სალია: აქიმიძისა და დვალის მიერ 50%-ს გაკონტროლება სარედაქციო ჩაურევლობის გარანტიად ვერ მიიჩნევა

ტელეკომპანია „რუსთავი 2“-ის გენერალური დირექტორის პაატა სალიას განცხადებით, ტელეკომპანიის ყოფილი მფლობელების ჯარჯი აქიმიძისა და დავით დვალის მიერ აქციების 50%-ის გაკონტროლება სარედაქციო პოლიტიკაში ჩაურევლობის გარანტია ვერ იქნება. ამის შესახებ მან ჟურნალისტებთან საუბარში განაცხადა.

„აქიმიძისა და დვალის მიერ აქციების 50%-ს გაკონტროლება სარედაქციო პოლიტიკაში ჩაურევლობის გარანტიად ვერ მიიჩნევა. ეს არალოგიკურია, ვინაიდან ისინი აცხადებენ, რომ არსებული სარედაქციო პოლიტიკა არ მოსწონთ და მასში რაღაცებს შეცვლიდნენ.

თუ სასამართლო დაადგენს, რომ მათ აქვთ „რუსთავი 2“-თან მიმართებით რაღაც უფლებები, მერე შეიძლება ამაზე საუბარი. ქიბარ ხალვაშს მათთვის ხელი არ შეუშლია, რომ სამართლებრივი გზებით თავიანთი უფლებები დაეცვათ“, - განაცხადა პაატა სალიამ.

„რუსთავი 2“-ის დამფუძნებლებმა დავით დვალმა და ჯარჯი აქიმიძემ ტელეკომპანიის მფლობელის, ქიბარ ხალვაშის შეთავაზებაზე - არხის 40%-იან წილზე უარი განაცხადეს. როგორც დვალი და ხალვაში ამბობენ, მათი მიზანია წართმეული უფლება სამართლებრივი გზით აღდგეს და არა კულუარული გარიგებით.

„რუსთავი 2“-ის დამფუძნებლები დავით დვალი და ჯარჯი აქიმიძე ტელეკომპანიის გენერალურ დირექტორს პაატა სალიას 25 ივლისს შეხვდნენ.

18 ივლისს ბიზნესმენმა ქიბარ ხალვაშმა „რუსთავი 2“-ის გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა. მანამდე სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი.

კერძოდ, 2017 წლის 2 მარტს საქართველოს უზენაესი სასამართლოს დიდმა პალატამ ტელეკომპანია „რუსთავი 2“ ქიბარ ხალვაშს მიაკუთვნა. იმავე წლის 3 მარტს კი, „რუსთავი 2“-ის მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა. სწორედ ამ აღსრულების შეჩერება გააუქმა სტრასბურგის სასამართლომ.

ამ ამბიდან მალევე ირაკლი ოქრუაშვილმა განაცხადა, „რუსთავი 2“-ის მესაკუთრეა და ტელეკომპანიის 100%-იანი წილი ქიბარ ხალვაშის სახელით შეისყიდა, თუმცა კომპანიის დღევანდელი მფლობელი ამ დოკუმენტს არ აღიარებს და ამბობს, რომ ხელმოწერა გაყალბებულია.

ტელეკომპანიასთან დაკავშირებით დანებებას არ აპირებენ ძმები ყარამანიშვილები და ნიკოლოზ ნაყოფია, რომლებმაც 27 ივლისს განცხადება გაავრცელეს. 

ტელეკომპანია „რუსთავი 2-ის“ საკონტროლო პაკეტის ყოფილი მფლობელი კომპანიის „ტვ საქართველოს“ 50%-იანი წილი ერთიანი ნაციონალური მოძრაობის დეპუტატის, კობა ნაყოფიას შვილმა, ნიკოლოზ ნაყოფიამ შეიძინა. საჯარო რეესტრის მონაცემებით, ეს ცვლილება 2018 წლის 16 აგვისტოს დარეგისტრირდა. წილების გასხვისებამდე „ტელეკომპანია საქართველოს“ 60% და 40%-ს ლევან და გიორგი ყარამანიშვილები ფლობდნენ. ცვლილების შედეგად, მათი წილი 25%, 25%-მდე შემცირდა.