მელია საპროტესტო აქციებზე: ფუჭი გასროლების განხორციელება არ შეიძლება

„ნაციონალური მოძრაობის“ პოლიტიკური საბჭოს თავმჯდომარის ნიკა მელიას განცხადებით, ოპოზიციას შეცდომის დაშვების უფლება არ აქვს და ფართომასშტაბიანი საპროტესტო აქცია მხოლოდ იმ შემთხვევაში უნდა ჩატარდეს, თუ ამ აქციას ხელისუფლების შეცვლა მოყვება. ამის შესახებ მელიამ ტელეკომპანია „იმედის“ ეთერში, გადაცემაში „პირისპირ“ განაცხადა.

„რა თქმა უნდა, აზრთა სხვადასხვაობა არის. ნიკა მელია არასოდეს ყოფილა აქციების წინააღმდეგი. ვინმეს თუ აქცია ჩაუტარებია, ვინმე თუ წინა ხაზზე ყოფილა ამ წლების განმავლობაში, ერთ-ერთი ვიყავი მე. ყოველთვის ვამბობდი, რომ აქციები მნიშვნელოვანია - მოწინააღდეგეს ყოველდღიურად ამ ფორმატშიც უნდა ვებრძოლოთ, საკრებულოების ფორმატშიც და პარლამენტის ფორმატშიც. მაგრამ ერთია მცირე ზომის ყოველდღიური აქციები, რათა ხელისუფლება პრესინგის ქვეშ ამყოფო, და მეორეა, როდესაც კონკრეტულ თარიღს დაკვიდებთ და დედაქალაქში ფართომასშტაბიან აქციას ვმართავთ. 

შორს არ არის ის დღე, როდესაც ივანიშვილი დამარცხდება, ამიტომ შეცდომის დაშვების უფლება არ გვაქვს. თბილისში დიდი, ფართომასშტაბიანი აქცია უნდა ნიშნავდეს იმას, რომ ბიძინა ივანიშვილი მარცხდება. არ უნდა მოხდეს ისე, რომ თბილისში, რუსთაველის გამზირზე ან შუშის სასახლესთან შევიკრიბოთ, და მომდევნო დღეებში ივანიშვილი კვლავ იყოს ხელისუფლებაში. ფუჭი გასროლების განხორციელება არ შეიძლება“, - განაცხადა მელიამ.

რაც შეეხება ყოფილი პრეზიდენტის მიხეილ სააკაშვილის განცხადებას ოპოზიციის სამომავლო გეგმებთან დაკავშირებით, მელიას თქმით, განცხადებების გაკეთებისას სიფრთხილეა საჭირო. 

მელიას თქმით, არ შეიძლება, ემოციურ ფონზე გაკეთდეს განცხადებები, რადგან ეს ივანიშვილის წისქვილზე ასხამს წყალს და საჭიროა კოორდინაცია ოპოზიციაში. 

ამასთან, ჟურნალისტებმა სანდრა რულოვსს ნიკა მელიას განცხადებაზეც ჰკითხეს, რომლის მიხედვითაც, მელია ამბობდა, რომ სამომავლო სტრატეგიაზე ერთიანი შეთანხმება უნდა არსებობდეს და მუდმივად რევოლუციაზე საუბარი არ უნდა იყოს. როგორც სანდრა რულოვსმა აღნიშნა, ყველას აქვს თავისი არჩევანი.

„არ მომისმენია, მარტო გამიგია და მინდა ვთქვა, ყველას აქვს თავისი არჩევანი. მინდა, რომ ხალხთან ერთად დავიბრუნოთ ეს ქვეყანა, ეს ქვეყანა არის დაკარგული, რადგან არჩევნები არ ტარდება ამ ქვეყანაში. რაც მთავარია, ხალხში არის შეთანხმება, რომ ივანიშვილი ამ ქვეყანაში არ უნდა იყოს“, - განაცხადა სანდრა რულოვსმა.

19 მაისს საქართველოში პარლამენტისა და საკრებულოს შუალედური არჩევნები, ასევე მერების რიგგარეშე არჩევნები ჩატარდა. ცესკოს მონაცემებით, ზუგდიდის მერის არჩევნებში „ქართული ოცნების“ კანდიდატმა გიორგი (გეგა) შენგელიამ ხმათა 54,19%-ით დაამარცხა „ნაციონალური მოძრაობის“ კანდიდატი სანდრა რულოვსი, რომელმაც ხმათა 43,28% მიიღო.