საქართველოს ელჩი აზერბაიჯანის საგარეო უწყებაში განმარტებისთვის დაიბარეს

აზერბაიჯანის საგარეო საქმეთა სამინისტრომ ბაქოში საქართველოს ელჩის ზურაბ პატარაძისგან დავით გარეჯის სამონასტრო კომპლექსის ტერიტორიაზე მომხდარ ინციდენტებზე განმარტება მოითხოვა. ამის შესახებ ადგილობრივი მედია წერს.

„ბაქოში საქართველოს ელჩი საგარეო საქმეთა სამინისტროში დავიბარეთ მას შემდეგ, რაც საქართველოს მოქალაქეთა ჯგუფმა აზერბაიჯანის სახელმწიფო საზღვარი დაარღვია და ჩვენს მესაზღვრეებს თავს დაესხა. ამასთან დაკავშირებით ჩვენ საქართველოს ელჩს განმარტება ვთხოვეთ“, - განაცხადეს აზერბაიჯანის საგარეო უწყებაში.

მათივე ინფორმაციით, მსგავსი ქმედებები აზერბაიჯანსა და საქართველოს შორის არსებული სტრატეგიული პარტნიორობის სულისკვეთებას ეწინააღმდეგება.

„ჩვენ ამას ვაფასებთ პროვოკაციად, რომლის მიზანსაც ორ სახელმწიფოს შორის დაპირისპირების შექმნა წარმოადგენს. ქართული მხარისგან ინციდენტის გამოძიება და ჩატარებული სამუშაოს შესახებ ჩვენი შეტყობინება მოვითხოვეთ“, - აღნიშნავენ უწყებაში.

დავით გარეჯში ანტისაოკუპაციო მოძრაობის „ძალა ერთობაშიას“ წარმომადგენლები პატრულირებენ. მათი ინფორმაციით, აზერბაიჯანელმა მესაზღვრეებმა უდაბნოს მონასტრებიდან ხატები 4-5 დღის წინ გამოიტანეს. დავით გარეჯის სამონასტრო კომპლექსის გარშემო შექმნილ ვითარებაზე კომენტარი საქართველოს შინაგან საქმეთა სამინისტროშიც გაკეთდა. უწყების ინფორმაციით, დავით გარეჯში ადგილობრივებსა და აზერბაიჯანელ მესაზღვრეებს შორის მცირე ინციდენტი მოხდა, თუმცა ვითარება დროულად განიმუხტა და ახლა ადგილზე სრული სიმშვიდეა. 

"ფაქტის შესწავლა დაწყებულია. მოვუწოდებთ საზოგადოებას, სამოქალაქო ჯგუფებს, მივცეთ საზღვრის დელიმიტაციის კომისიებს მშვიდ ვითარებაში მუშაობის გაგრძელების შესაძლებლობა, რათა დროულად შევძლოთ შეთანხმების მიღწევა", - წერია შსს-ს განცხადებაში.