საგარეო საქმეთა სამინისტრო ეუთო-ში საქართველოზე მიღებულ რეზოლუციას გამოეხმაურა

საგარეო საქმეთა სამინისტრო ეუთო-ში საქართველოს რეზოლუციის მიღებას გამოეხმაურა. ეუთო-ს საპარლამენტო ასამბლეამ ყოველწლიური 28-ე სესიის ფარგლებში მიიღო ლუქსემბურგის დეკლარაცია, რომელშიც საქართველოს მიერ ინიცირებული 26 პუნქტიანი რეზოლუცია შევიდა. 

რეზოლუციის სახელწოდებაა „უსაფრთხოებისა და ადამიანის უფლებების მდგომარეობა აფხაზეთში, საქართველო და ცხინვალის რეგიონში/სამხრეთ ოსეთი, საქართველო“.

საგარეო საქმეთა სამინოსტროს განცხადებით, რეზოლუციის პრეამბულა კიდევ ერთხელ ადასტურებს მტკიცე მხარდაჭერას საქართველოს ტერიტორიული მთლიანობისა და სუვერენიტეტისადმი მის საერთაშორისოდ აღიარებულ საზღვრებში.

აქვე აღნიშნულია საქართველოში კონფლიქტის მშვიდობიანად მოგვარების, ჟენევის საერთაშორისო მოლაპარაკებებისა  და რუსეთის მიერ 2008 წლის 12 აგვისტოს ცეცხლის შეწყვეტის შესახებ შეთანხმების შესრულების მნიშვნელობა.

„რეზოლუციის პრეამბულაში დეტალურად არის აღწერილი საქართველოს ოკუპირებულ რეგიონებში უსაფრთხოების, ადამიანის უფლებებისა და ჰუმანიტარული კუთხით არსებული მძიმე ვითარება, რაც რუსეთის უკანონო ქმედებების, მათ შორის, ინტენსიური სამხედრო აღმშენებლობისა და საოკუპაციო ხაზის გასწვრივ მავთულხლართების გავლების შედეგს წარმოადგენს.

აღსანიშნავია, რომ პრეამბულა მკაცრად გმობს სოხუმსა და ცხინვალში რუსეთის საოკუპაციო რეჟიმების წარმომადგენლების მიერ საქართველოს მოქალაქეების, არჩილ ტატუნაშვილის, გიგა ოთხოზორიასა და დავით ბაშარულის მკვლელობებს და ოკუპირებული აფხაზეთის რეგიონში უკანონოდ განლაგებულ რუსეთის სამხედრო ბაზაზე ირაკლი კვარაცხელიას საეჭვო ვითარებაში გარდაცვალების ფაქტს.

პრეამბულაში საპარლამენტო ასამბლეა მხარს უჭერს იძულებით გადაადგილებული პირებისა და ლტოლვილების უსაფრთხო და ღირსეული დაბრუნების უფლებას თავიანთი წარმოშობის ადგილებში.

პრეამბულა ხაზგასმით აღნიშნავს, რომ ევროკავშირის სადამკვირვებლო მისია წარმოადგენს ერთადერთ მონიტორინგის მექანიზმს ადგილზე, რომელსაც არ აქვს შესაძლებლობა, შევიდეს ოკუპირებულ რეგიონებში. 

საპარლამენტო ასამბლეა ასევე მტკიცე მხარდაჭერას უცხადებს ერგნეთსა და გალში ინციდენტების პრევენციისა და მათზე რეაგირების მექანიზმებს და ხაზს უსვამს გალში მექანიზმების აღდგენის მნიშვნელობას.

აღსანიშნავია, რომ საპარლამენტო ასამბლეა რეზოლუციის ძირითად ნაწილში მოუწოდებს რუსეთის ფედერაციას, დაიცვას საერთაშორისო სამართლის ფუნდამენტური ნორმები და პრინციპები, შეცვალოს უკანონო გადაწყვეტილება საქართველოს ოკუპირებული ტერიტორიების ე.წ. დამოუკიდებლობის აღიარების შესახებ და შეასრულოს 2008 წლის 12 აგვისტოს ცეცხლის შეწყვეტის შესახებ შეთანხმება.

