მართვის მოწმობის გამოცდის ორ ეტაპად ჩატარებას კომიტეტმა პირველი მოსმენით მხარი დაუჭირა

ევროპასთან ინტეგრაციის კომიტეტის სხდომაზე პირველი მოსმენით დაამტკიცეს პროექტი, რომელის მიხედვითაც მართვის მოწმობის გამოცდა ორეტაპიანი ხდება. „საგზაო მოძრაობის შესახებ“ საქართველოს კანონში ცვლილების შეტანის თაობაზე“ კანონპროექტი განსახილველად შსს-ს მომსახურების სააგენტოს დირექტორმა მარიანა მორგოშიამ წარადგინა. ინფორმაციას პარლამენტის პრესსამსახური ავრცელებს.

მომხსენებლის განმარტებით, საქართველოს ნაკისრი აქვს ვალდებულება შეასრულოს „მართვის მოწმობების თაობაზე“ 2006 წლის 20 დეკემბრის ევროპარლამენტისა და საბჭოს 2006/126/EC დირექტივის მე-4 - მე-7 მუხლები და II და III დანართების დებულებები.

დირექტივის II დანართის თანახმად, სატრანსპორტო საშუალების მართვის უფლების მისაღები პრაქტიკული გამოცდისას, სპეციალური მანევრები შეიძლება ჩატარდეს დახურულ მოედანზე, ხოლო სატრანსპორტო საშუალების მართვის უფლების მისაღები გამოცდის ის ნაწილი, რომლის დროსაც ფასდება მძღოლობის კანდიდატის მოქმედება საგზაო მოძრაობისას, სადაც ეს შესაძლებელია, უნდა ჩატარდეს რეალური საგზაო მოძრაობის პირობებში.

„მართვის მოწმობის მიღების პროცესს დაემატება ახალი ეტაპი - რეალურ საგზაო სივრცეში მონაწილეობა, იმისათვის რომ მძღოლობის კანდიდატმა მართვის მოწმობა მიიღოს“, - განაცხადა მომხსენებელმა.

მისივე თქმით, აღნიშნული კანონპროექტის ფარგლებში შემოდის ახალი “AM” და “A2” კატეგორიები, რაც მოიცავს მსუბუქი კვადროციკლებს და მოპედებს, რაც აქამდე არ არსებობდა.

ასევე, ხდება მოპედების რეგისტრაცია და თეორიული გამოცდის დაწესება. „მნიშვნელოვანია, რომ ყველა ის ადამიანი, ვისაც ნებისმიერი კატეგორიის მართვის მოწმობა აქვს ავტომატურად მიიღებს “AM” კატეგორიას. ხოლო “AM” კატეგორიის მოპოვება შესაძლებელი იქნება მხოლოდ თეორიული გამოცდით, რაც აქამდე არ ხდებოდა“, - განაცხადა მარიანა მორგოშიამ.

მისი თქმით, “AM” კატეგორიის აღებისა და მოპედები რეგისტრაციისთვის ექვსთვიანი გარდამავალი პერიოდი წესდება. რაც შეხება მინიმალურ ასაკს A1 და B კატეგორიებისთვის მართვის მოწმობის ასაღებად ასაკი 17-დან 18 წლამდე იზრდება. თეორიული გამოცდის ფასი 40-დან 20 ლარამდე მცირდება, ხოლო შედეგების მოქმედების ვადა 1 თვიდან 1 წლამდე იზრდება. კანონპროექტის თანახმად, ხდება მექანიკური და ავტომატური გადაცემათა კოლოფის მქონე ავტოსატრანსპორტო საშუალებებზე ფასების გათანაბრება.

„ნებისმიერი გასვლა დახურულ მოედანზე 40 ლარი იქნება. პრაქტიკული გამოცდის მეორე ეტაპის ღირებულება B კატეგორიისთვის იქნება 90 ლარი. ყველა სხვა კატეგორიისთვის იქნება 150 ლარი. ასევე განსაზღვრულია დაჩქარებული მომსახურების საფასური“, - განაცხადა მარინა მორგოშიამ.

სტუდენტებისთვის მოპედების მართვის მოწმობის ასაღებად, ერთჯერადად, უქმდება თეორიული გამოცდის საფასური.