ნუკრი ქანთარია: მომავალ პარლამენტში ჩემი ყოფნის აუცილებლობას ვერ ვხედავ

საპარლამენტო უმრავლესობის წევრი ნუკრი ქანთარია სახელისუფლო გუნდში მიმდინარე განახლების პროცესთან დაკავშირებით საკუთარ პოზიციას Facebook-ზე ავრცელებს. როგორც ნუკრი ქანთარია აცხადებს, "ამ ეტაპისთვის მომავალ საპარლამენტო შემადგენლობაში მისი ყოფნის აუცილებლობას ვერ ხედავს".

ქანთარიას თქმით, ეს იმიტომ, რომ ორი მოწვევის პარლამენტის წევრია და მიაჩნია, რომ ახალი ხალხია საჭირო.

"მინდა ჩემი პოზიცია სახელისუფლო გუნდში მიმდინარე განახლების პროცესთან დაკავშირებით კიდევ ერთხელ განვმარტო, რათა საზოგადოების და მედიის მხრიდან სხვადასხვაგვარად არ იყოს აღქმული და ინტერპრეტირებული. მიმაჩია, რომ ნებისმიერი გუნდი, მით უფრო სახელისუფლო, მუდმივად საჭიროებს განახლებას. ეს მნიშვნელოვანია ქვეყნის განვითარებისა და დემოკრატიული პროცესის გაჯანსაღებისთვის. იმედი მაქვს, განახლების პროცესი, რომელიც მმართველ გუნდში უკვე დაწყებულია და ამ მიმართულებით აქტიური ნაბიჯებიც გადაიდგა, წარმატებით დასრულდება.

ამ ეტაპისთვის მომავალ საპარლამენტო შემადგენლობაში ჩემი ყოფნის აუცილებლობას ვერ ვხედავ იქიდან გამომდინარე, რომ ორი მოწვევის პარლამენტის წევრი ვარ და მიმაჩნია, რომ ახალი ხალხია საჭროა. ვიმეორებ, ამ ეტაპზე ვერ ვხედავ ჩემს საჭიროებას ახალ პარლამენტში, თუმცა, ეს არამც და არამც არ ნიშნავს „ქართული ოცნების“ გუნდის დატოვებას ან პასიურ პოზიციაში გადასვლას. პირიქით, ვფიქრობ, სწორედ მრავალწლიანი გამოცდილებით და დაგროვილი ცოდნით აქტიურად ჩავერთო პარტიის განახლების და, ზოგადად, მმართველი გუნდის გაძლიერების პროცესში. ვარ და ვიქნები ბიძინა ივანიშვილის თანამოაზრე და მასთან ერთად ვაპირებ ბრძოლის გაგრძლებას. შევხედოთ მოვლენებს, თუ იქნება სტაბილური პოლიტიკური გარემო, ასეთ შემთხვევაში ვერ ვხედავ აუცილებლობას და საჭიროებას, მომავალ საპარლამენტო არჩევნებში მონაწილეობის. მაგრამ თუ გამწვავდა სიტუაცია და გუნდმაც და მეც დავინახეთ, რომ საჭიროა საპარლამენტო პროცესში ჩემი კვლავ მონაწილეობა, დავდგები იქ, სადაც გუნდის და ქვეყნის ინტერესები მოითხოვს", - წერს ნუკრი ქანთარია Facebook-ზე.

"ქართული ოცნების" ლიდერები დიდი ხანია საუბრობენ იმაზე, რომ 2020 წლის საპარლამენტო არჩევნებისთვის პარტიაში ახალი სახეები იქნებიან და რომ არჩევნებისთვის მზადების პროცესი უკვე დაწყებულია.