აგარაში ქმრის მიერ დაჭრილ ქალს 13 ჭრილობა აქვს და მისი მდგომარეობა კრიტიკულად მძიმეა

აგარაში ქმრის მიერ დაჭრილი ქალის მდგომარეობა კრიტიკულად მძიმეა. ის გორში კლინიკა "გორმედში" მართვით სუნთქვაზეა. ქალი გორში მას შემდეგ გადაიყვანეს, რაც ქარელში ოპერაცია ჩაუტარეს და ექიმებმა მდგომარეობა დაუსტაბილურეს. 

"გორმედის" კლინიკური დირექტორის, დავით ყაზაიშვილის თქმით, პაციენტის მდგომარეობა კრიტიკულად მძიმეა. 

"მას სხეულის სხვადასხვა არეში ბასრი საგნით მიყენებული 13 ჭრილობა აღენიშნება. დაზიანებები მიყენებული აქვს კისრის, სახის, გულ-მკერდის წინა და უკანა ზედაპირის არეში, ასევე მუცლის არეში რამდენიმე შემავალი ჭრილობაა. პაციენტს დაზიანებული აქვს კუჭი და ღვიძლი. გადაუდებელი ქირურგიული ოპერაცია ჩაუტარდა, თუმცა, მისი მდგომარეობა კვლავ კრიტიკულია. ახლა არის მართვით სუნთქვაზე ხელოვნურ ძილში", - თქვა "გორმედის" კლინიკურმა დირექტორმა. 

აგარაში მომხდარი მკვლელობის შემდეგ მედიასთან კომენტარი მოკლულის სიმამრმა გააკეთა. როგორც გივი ოსაძე ამბობს, მკვლელობა მცირეწლოვანი ბავშვის თვალწინ მოხდა.

პოლიციამ აგარაში კაცის მკვლელობის ბრალდებით ერთი ადამიანი დააკავა. გამოძიება განზრახ მკვლელობის, ასევე, ორი ან მეტი პირის და ოჯახის წევრის მიმართ დამამძიმებელ გარემოებაში ჩადენილ განზრახ მკვლელობის მცდელობის ფაქტებზე, საქართველოს სსკ-ს 108-ე მუხლით, 11 პრიმა 19-109-ე მუხლის მე-2 ნაწილის „ვ“ ქვეპუნქტით და მე-3 ნაწილის „ა“ ქვეპუნქტით მიმდინარეობს.