კალაძე: ბაღებში კვებასთან დაკავშირებით არანაირი პრობლემა არ არსებობს

თბილისის მერის, კახა კალაძის განცხადებით, მიუხედავად იმისა, რომ მერიამ კომპანია „ნილთან“ ხელშეკრულება გაწყვიტა, საბავშვო ბაღების კვების რაციონის კალორაჟი საერთაშორისო სტანდარტებს შეესაბამებოდა. ამის შესახებ მან დედაქალაქის მთავრობის სხდომაზე განაცხადა.

„ორი დღის წინ ჩვენ გავწყვიტეთ ხელშეკრულება კომპანია „ნილთან“, რომელიც კვებით ამარაგებდა ბაღებს. ეს კომპანია ჯეროვნად ასრულებდა თავის უფლებამოსილებას, თუმცა ბოლო ორი კვირის განმავლობაში ჰქონდათ სერიოზული ხარვეზები მოწოდებასთან დაკავშირებით. ჩვენ არაერთხელ გავაფრთხილეთ, რომ გამოესწორებინათ, ბოლოს რამდენჯერმე იყო შეხვედრები და მიმართვა ჩვენი მხრიდან, რომ დაფიქსირებული ხარვეზები და ეს ყველაფერი, რაც კატეგორიულად მიუღებელი იყო ჩვენთვის, გამოესწორებინათ.

თუმცა კომპანიამ ეს ვერ შეძლო და ჩვენ გავწყვიტეთ ხელშეკრულება. ამის მიუხედავად, მინდა აღსაზრდელების მშობლებს ვუთხრა ყოველგვარი პასუხისმგებლობით და გულწრფელობით, რომ არანაირი პრობლემა არ არსებობს კვებასთან დაკავშირებით. დღეს კვებით მომარაგებას უზრუნველყოფენ თავად ბაღები, სანამ ხელშეკრულება გაფორმდება. ჩვენ გვაქვს რამდენიმე კომპანიასთან მოლაპარაკებები დაჩქარებული წესით და ვფიქრობთ, რამდენიმე დღეში შევძლებთ ხელშეკრულების გაფორმებას და ჩვეულებრივად გაგრძელდება კვების მიწოდება შერჩეული კომპანიის მხრიდან.

დღეს ამას ყოველგვარი პრობლემების გარეშე ბაღები ახორციელებენ. თქვენ იცით, რომ კვების რაციონზე ბევრი ვიმუშავეთ, ამაში დაგვეხმარნენ საერთაშორისო ორგანიზაციები, ჩემი მოადგილე და ბაგა-ბაღების სააგენტოს ხელმძღვანელიც იყვნენ ჩართული და შემიძლია ვთქვა, რომ კალორაჟი შეესაბამებოდა საერთაშორისო სტანდარტებს. ამიტომ მშობლებს მინდა ვუთხრა, რომ ამ მიმართულებით პრობლემა არ ყოფილა და არც იქნება სამომავლოდ. ჩვენთვის ბავშვების ჯანსაღი კვება არის პრიორიტეტი“, - განაცხადა კალაძემ.