2022 წლისთვის გარკვეული კატეგორიის პედაგოგების ხელფასი 1700-2450 ლარი იქნება

2019 წლის ოქტომბერში ყველა მასწავლებელს, რომელსაც აქვს სტატუსი, ანაზღაურება გაეზრდება. ხელფასების ზრდა იქნება ყოველწლიური და 2022 წელს ის უფროსი მასწავლებლისთვის 1700 ლარს, წამყვანი მასწავლებლისთვის 2150 ლარს, მენტორი მასწავლებლისთვის კი 2450 ლარს შეადგენს, - ამის შესახებ საქართველოს პრემიერმინისტრმა მამუკა ბახტაძემ ავლაბრის სახელმწიფო ცერემონიების სასახლეში განაცხადა, სადაც ის სკოლის პედაგოგებს ხვდება.

„მთელი ჩვენი საზოგადოება თანხმდება, რომ განათლება და მეცნიერება ჩვენი ქვეყნის მომავლის ფუნდამენტია. განათლება არის უმოკლესი გზა თავისუფლებისკენ. ეს არის გზა, რომელიც დაგვაძლევინებს სიღარიბეს და ოკუპაციას, და ეს არის ერთადერთი გარანტი იმისა, რომ საქართველო 21-ე საუკუნეში იქნება წარმატებული ქვეყანა და ჩადგება განვითარებული ქვეყნების რიცხვში. ჩვენი განათლების რეფორმა ეფუძნება ეროვნულ დემოკრატიულ ღირებულებებს და მთლიანად მორგებულია საქართველო დღევანდელ რეალობას.

ჩვენ მივაღწიეთ დაუჯერებელ მიზანს - პარლამენტის მიერ ივლისში დამტკიცებული კანონის თანახმად, შემდეგი ათწლეულების განმავლობაში ყველა ხელისუფლება ვალდებული იქნება, ბიუჯეტის მეოთხედი განათლებას მიმართოს. მე ვიტოვებდი მცირე იმედს, რომ ამ კანონპროექტის განხილვისას ოპოზიცია დადგებოდა პარტიული ინტერესებზე მაღლა და მხარს დაუჭერდა ამ პროცესს. სამწუხაროდ, ეს ასე არ მოხდა. განათლება არის ეროვნული იდეა, რომელიც ყველას უნდა გვაერთიანებდეს. ამ იდეის გარშემო ნებისმიერი სპეკულაციები მიუღებელია“, - განაცხადა ბახტაძემ.

მისივე თქმით, განათლების სისტემის რეფორმა საკმაოდ მტკივნეული საკითხების გადაჭრას უკავშირდება.

„ერთ-ერთი ასეთი საკითხია პედაგოგების კომპეტენციის დადასტურების და მათი სტატუსის შესაბამისად ანაზღაურების ზრდა. უფრო მეტიც, პირადად ჩემთვის ეს ემოციურადაც უმძიმესი ტვირთი იყო, როდესაც უბრალოდ ციფრებზე ვხედავდი, რომ მასწავლებლის ხელფასი საქართველოში საშუალო ხელფასს ორჯერ ჩამორჩებოდა. ასეთი მიდგომებით 21-ე საუკუნეში ქვეყანას წარმატებები ვერ ექნებოდა.

2019 წლის ოქტომბერში ყველა მასწავლებელს, რომელსაც აქვს სტატუსი, ანაზღაურება გაეზრდება. პედაგოგების გარდა ხელფასები ეზრდებათ რესურსცენტრების თანამშრომლებს და სკოლების ადმინისტრაციის წარმომადგენლებს, მათ შორის ტექნიკურ პერსონალს, სკოლის ექიმებს და ინკლუზიური განათლების მხარდაჭერის სპეციალისტებს. ხელფასის ზრდა შეეხება მანდატურის სამსახურის მიერ გადამზადებულ სკოლის უსაფრთხოებაზე პასუხისმგებელ პირებსაც. ხელფასების ზრდა იქნება ყოველწლიური და 2022 წელს ის უფროსი მასწავლებლისთვის 1700 ლარს, წამყვანი მასწავლებლისთვის 2150 ლარს, მენტორი მასწავლებლისთვის კი 2450 ლარს მიაღწევს“, - განაცხადა პრემიერმა.