განათლების მინისტრი პილოტირებული პროექტების აშშ-ში წარდგენას გეგმავს

განათლების მინისტრი მიხეილ ბატიაშვილი პილოტირებული პროექტების ამერიკის შეერთებულ შტატებში წარდგენას გეგმავს.

მიხეილ ბატიაშვილის თქმით, მას შემდეგ რაც უწყება საქართველოში საერთაშორისო მხარდაჭერით დაბრუნდება, მიმდინარე წლის შემოდგომაზე სკოლებსა და უნივერსიტეტებში ტექნოლოგიური ცოდნის დანერგვა დაიწყება. ამის შესახებ მინისტრმა “ბიზნესის და ტექნოლოგიების უნივერსიტეტში” “გლობალური სტარტაპ ფონდის” ოფიციალურ გახსნაზე სიტყვით გამოსვლისას განაცხადა და პროექტის უპრეცენდენტო მნიშვნელობაზე ისაუბრა.

მინისტრის თქმით, ეს იქნება საუკეთესო ნიმუში, თუ როგორ შეიძლება ქართველი ახალგაზრდები გადამზადდნენ, მიიღონ თანამდეროვე ცოდნა ტექნოლოგიების სფეროში და რაც ყველაზე მნიშვნელოვანია, ჩაერთონ ისეთ საერთაშორისო და გლობალურ პროექტებში, რომლებშიც დღეს ათეულობით ადამიანი მაღალანაზღაურებად სამსახურშია დასაქმებული.

„მოხარული ვართ, რომ ფუძნდება ფონდი, რომელიც იქნება საუკეთესო ნიმუში იმისა, როგორ შეიძლება ცოდნა იქცეს წარმატებულ პროექტად და საქართველოში დაბადებული პროექტი გახდეს აღიარებული.

ამ თვეების განმავლობაში, ჩვენ ვმუშაობდით კონკრეტულ სკოლაში და საუნივერსიტეტო პროგრამაზე, თუ როგორ ვხედავთ ჩვენ მომავალ საქმიანობას, რომელმაც უნდა მოგვიტანოს მაღალი დონის და ხარისხის განათლება. ჩვენ რეალურად არ გვაქვს მოსაცდელი დრო, ამიტომ ისეთი ნაბიჯები უნდა გადავდგათ, რომელიც ქართულ განათლებას აქცევს ხვალინდელ დღედ. ჩვენ, სამინისტროში ქართველ და უცხოელ ექსპერტებთან ერთად, დავასრულეთ ერთი ეტაპი, რომელიც სწორედ ხვალინდელ განათლებაზე, ტექნოლოგიებზე და მომავალი თაობების განვითარებაზეა ორიენტირებული,“ - განაცხადა მიხეილ ბატიაშვილმა.

მისი თქმით, ქართული მხარე შტატებში  სილიკონ ველის ავტორიტეტულ ორგანიზაციებთან გამართავს შეხვედრებს.