ჟენევაში ქართულ და რუსულ მხარეებს შორის შეხვედრა იმართება

ჟენევაში საერთაშორისო მოლაპარაკებების 48-ე რაუნდის ფარგლებში შეხვედრა მიმდინარეობს. მხარეებმა დღეს ყველა პრინციპული და მნიშვნელოვანი საკითხი უნდა განიხილონ. შეხვედრის დაწყების წინ რუსეთის მიმართ საქართველოს და პარტნიორების მთავარი მოწოდებაა, რომ რუსეთმა ექვსპუნქტიანი გეგმის შესრულება  დაიწყოს.

რუსეთის საგარეო საქმეთა მინისტრის მოადგილის, გრიგორი კარასინის თქმით, მოსკოვს საქართველოში ანტირუსული განწყობა არ მოსწონს. ამასთან, კარასინი "ფონის განმუხტვაზე საუბრობს".

"გვესმის, საქართველოში არც ისე იოლი შიდა პოლიტიკური პროცესები მიდის. წინასაარჩევნო პერიოდი მოდის და მატულობს ვნებათაღელვა, მაგრამ აქ, ჟენევაში ემოციები არ გვინდა. გვსურს მშვიდად განვიხილოთ ადგილზე შექმნილი ვითარება, მომხდარი ინციდენტები, ვიფიქროთ, როგორ ვიმუშაოთ ისეთ მნიშვნელოვან თემაზე, როგორიცაა ძალის გამოუყენებლობა. დღის წესრიგი საკმაოდ დატვირთულია და თავად ფაქტი, რომ ყველანი შევიკრიბეთ, საფუძველია, რომ კონსტრუქციული საუბარი გამოგვივა", - განაცხადა გრიგორი კარასინმა.

მან ასევე კომენტარი გააკეთა ინციდენტების პრევენციისა და მათზე რეაგირების ჯგუფის შეხვედრების აღდგენაზე: „ჩვენი პოზიცია ასეთია - რატომაც არა“.

საქართველოს საგარეო საქმეთა მინისტრის მოადგილის ლაშა დარსალიას განცხადებით, დღევანდელ შეხვედრაზე ქართული მხარე ცალსახად დააფიქსირებს პოზიციას, რომ ქართულ-რუსული ურთიერთობების მიმდინარე ფონზე აუცილებელია დეესკალაციის კუთხით სიარული.

"ჟენევის მოლაპარაკების მთავარი თემა არის 6-პუნქტიანი შეთანხმების შესრულება, თუმცა ქართულ-რუსული ურთიერთობების მიმდინარე ფონი და დაძაბული ვითარება საკმაოდ მნიშვნელოვანია. მე ვფიქრობ, რომ ჩვენ გვექნება აზრთა გაცვლა ამ საკითხებზე. ქართული დელეგაცია ცალსახად დააყენებს თავის პოზიციას, რომ მნიშვნელოვანია ვიაროთ დეესკალაციის კუთხით და ისედაც დაძაბული ურთიერთობები კიდევ უფრო არ დაიძაბოს.

ეს არც ერთი დელეგაციის ინტერესებში არ შედის. ენგურზე გადასასვლელების დაკეტვის ფაქტმა ძალიან მძიმე მდგომარეობაში ჩააგდო ადგილობრივი მოსახლეობა. ეს იქნება ერთ-ერთი მთავარი საკითხი. მთავარი თემებია ადგილზე უსაფრთხოება და ჰუმანიტარული საკითხები. ყველა მიმდინარე მწვავე საკითხი განიხილება. არის ბევრი საკითხი, რომელიც სამწუხაროდ, ვერ გადაიჭრა. ეს ეხება დევნილთა და ლტოლვილთა დაბრუნების საკითხს. ყოველთვის რუსეთის დელეგაცია თავს არიდებს ამ თემის განხილვას. დღესაც არ გვაქვს მოლოდინი, რომ შევძლებთ წინ წასვლას", - განაცხადა ლაშა დარსალიამ.

ოპოზიციაში აცხადებენ, რომ საქართველომ  წინა შეხვედრასთან შედარებით მოლაპარაკებების 48-რაუნდზე უკეთ უნდა შეძლოს საკუთრი ინტერესების დაცვა და მთავრობამ ყველაფერი უნდა გააკეთოს იმისთვის, რომ მსგავსი უმაღლესი დონის შეხვედრები მაქსიმალურად ქვეყნისთვის სასარგებლოდ გამოიყენოს.

ჟენევაში მოლაპარაკებების 48-ე რაუნდი 2 ივლისს დაიწყო.