მარგველაშვილს მიაჩნია, რომ ქვეყანა ავტორიტარიზმისკენ მიდის

ჩვენ მივდივართ ავტორიტარული სახელმწიფოსკენ და ეს არის ფაქტი,-ამის შესახებ საქართველოს ყოფილმა პრეზიდენტმა გიორგი მარგველაშვილმა „პალიტრანიუსის“ ეთერში განაცხადა.

მარგველაშვილმა „რუსთავი 2“-ის ყოფილი გენერალური დირექტორისთვის ბრალის წარდგენასთან დაკავშირებთაც ისაუბრა და აღნიშნა, რომ დღეს სახელმწიფოში სამართალი აღარ არის პირველხარისხოვანი, რადგან ქვეყანაში სამართალი მხოლოდ და მხოლოდ პოლიტიკისთვის მაკიაჟად იქცა.

„რა არის „ქართული ოცნების“ ხელწერა და რა არის „ქართული ოცნების“ მეთოდები სამწუხაროდ, ეს უკვე ძალიან დაშორებულია იმისგან, როგორც მე ვიცნობდი „ქართულ ოცნებას“ და რაშიც ვმონაწილეობდი, როდესაც ვიყავი მათი გუნდის წევრი. გვარამიაზე და სალიაზე, ფინანსურ საკითხებზე ცალკე კომენტარს ვერ გავაკეთებ. ერთადერთი მინდა გაგახსენოთ, რომ დაყადაღებულ „რუსთავი 2“-ში რაღაცნაირად, ეს იყო ყველაზე წარმატებული, მათ შორის ფინანსურად წელში გამართული კომპანია ნიკა გვარამიას მმართველობის ქვეშ, თუმცა ამის დეტალებში მე ვერ შევალ. დღევანდელ ვითარებასაც ვერ შევაფასებ ცალკე გვარამიას საქმით და იქიდან გამომდინარე, რასაც საუბრობს პროკურატურა",-აცხადებს მარგველაშვილი.

მარგველაშვილს ასევე მიაჩნია, რომ ქვეყანაში შერჩევითი სამართალია. „ქართული ოცნების“ ლიდერი ბიძინა ივანიშვილი გამოვიდა და დაგვპირდა, რომ ერთ წელიწადში ყველაფერს თავის ადგილზე დაალაგებდა და ჩვენ ვნახეთ ამ დალაგების ძალიან აქტიური ზაფხული. დალაგების ფორმა არის - ტელევიზიებმა უნდა შეცვალონ სარედაქციო პოლიტიკა, უნდა ამოღებულ იქნას 11 წლის წინ რაღაც გარიგებები, ვითომ პრობლემური. ის, რომ ეს არის შერჩევითი სამართალი, ვისაც ეჭვი ეპარება, კი ბატონო"- განაცხადა ყოფილმა პრეზიდენტმა.