პარლამენტში პრემიერმინისტრს ინტერპელაციის წესით უსმენენ. მთავარი

პარლამენტში პრემიერმინისტრს ინტერპელაციის წესით უსმენენ. სხდომა ხმაურით გაიხსნა. თავდაპირველად დეპუტატებმა პროცედურებზე იკამათეს, თუმცა ოპოზიციის წარმომადგენლებმა სხვადასხვა რეპლიკით სიტყვა პრემიერსაც რამდენჯერმე შეაწყვეტინეს. 

დამოუკიდებელმა დეპუტატებმა ლევან გოგიჩაიშვილმა და გედევან ფოფხაძემ პარლამენტის სხდომათა დარბაზი, სადაც ინტერპელაციის წესით პრემიერმინისტრის მოსმენა მიმდინარეობს, პროტესტის ნიშნად დატოვეს. გოგიჩაიშვილმა განაცხადა, ქვეყნის პრემიერმინისტრი იმ რეალურ გამოწვევებზე არ ლაპარაკობს, რომელიც მოსახლეობას აწუხებს. მისივე შეფასებით, დღევანდელი გამოსვლა სადღეგრძელოებს ჰგავს.

"ევროპული საქართველოს" წევრმა ოთარ კახიძემ პარლამენტში კითხვის დასმის დროს ლარის გაუფასურებაზე გაამახვილა ყურადღება და აღნიშნა, რომ ქვეყანას ჰყავს მთავრობა, რომლის მმართველობის პირობებში ეკონომიკური ზრდის ტემპი განახევრდა.

"ამ პარლამენტმა თქვენს წინამორბედს, თქვენმა ერთ-ერთმა ლიდერმა, ფრაქციის თავმჯდომარემ კითხვა დაუსვა - არის თუ არა განსაზღვრული მთავრობაში ის მიჯნა, რომლის ქვემოთაც ლარი უკვე აღარ გამყარდებაო. ალბათ, გახსოვთ, ხომ?! ალბათ, იცით, რომ ლარი უკვე გაუფასურების პიკზეა. ამ გაუფასურებულ ვალუტაში ინახავთ ჩვენი მოქალაქეებისგან იძულებით ამოღებულ ფულს, რომელიც თქვენ, თურმე უკეთესად იცით, სად წაიღოთ. ამ დროს, საინვესტიციო საბჭოც არ არის შექმნილი, რომელმაც უნდა დააბანდოს ეს თანხა. პარალელურად, 700 000-ზე მეტ სესხზე ჩვენს მოქალაქეებს უარი უთხარით, ფინანსებზე წვდომა შეუზღუდეთ. თქვენ ხართ მთავრობა, რომლის დროსაც ეკონომიკური ზრდის ტემპი განახევრდა“, - განაცხადა კახიძემ.

საუბარი შეეხო საბანკო რეგულაციებსაც, რომელზეც პრემიერმა დაწვრილებით ილაპარაკა. "ეს იყო რეგულაციები ფინანსური სექტორის მისამართით და არა საბანკო რეგულაციები. მოდი, ყველამ კარგად გავიხსენოთ, ჯერ კიდევ ჩემი ინიციატივები ფინანსთა მინისტრობის დროს და შემდეგ უკვე მთავრობაში, საქართველოს მთავრობის ინიციატივები შემდეგში მდგომარეობდა - პირველი, რომ დაგვეწესებინა ჭერი საპროცენტო განაკვეთებზე და არ ყოფილიყო 700 და 800 პროცენტიანი სესხები საქართველოში, ის უსამართლო თამაშის წესები, რომელიც თქვენ დაგვიტოვეთ.  მეორე - ყოფილიყო ჯარიმებზე და საურავებზე მაქსიმალური ზღვარი, რომ ადამიანს სახლი არ დაეკარგა ამის გამო. შემოვიდა ზღვარი 200 000 ლარზე, რომ ყოფილიყო ლარიზაციის წახალისება, რომ ყოფილიყო რეალური შედეგი ჩვენი მოქალაქეებისთვის. მინდა შეგახსენოთ, რომ დღეს ჩვენს საბანკო სექტორში გაჩნდა პროდუქტი -7 პროცენტიანი სესხი ლარში. მინდა შეგახსენოთ თქვენს პერიოდში საპროცენტო განაკვეთი რამდენი იყო? 21 პროცენტი, გაიხსენეთ, სამჯერ შემცირდა საპროცენტო განაკვეთები.

