ლევან იზორია ბრიუსელში ნატოს გენერალურ მდივანს შეხვდა

თავდაცვის მინისტრი ლევან იზორია ბრიუსელშია, სადაც ჩრდილოატლანტიკური ალიანსის შტაბბინა ნატოს წევრი და პარტნიორი ქვეყნების თავდაცვის მინისტრების შეხვედრებს მასპინძლობს. ლევან იზორია დღეს ნატოს გენერალურ მდივან იენს სტოლტენბერგსა და მის მოადგილეს როუზ გოტმიულერს შეხვდა. ინფორმაციას თავდაცვის სამინისტრო ავრცელებს.

თავდაცვის მინისტრმა ჩრდილოატლანტიკური ალიანსის ხელმძღვანელ პირებთან ნატო-საქართველოს თანამშრომლობის მიმდინარე საკითხები და სამომავლო გეგმები განიხილა. ლევან იზორიას განცხადებით, ძირითადი აქცენტი შავი ზღვის რეგიონში უსაფრთხოების განმტკიცების მიზნით ნატოს მეტ ჩართულობაზე გაკეთდა.

„ჩვენ განვიხილავთ თანამშრომლობის გაფართოების შესაძლებლობებს, რომელიც მოიცავს თანამშრომლობის უფრო ყოვლისმომცველ სპექტრს. განსაკუთრებით ეს ეხება ერთობლივი წვრთნების კომპონენტს. ასევე, ახალ ელემენტებს საზღვაო, ამფიბიური, კიბერუსაფრთხოების ჩართულობა და ინტეგრირება ერთობლივ სწავლებებში. ჩვენ უფრო მეტი ნატოთი ვიქნებით წარმოდგენილები საქართველოში, რაც არის ყველაზე სანდო და მყარი გარანტია რუსეთიდან მომდინარე საფრთხეების შესაკავებლად. ამ მიზნით მიმდინარეობს კონკრეტული გეგმის შემუშავება. შავი ზღის რეგიონში საქართველოსთან ერთად ნატოს წევრი ქვეყნებისა და პარტნიორი ქვეყნების ჩართულობით იქნება ერთობლივი ძალისხმევა მიმართული, რომ მეტი ნატო იყოს რეგიონში და რეგიონში იყოს მეტი უსაფრთხოება ნატოს მხრიდან უზრუნველყოფილი. კონკრეტული გეგმის ნაწილია ის, რომ გვექნება პრაქტიკული თანამშრომლობის გაფართოების შესაძლებლობები. ამ თემაზე აქტიურად ვმუშაობთ. ეს უკვე ნატოს ხელმძღვანელი პირების პრეროგატივაა, თუ როდის მოახდენენ ამის ოფიციალურ განცხადებას. ჩვენ გვაქვს საერთო ხედვა, რომ პრაქტიკული თანამშრომლობის ასპექტებია ძალიან წარმატებული. ეს გვაძლევს მყარ საფუძველს, რომ თანამშრომლობა მომავალში გაფართოვდეს. თუ რა ფორმას მიიღებს ის და რა იქნება კონკრეტული პროგრამა, ამას თავად ნატო გამოაცხადებს“, - განაცხადა ლევან იზორიამ.

შეხვედრებზე ხაზგასმით აღინიშნა საქართველოსა და ნატოს თანამშრომლობის მზარდი დინამიკა, თავდაცვის სფეროში განხორციელებული უპრეცედენტო რეფორმები და ნატო-საქართველოს არსებითი პაკეტის იმპლემენტაციის კუთხით მიღწეული სამაგალითო პროგრესი. ნატოს მხარემ კიდევ ერთხელ დაადასტურა საქართველოს თავდაცვისა და უსაფრთხოების სექტორის გაძლიერების მიმართ მტკიცე და ურყევი მხარდაჭერა.

თავდაცვის მინისტერიალის ფარგლებში ლევან იზორია ნატოს მტკიცე მხარდაჭერის მისიის ფორმატში ნატოს წევრი და პარტნიორი ქვეყნების თავდაცვის მინისტრების დონეზე გამართულ სხდომას დაესწრო, ორმხრივ ფორმატში კი, შეხვედრები გამართა ჰოლანდიის, რუმინეთისა და შვედეთის თავდაცვის მინისტრებთან.