თბილისსა და რეგიონებში „ნაციონალური მოძრაობა“ აქციებს მართავს

ერთიანი ნაციონალური მოძრაობა ამ წუთებში აქცია-მსვლელობას აწყობს. პარტიის მხარდამჭერები და  აქტივისტები რესპუბლიკის მოედანზე შეიკრიბნენ. ნაწილი ავტო-მსვლელებით საპოლიციო უწყების შენობისკენ,  ნაწილი კი - ბიძინა ივანიშვილის სახლისკენ დაიძრა. მომიტინგეები გიორგი გახარიას გადადგომას ითხოვენ.

თბილისის პარალელურად ანალოგიურ აქციებს ნაციონალები რეგიონებშიც მართავენ. „გადადგეს ჯალათი გახარია“- ამ მოწოდებით ჩატარდა ნაცმოძრაობის აქცია გორში. აქციის მონაწილეებმა მანქანებით ქალაქის ცენტრალური ქუჩები მოიარეს და პროტესტი ხმოვანი სიგნალებით გამოხატეს. ბოლოს ისინი შიდა ქართლის პოლიციის დეპარტამენტთან შეიკრიბნენ და ასევე ხმოვანი სიგნალებით და შეძახილებით შინაგან საქმეთა მინისტრის გადადგომა და იმ სამართალდამცველების დასჯა მოითხოვეს,რომლებმაც 20 ივნისს უფლებამოსილებას გადააჭარბეს.

„რეჟიმი უნდა დაინგრეს“, ,,გახარია, თვალთთხარია წადი,“ - ამ ტრანსფარანტებით ზუგდიდში ნაციონალურმა მოძრაობამ საპროტესტო აქცია-მსვლელობა გამართა. როგორც აქციის მონაწილეები აცახდებენ მათი მთავარი მოთხოვნა შინაგან საქმეთა მინისტრისა და ვიცეპრემიერ გიორგი გახარიას გადადგომაა. 
,, ვითხოვთ გადადგეს ჯალათი გახარია. არ ვაპირებთ გაჩერებას, მანამ, სანამ ეს მოთხოვნა არ დაკმაყოფილდება,"-აცხადებენ აქციის მონაწილეები.

გიორგი გახარიას გადადგომის მოთხოვნით აქცია ქუთაისშიც გაიმართა. აქტივისტებმა მსვლელობა აღმაშენებლის ძეგლის მიმდებარე ტერიტორიიდან დაიწყეს და სხვადასხვა ქუჩაზე გადაინაცვლეს. აქციის მონაწილეების თქმით, პროტესტი გაგრძელდება, ვიდრე მათი მოთხოვნა არ შესრულდება და შინაგან საქმეთა მინისტრი არ გადადგება. საპროტესტო აქცია-მსვლელობა თელავშიც გაიმართა.