რეალობის მოსმენა უნდა ისწავლოთ მეგობრებო - არსებობს წინსვლები და არსებობს გამოწვევები. მე სამსახიობო ნიჭში სამწუხაროდ, კონკურენციაში ვერ შევალ ზოგიერთ წარმომადგენელთან, ამიტომ, გთხოვთ, შინაარსზე გაამახვილეთ ყურადღება, თუ გაქვთ შინაარსობრივი შეკითხვები", - თქვა ბახტაძემ.

პრემიერს "ოთხოზორია-ტატუნაშვილის სიაზეც მოუხდა განმარტების გაკეთება.

"ოთხოზორია-ტატუნაშვილის სიაში“ ადამიანების გულის მოსაფხანად დამატება შედეგს არ მოიტანს, ჩვენ ეს სია კონკრეტული შედეგისთვის გვჭირდება, - ასე უპასუხა საქართველოს პრემიერმინისტრმა მამუკა ბახტაძემ დეპუტატ სერგი კაპანაძის კითხვას “ოთხოზორია-ტატუნაშვილის” სიაში რუსეთის მოქალაქეების შეყვანასთან დაკავშირებით.

მთავრობის მეთაურმა აღნიშნა, რომ იმ ადამიანების ბრალეულობის სტანდარტი, რომლებიც სიაში შევლენ, მაღალი უნდა იყოს, რათა საერთაშორისო თანამეგობრობას აღნიშნული სანქციების რეალურ ცხოვრებაში გატარების საშუალება ჰქონდეს.

„პარლამენტში, მათ შორის თქვენი მონაწილეობით მხარდაჭერილი რეზოლუცია გულისხმობს, რომ ამ სიაში ჩვენ შეგვიძლია შევიყვანოთ ადამიანები, რომლებიც არიან ან უკვე ბრალდებული, ან მსჯავრდებული. თუ ადამიანი მსჯავრდებული ან ბრალდებულია, რა მნიშვნელობა აქვს, ვისი მოქალაქეა. თუ მას აქვს სასტიკი დანაშაული ჩადენილი ჩვენი მოქალაქეების წინაშე, ის უნდა იყოს შესული ამ სიაში. ასეა? ასე, რომ მოქალაქეობას თავი დავანებოთ. ყველა ქვეყნის მოქალაქე, ვისაც ეს აქვს გაკეთებული, უნდა შევიდეს ამ სიაში. რატომ, რისთვის გვინდა, სიაში ადამიანების შეყვანა? რომ გული მოვიფხანოთ პოლიტიკურად და რეალურად მერე იმპლემენტაციის საშუალება არ მივცეთ ჩვენს მეგობრებს?! ჩვენ ხომ საერთაშორისო პარტნიორები მხარდაჭერა გვჭირდება იმისთვის, რომ მოხდეს სანქციების რეალურ ცხოვრებაში გატარება. შესაბამისი ორგანოები მუშაობდნენ და დღესაც მუშაობენ. არის ლეგიტიმური მოლოდინი, რომ უახლოეს მომავალში, მათ შორის იმ ეპიზოდზე, რომელიც თქვენ დაასახელეთ, მოხდეს ამ სიის გაფართოება. იქნება მაღალი სტანდარტი, რომელიც საშუალებას მისცემს ჩვენს მეგობრებს, გაატარონ ეს სანქციები რეალურ ცხოვრებაში. სხვანაირად, თუ გულის მოფხანა გვინდა, რომ სიაში უბრალოდ ჩავწეროთ ადამიანები და მერე არაფერი მოხდეს, ეს საქმეს არ მოიტანს. ჩვენ ეს სია გვინდა კონკრეტული შედეგისთვის“, - განაცხადა პრემიერმინისტრმა.

