პაატა სალიას თანამშრომლების ნაწილის სხვა არხზე გადასვლა არასწორად მიაჩნია

გუშინ შევიტყვე განცხადებებიდან, რომ თანამშრომელთა ნაწილი სხვა არხზე გადადს, ვთვლი, რომ არ არის სწორი მოქმედება ჩვენი შეთანხმებიდან გამომდინარე- ამის შესახებ „რუსთავი 2“-ის დირექტორმა პაატა სალიამ  განაცხადა.

სალიას თქმით, მას ოფიციალური გადაწყვეტილება ტელეკომპანიაში საკადრო ცვლილებებთან დაკავშირებით არ მიუღია.

„ჩვენ პირველივე დღიდან განვაცხადეთ, რომ არ ვაპირებდით არავის გათავისუფლებას. მათი არჩევანია და მე ვერავის იძულებით ვერ დავაკავებ ამ არხზე. ყველა იღებს თავის გადაწყვეტილებას. ამ ეტაპზე მე ოფიციალური განცხადება სამსახურიდან წასვლის თაობაზე, გარდა ერთი იურისტისა, არ მიმიღია“- განაცხადა პაატა სალიამ.

მისივე თქმით, მნიშვნელოვანია, არხი იყოს კრიტიკული, თუმცა ეს კრიტიკა უნდა იყოს მაქსიმალურად დასაბუთებული.

„ჩემთვის მნიშვნელოვანია, არხი იყოს კრიტიკული, უბრალოდ ჩემი სურვილია, ეს კრიტიკა იყოს მაქსიმალურად დასაბუთებული და არ იყოს მხოლოდ და მხოლოდ სიტყვები. საუბარი მაქვს პროფესიონალურ კრიტიკაზე. მე ვთვლი, რომ ჩვენი არხი უნდა იყოს გამორჩეული მაღალი პროფესიონალიზმით.  ვგულისხმობ იმას, რომ მაქსიმალური კრიტიკა, მაგრამ მაქსიმალური ობიექტურობის და მაქსიმალური სიმართლის ფარგლებში, ანუ ეს კრიტიკა არ უნდა დაემსგავსოს რაღაც ტყუილების გავრცელებას, „ფეიკ ნიუსი“ არ უნდა იყოს „რუსთავი 2“- ზე“, – განაცხადა პაატა სალიამ.

მისივე თქმით, აბსურდია იმის თქმა, რომ ვიღაცას ტელეკომპანია „რუსთავი2“-ის გაკოტრება უნდა.

18 ივლისს ბიზნესმენმა ქიბარ ხალვაშმა „რუსთავი 2“-ის გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა. მანამდე სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი.

კერძოდ, 2017 წლის 2 მარტს საქართველოს უზენაესი სასამართლოს დიდმა პალატამ ტელეკომპანია „რუსთავი 2“ ქიბარ ხალვაშს მიაკუთვნა. იმავე წლის 3 მარტს კი, „რუსთავი 2“-ის მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა. სწორედ ამ აღსრულების შეჩერება გააუქმა სტრასბურგის სასამართლომ.