ზურაბიშვილი: აფხაზეთისა და სამხრეთ ოსეთის „დამოუკიდებლობის“ აღიარებით რუსეთმა საერთაშორისო სამართალი დაარღვია

საქართველოს პრეზიდენტის სალომე ზურაბიშვილის განცხადებით, დღევანდელ დღეს, 11 წლის წინ, საქართველოს ორი განუყოფელი ნაწილის - აფხაზეთის და სამხრეთ ოსეთის „დამოუკიდებლობის“ აღიარებით რუსეთმა საერთაშორისო სამართლის საყოველთაოდ აღიარებული პრინციპები და ნორმები დაარღვია.

„საქართველოს არც ერთი ხელისუფლება, არც მოქმედი, არც მომავალი, სანამ არ აღდგება საქართველოს ერთიანი სახელმწიფოს დარღვეული მთლიანობა, არ და ვერ შევეგუებით ამას. ისევე, როგორც საერთაშორისო თანამეგობრობა, რომელმაც ეს ფაქტი დაგმო და საქართველოს ტერიტორიულ მთლიანობას ურყევი მხარდაჭერა გამოუცხადა.

რუსიფიკაციის პოლიტიკის გამო დღეს აფხაზურ და ოსურ კულტურას, ენას, ზოგადად იდენტობას კიდევ უფრო მძიმე საფრთხე ემუქრება - ის გაქრობის წინაშეა. ჩვენი ერთობლივი ისტორია კი სწორედ იმის დასტურია, რომ ქართველთა გარეშე აფხაზთა და ოსთა ეროვნული თვითმყოფადობა ვერ გადარჩება.

ასევე მძიმეა ჩვენი აფხაზი და ოსი მოქალაქეების სოციალური და ეკონომიკური მდგომარეობა. დღესაც, მიუხედავად ოკუპაციით შექმნილი პრობლემებისა, ჩვენი ხელისუფლება მათი ჰუმანიტარული, სამედიცინო, საგანმანათლებლო და ბიზნესინტერესების პრობლემების გადასაჭრელად შესაძლებლობების მაქსიმუმს აკეთებს“, - აცხადებს ზურაბიშვილი.

მისივე თქმით, აფხაზებთან და ოსებთან ჩვენი საერთო ხანგრძლივი ისტორიის განმავლობაში მძიმე პერიოდები ყოფილა, მაგრამ უფრო მეტია სიყვარული, მეგობრობა, ნათესაობა და ურთიერთპატივისცემა.

„მჯერა, რომ დადგება დრო, როდესაც აფხაზეთი და სამხრეთ ოსეთი საქართველოს ერთიან სახელმწიფო სივრცეში მშვიდობიანად დაბრუნდება. ჩემი უმთავრესი სურვილი და უდიდესი მიზანია, რომ ეს მოხდეს უახლოეს მომავალში, ჩემი პრეზიდენტობის ვადაში, რისთვისაც გამოვიყენებ ყველა გზას და საშუალებას. მე ვიქნები გარანტი იმისა, რომ იმ დროის აფხაზეთში და სამხრეთ ოსეთში ჩვენს მოქალაქეებს ჰქონდეთ ღირსეული ცხოვრების, თავისუფალი არჩევანის და სიტყვის თავისუფლების უფლება, მსგავსად საქართველოს ყველა მოქალაქისა, მიუხედავად მათი ეთნიკური წარმომავლობისა, როგორიც ეკადრება დემოკრატიული, თავისუფალი ქვეყნის - საქართველოს მოქალაქეს!“, - წერს პრეზიდენტი.

11 წლის წინ, 2008 წლის 26 აგვისტოს რუსეთის პრეზიდენტმა დიმიტრი მედვედევმა საქართველოს ოკუპირებული რეგიონების - აფხაზეთისა და სამხრეთ ოსეთის „დამოუკიდებლობის“ შესახებ ბრძანებებს მოაწერა ხელი.