ადმინისტრაცია: გუგუტიანთკარის მოვლენებზე პრეზიდენტი დასვენების ადგილიდან მუშაობდა

გუგუტიანთკარის მოვლენების ფონზე საქართველოს პრეზიდენტის შვებულებაზე ოპოზიციის მიერ გამოთქმულ კრიტიკას ადმინისტრაცია პასუხობს და განმარტავს, რომ გუგუტიანთკარის მოვლენებზე პრეზიდენტები დასვენების ადგილიდან აგრძელებდა მუშაობას. 

„პრეზიდენტი თავის შვილებთან ერთად ქალაქგარეთ იყო გასული. ის როგორც მისი კოლეგა პრეზიდენტები დასვენების ადგილიდან აგრძელებდა მუშაობას, კონტაქტში იყო თავის ადმინისტრაციასთან, საგარეო და შინაგან საქმეთა უწყებებთან და თავის უცხოელ კოლეგებთან. მოგეხსენებათ თანამედროვე საკომუნიკაციო საშუალებებით ეს შესაძლებელია“, - აღნიშნულია ინფორმაციაში. 

პრეზიდენტის ადმინისტრაციის ინფორმაციით, ამავე მოვლენაზე სალომე ზურაბიშვილი ესტონეთის პრეზიდენტს ტელეფონით ესაუბრა.

„საქართველოს და ესტონეთის პრეზიდენტებს შორის შედგა საუბარი. ეს არის პრეზიდენტისთვის ჩვეულებრივი სამუშაო პროცესი. ამ დღეებში სხვადასხვა ფორმით კონტაქტში იმყოფებოდა ჩვენს უცხოელ პარტნიორებთან და მათ აწვდის დეტალურ ინფორმაციას არსებულ ვითარებაზე.

გარდა ესტონეთისა, ასეთი კონტაქტები შედგა პოლონეთის, ლიეტუვას, საფრანგეთის, ევროკავშირის პრეზიდენტებსა და მათ ადმინისტრაციებს შორის.  

ამავდროულად პრეზიდენტი ემზადება თავის გამოსვლებისთვის ვილნიუსის საერთაშორისო კონფერენციაზე, პარიზის MEDEF- ის საზაფხულო უნივერსიტეტზე და ვარშავის საერთაშორისო შეხვედრისთვის.  

ყველა ამ გამოსვლაზე თუ  შეხვედრაზე საოკუპაციო ხაზზე არსებული ვითარება ერთ-ერთი მთავარი თემა იქნება. პრეზიდენტის აქტიურობის მთავარი მიზანია ჩვენი პარტნიორების დახმარების მოპოვება სიტუაციის განმუხტვისათვის“, - ნათქვამია პრეზიდენტის პრესსამსახურის მიერ გავრცელებულ ინფორმაციაში.

ოპოზიცია პრეზიდენტს იმის გამო საყვედურობდა, რომ გუგუტიანთკარის მოვლენებზე განცხადება არ გაუვრცელებია. სალომე ზურაბიშვილს ამის გამო სოციალურ ქსელშიც აქტიურად აკრიტიკებდნენ. 

გუგუტიანთკარში ოკუპანტებმა ხელოვნური ბარიერების აღმართვა დღეს ისევ განაახლეს. ოკუპანტების ტყვეობაში რჩება სოფელ ახალუბნიდან და მეჯვრისხევიდან გატაცებული 8 ადამიანი. მათი გათავისუფლების შესახებ მოლაპარაკებები გრძელდება. 

ოკუპანტებმა გუგუტიანთკართან მავთულხლართების მონტაჟი 14 აგვისტოს განაახლეს.

15 აგვისტოს სოფელში მიმდინარე უკანონო სამუშაოებს საქართველოში აშშ-ის საელჩო გამოეხმაურა. 

საქართველოს საგარეო საქმეთა სამინისტრომ კი საერთაშორისო თანამეგობრობას საოკუპაციო ხაზზე მიმდინარე უკანონო პროცესების სათანადოდ შეფასებისკენ მოუწოდა. 6 ქვეყნის ელჩები და დიპლომატიური კორპუსის 20-მდე წარმომადგენელი არსებულ სიტუაციას ადგილზე გუშინ გაეცნენ.