მდინარაძე ამომრჩეველს აქტიურობისკენ მოუწოდებს

ფრაქცია „ქართული ოცნების“ თავმჯდომარე მამუკა მდინარაძე ამომრჩევლებს აქტიურობისკენ მოუწოდებს. 

მდინარაძის თქმით, ეს არის გადამწყვეტი იმისათვის, რომ არჩევნები პირველივე ტურში „ქართული ოცნების“ კანდიდატების გამარჯვებით დამთავრდეს. 

„საერთო ჯამში არჩევნები მშვიდ ვითარებაში მიმდინარეობს. მიუხედავად ბევრ უბანზე დაგეგმილი პროვოკაციისა, რაც ნათლად ჩანს, სამართალდამცველები კარგად ართმევენ თავს მოვალეობას და დროულად აღკვეთეს ყველა პროვოკაციული მოქმედება, რაც ჩვენი მოწინააღმდეგეების მხრიდან იყო ინსპირირებული.

ამომრჩევლებს მოვუწოდებთ, კიდევ მეტი აქტიურობა გამოიჩინონ. უფრო მაღალი აქტიურობის შემთხვევაში არის დიდი შანსი, ყველა ოლქში, რომ არჩევნები პირველივე ტურში „ქართული ოცნების“ კანდიდატების გამარჯვებით დასრულდეს.

კიდევ ერთხელ უნდა დავამტკიცოთ, რომ გვაქვს არჩევნების დემოკრატიულად ჩატარების დიდი გამოცდილება, 2012 წლიდან მოყოლებული და დღევანდელი დღეც ამას დაადასტურებს.

ჩვენმა ოპონენტებმა ყველაფერი სცადეს, დაწყებული ე.წ. ჯილდოების დაწესებიდან, რომელიც დაბრალებისთვის იყო პრაქტიკულად, ეს საზოგადოებამ ძალიან კარგად გაიგო და აღიქვა, ისე გაგრძელებული სხვადასხვა სპეკულაციებით, და ასევე გაგრძელებული სიების შესახებ არასწორი ინფორმაციის გავრცელებით.

ეს იყო აბსოლუტურად არალეგიტიმურად გავრცელება ინფორმაციის, კიდევ უფრო სწორად, არასწორი ინფორმაციის გავრცელება, რადგან ჩვენს კოორდინატორებს, ჩვენს წარმომადგენლებს ჰქონდათ ყველა მონაცემი, გარდა პირადი მონაცემისა.

მათ ყველა მონაცემი ჰქონდათ აბსოლუტურად ლეგიტიმურად და პირადი მონაცემები იმ სიებში, რომელიც მათ ხელთ ჰქონდათ, ნამდვილად არ იყო, ეს ნახა თითოეულმა ჟურნალისტმა მათ შორის მათ, რომელიც აშუქებს მოვლენებს საარჩევნო უბნებიდან. 

ყველაფერს გავაკეთებთ, რომ საარჩევნო დღე დამთავრდეს რეალურად ისე, რომ დემოკრატიის ხარისხთან დაკავშირებით არანაირი პრობლემა არ იყოს და არანაირი კითხვის ნიშანი არ დაისვას.

კიდევ ერთხელ მოუწოდებთ ამომრჩევლებს, მათი აქტიურობა არის გადამწყვეტი იმისათვის, რომ არჩევნები პირველივე ტურში ჩვენი კანდიდატების გამარჯვებით დამთავრდეს და პირველივე ტურში ვიზეიმოთ გამარჯვება დღეს, 20:00 საათის შემდეგ“, - განაცხადა მდინარაძემ პარტიის ოფისში გამართულ ბრიფინგზე.

დღეს საქართველოში მერების რიგგარეშე და საკრებულოს შუალედური არჩევნებია. ცენტრალური საარჩევნო კომისიის მონაცემებით, 410 საარჩევნო უბანზე 402 091 ამომრჩეველია რეგისტრირებული.