ომბუდსმენმა ადამიანის უფლებების მდგომარეობის კუთხით მიღწეული პროგრესი და გამოწვევები ჩამოთვალა

სახალხო დამცველი ნინო ლომჯარია ადამიანის უფლებათა კომიტეტის სხდომაზე ანგარიშს წარადგენს, რომელიც ადამიანის უფლებათა მდგომარეობის მხრივ ქვეყანაში არსებულ როგორც პროგრესს, ასევე არსებულ გამოწვევებსა და გადაუჭრელ საკითხებს ეხება.

როგორც ნინო ლომჯარიამ განაცხადა, პროგრესად შეიძლება ჩაითვალოს ის, რომ შინაგან საქმეთა სამინისტრო ითვალისწინებს ომბუდსმენის მიერ გაცემულ რეკომენდაციებს. ასევე ლომჯარიას თქმით, გაუმჯობესებულია ვითარება დროებითი მოთავსების იზოლატორებში, ქალთა მიმართ და ოჯახში ძალადობის მიმართულებით:

"ნამდვილად გაუმჯობესებულია საქმიანობა სამართალდამცველი ორგანოების, ასევე სიძულვილით მოტივირებული დანაშაულები იდენტიფიცირების და გამოძიების დაწყების მაჩვენებლები", - განაცხადა ნინო ლომჯარიამ.

რაც შეეხება არსებულ გამოწვევებს, სახალხო დამცველის განცხადებით, გარკვეულ შემთხვევებში გამოძიება არაეფექტურია ხოლმე, ან ჭიანურდება:

"არ გვაქვს სათანადო ინფორმაცია პროკურატურისგან, რომ შევაფასოთ რამდენად ეფექტურად მიმდინარეობს გამოძიება. ეს შეხება თითქმის ყველა საქმეს, რასთან დაკავშირებითაც არსებობს მაღალი საზოგადოებრივი ინტერესი.

ვფიქრობთ, რომ მიუხედავად იმისა, რომ კანონმდებლობის დონეზე გარკვეული პროგრესი ნამდვილად გვაქვს შრომის უსაფრთხოების თვალსაზრისით, ამ მიმართულებით ვითარება პრაქტიკაში არ გაუმჯობესებულა.

გასულ წელს უფრო მეტი ადამიანი დაიღუპა სამუშაო ადგილებზე, ვიდრე წინა წლების განმავლობაში, რაც ნიშნავს იმას, რომ პრაქტიკაში კანონმდებლობის აღსრულების ეფექტური მექანიზმები არ არსებობს. არსებობს პრობლემები რაც წლიდან წლამდე არის უცვლელი, ეს არის შეზღუდული შესაძლებლობების მქონე პირთა უფლებები, ეს არის რელიგიური თუ ეთნიკური უმცირესობების უფლებების დაცვის საკითხები, განსაკუთრებით მწვავედ დგას მათი ინტეგრაცია საზოგადოებრივ ცხოვრებაში", - განაცხადა ნინო ლომჯარიამ.

საქართველოს პარლამენტის ადამიანის უფლებათა დაცვისა და სამოქალქო ინტეგრაციის კომიტეტში სახალხო დამცველი ნინო ლომჯარია წლიურ ანგარიშს წარადგენს. ომბუდსმენის აპარატს დაახლოებით 350 რეკომენდაცია აქვს წარდგენილი.