთან, არც ერთი დამოუკიდებელი სადამკვირვებლო ორგანიზაციის მხრიდან, ამომრჩევლის იდენტიფიცირების გარეშე ბიულეტენის გაცემასთან დაკავშირებით, არც ერთი ფაქტი არ დაფიქსირებულა“, - განაცხადა ანა მიქელაძემ.

დღეს საქართველოში მერების რიგგარეშე და საკრებულოს შუალედური არჩევნებია. ცენტრალური საარჩევნო კომისიის მონაცემებით, 410 საარჩევნო უბანზე 402 091 ამომრჩეველია რეგისტრირებული.

19 მაისის არჩევნებზე მონაწილე საარჩევნო სუბიექტების მიერ რეგისტრირებულია დაკვირვების უფლების მქონე 6 556 წარმომადგენელი.

საკრებულოს შუალედური არჩევნები საგარეჯოს, ახმეტის, ზესტაფონში, ჭიათურის, ტყიბულის, წყალტუბოსა და ოზურგეთის მუნიციპალიტეტში იმართება, მერს კი ხუთ მუნიციპალიტეტში მარნეულში, ზესტაფონში, ჭიათურაში, ზუგდიდსა და ხულოში აირჩევენ.