მამუკა ბახტაძე განათლების საკითხებსაც შეეხო და აღნიშნა, რომ „ნაციონალურმა მოძრაობამ“ და „ევროპულმა საქართველომ“ მხარი არ დაუჭირა ეროვნულ იდეას - განათლებას და საქართველოს მომავალს.

„მინდა საზოგადოებამ იცოდეს, რომ „ნაციონალურმა მოძრაობამ“ და „ევროპულმა საქართველომ“ მხარი არ დაუჭირა ეროვნულ იდეას - განათლებას და საქართველოს მომავალს", - თქვა პრემიერმა. 

მთავრობის მეთაურმა პოლიტიკურ ოპონენტებს მოუწოდა, დადგნენ ვიწრო პოლიტიკური ინტერესების მიღმა და მხარი დაუჭირონ ეროვნულ იდეას. „ორი დღის წინ ამ დარბაზში ძალიან მნიშვნელოვან კანონმდებლობას ეყარა კენჭი. ეროვნულ იდეას - განათლებას. მე მსურს ჩვენი პოლიტიკური გუნდის წევრებს მადლობა გადავუხადო მხარდაჭერისთვის. ამავე დროს გითხრათ, რომ ეს იყო საკითხი, რომელზეც მქონდა იმედი, რომ შეძლებდით და გამოხვიდოდით ვიწრო პარტიული ინტერესების ჩარჩოდან. ეს ეხება ყველას, როგორც საქართველოს პარლამენტში წარმოდგენილ პოლიტიკურ ძალებს, ასევე პარლამენტს გარეთ. მინდა საზოგადოებამ იცოდეს, რომ „ნაციონალურმა მოძრაობამ“ და „ევროპულმა საქართველომ“ მხარი არ დაუჭირა ეროვნულ იდეას, განათლებას და საქართველოს მომავალს. მე მინდა ყველა მასწავლებელმა, მოსწავლემ, მათმა მშობლებმა, პროფესორებმა, მეცნიერებმა იცოდნენ, რომ ბიუჯეტის მეოთხედის გამოყოფას განათლებისთვის, ქვეყნის მომავლისთვის თქვენ მხარი არ დაუჭირეთ. მინდა გითხრათ, რომ ეს არის ძალიან დიდი შეცდომა. ბატონო რომან, თქვენ, როგორც ნაციონალური მოძრაობის ფრაქციის ხელმძღვანელი იყავით ერთადერთი, რომელიც წახვედით წინააღმდეგ. თქვენ გაქვთ მეორე შანსი, რომ მეორე და მესამე მოსმენაზე მიიღოთ ღირსეული გადაწყვეტილება და მხარი დაუჭიროთ საქართველოს მომავალს. იმ მომავალს, რომელიც საშუალებას მოგვცემ დავძლიოთ ყველაფერი ის, რაზეც დღეს ჩვენ ვისაუბრეთ. ყველას მოვუწოდებ, დადგეს ვიწრო პოლიტიკური ინტერესების ჩარჩოების მიღმა. დადგეს იქ, სადაც ჩვენი ეროვნული ინტერესებია. მხარი დავუჭიროთ ეროვნულ იდეას, განათლებას, საქართველოს მომავალს და ერთიან წელში გამართულ საქართველოს“, - განაცხადა მამუკა ბახტაძემ.

საქართველოს პარლამენტში დღესვე ინტერპელაციის წესით ჯანდაცვის მინისტრ დავით სერგეენკოსა და ცენტრალური საარჩევნო კომისიის თავმჯდომარე თამარ ჟვანიას მოუსმენენ.