საპარლამენტო ასამბლეა მიმართავს რუსეთის ფედერაციას, როგორც ეფექტური კონტროლის განმახორციელებელ ძალას საქართველოს ოკუპირებულ ტერიტორიებზე, შეწყვიტოს უკანონო ქმედებები და ადამიანის უფლებების დარღვევები, უზრუნველყოს იძულებით გადაადგილებული პირებისა და ლტოლვილების უსაფრთხო და ღირსეული დაბრუნება თავიანთი წარმოშობის ადგილებში და დაუშვას ადამიანის უფლებათა საერთაშორისო მონიტორინგის მექანიზმები ოკუპირებულ რეგიონებში.

აღსანიშნავია, რომ საპარლამენტო ასამბლეა მიესალმება საქართველოს პარლამენტის რეზოლუციას „რუსეთის ფედერაციის მიერ ოკუპირებულ აფხაზეთისა და ცხინვალის რეგიონში ადამიანის უფლებების უხეში დარღვევისა და „ოთხოზორია-ტატუნაშვილის“ სიის შესახებ“ და მოუწოდებს ეუთო-ს საპარლამენტო ასამბლეის მონაწილე სახელმწიფოებს, დააკისრონ სანქციები იმ პირებს, რომლებიც დამნაშავედ არიან ცნობილნი ან ბრალი ედებათ საქართველოს მოქალაქეების მკვლელობაში, გატაცებაში, წამებასა და არაადამიანურ მოპყრობაში ხსენებული რეზოლუციის შესაბამისად. 

საპარლამენტო ასამბლეა მხარს უჭერს კონფლიქტის დარეგულირების მიმართულებით საქართველოს მშვიდობიან პოლიტიკას, მათ შორის, საქართველოს მიერ ძალის არგამოყენების შესახებ ცალმხრივად ვალდებულების აღებასა და შესრულებას  და მოუწოდებს რუსეთს,  მოიქცეს მსგავსად.

დაბოლოს, საპარლამენტო ასამბლეა, რეზოლუციის ძირითად ნაწილში მოუწოდებს  ეუთო-ს მოქმედ თავმჯდომარეობას, გააორმაგოს ძალისხმევა საქართველოში ეუთო-ს სრულფასოვანი მისიის აღსადგენად, რომელსაც ექნება სრული წვდომა საქართველოს მთელ ტერიტორიაზე მის საერთაშორისოდ აღიარებულ საზღვრებში“ - ნათქვამია საგარეო საქმეთა სამინისტროს მიერ გავრცელებულ განცხადებაში.     

ლუქსემბურგში კენჭი უყარეს ლუქსემბურგის დეკლარაციას, რომლის ნაწილიც არის საქართველოს ოკუპირებულ ტერიტორიებზე მომზადებული რეზოლუცია. დეკლარაცია ეუთოს საპარლამენტო ასამბლეის ყოველწლიურ სესიაზე მიიღეს. 

7 ივლისს ეუთოს საპარლამენტო ასამბლეის პოლიტიკურ საკითხთა და უსაფრთხოების კომიტეტზე სოფო ქაცარავას მიერ ინიცირებული პროექტი "უსაფრთხოების და ადამიანის უფლებების მდგომარეობა ოკუპირებულ აფხაზეთში და ცხინვალის რეგიონში, სამხრეთ ოსეთში" ხმათა უმრავლესობით მიიღეს. 50 მომხრე, 5 წინააღმდეგი - ასე დასრულდა კენჭისყრა.

დღესვე ლუქსემბურგში გიგი წერეთლი ეუთოს საპარლამენტო ასამბლეის პრეზიდენტად ხელახლა აირჩიეს.