„ნაციონალური მოძრაობის“ სამომავლო გეგმები ცნობილია

„გაერთიანებული ოპოზიციის“ ზუგდიდის მერობის უკვე ყოფილმა კანდიდატმა სანდრა რულოვსმა თავისი შტაბის წევრებთან შეხვედრა გამართა. მან მომხრეებსა და შტაბის წევრებს მადლობა გადაუხადა.

"გუშინდელი ე.წ. არჩევნების ჩატარების შემდეგ გადავწყვიტეთ, რომ საპროტესტო ტალღა უნდა დაიწყოს ზუგდიდიდან, გადაედება მთელს ქვეყანას და დამთავრდება შუშის სასახლესთან, ივანიშვილის სახლთან. ჩვენ მოვითხოვთ მის წასვლას ამ ქვეყნიდან. უნდა დაგვანებოს თავი, რადგან მისი მოქმედება, მისი ე.წ. მმართველობა არის ყველასთვის ყველანაირ ზღვარს გადასული. ჩვენ ივანიშვილს აღარ უნდა ჩავატარებინოთ არჩევნები, რადგან არ შეუძლია, ჩვენ ყველანი უნდა დავირაზმოთ მთელი ქვეყნის მასშტაბით. ყველანი ერთად უნდა მივიდეთ თბილისამდე და უნდა მოვიშოროთ ივანიშვილი ამ ქვეყნიდან. ეს საპროტესტო ტალღა უკვე დაწყებულია და ჩვენს მეგობრებთან, გუნდთან ერთად ჩამოვყალიბდებით რომელი რეგიონებიდან დავიწყებთ, მაგრამ ყველგან ვიქნებით და ხალხის ძალას ვაჩვენებთ ივანიშვილს, რადგან არჩევნები ამ ქვეყანაში არ ტარდება. ივანიშვილის გარეშე უნდა გავაგრძელოთ ამ ქვეყნის გადარჩენა“, - აღნიშნა სანდრა რულოვსმა.

ამასთან, ჟურნალისტებმა სანდრა რულოვსს ნიკა მელიას განცხადებაზეც ჰკითხეს, რომლის მიხედვითაც, მელია ამბობდა, რომ სამომავლო სტრატეგიაზე ერთიანი შეთანხმება უნდა არსებობდეს და მუდმივად რევოლუციაზე საუბარი არ უნდა იყოს. როგორც სანდრა რულოვსმა აღნიშნა, ყველას აქვს თავისი არჩევანი.

"არ მომისმენია, მარტო გამიგია და მინდა ვთქვა, ყველას აქვს თავისი არჩევანი. მინდა, რომ ხალხთან ერთად დავიბრუნოთ ეს ქვეყანა, ეს ქვეყანა არის დაკარგული, რადგან არჩევნები არ ტარდება ამ ქვეყანაში. რაც მთავარია, ხალხში არის შეთანხმება, რომ ივანიშვილი ამ ქვეყანაში არ უნდა იყოს“, - განაცხადა სანდრა რულოვსმა.

ზუგდიდში ყველა საარჩევნო უბნის დათვლის შემდეგ, „ქართული ოცნების“ კანდიდატმა გიორგი შენგელიამ 54.18 პროცენტით გაიმარჯვა. ინფორმაციას ცენტრალური საარჩევნო კომისია ავრცელებს.

ამავე ინფორმაციით, „ნაციონალური მოძრაობის“ ოპოზიციური გაერთიანების ზუგდიდის მერობის კანდიდატ სანდრა რულოვსს ხმათა 42.48% აქვს. სხვა კანდიდატებმა ერთ პროცენტზე ნაკლები მოაგროვეს. 107 უბნიდან მონაცემები დათვლილია ყველა მათგანში.