კახა ქემოკლიძე: შევთანხმდით, რომ უნდა გადაიდგას კონკრეტული ნაბიჯები ვითარების დეესკალაციისკენ

დეფაქტო რეჟიმის და ცენტრალური ხელისუფლების წარმომადგენლებს შორის შეხვედრა დასრულდა. ოკუპირებულ წნელისში დეფაქტო რეჟიმის წარმომადგენლები ცენტრალური ხელისუფლების წარმომადგენლებს შეხვდნენ. შეხვედრას უსაფრთხოების საბჭოს აპარატის უფროსი, სუსის წარმომადგენლები, ასევე ევროკავშირისა და ეუთოს წარმომადგენლები დაესწრნენ. 

უსაფრთოების საბჭოს აპარატის უფროსის კახაბერ ქემოკლიძის განცხადებით, შეხვედრა კონსტრუქციულ რეჟიმში გაიმართა. 

„შეხვედრის ყველა მონაწილე შევთანხმდით, რომ უნდა გადაიდგას კონკრეტული  ნაბიჯები ვითარების დეესკალაციისკენ. ამის მოწოდება ყველა წარმომადგენელმა გაიზიარა. გარდა ამისა, შემდეგი კვირის დასაწყისში გაიმართება კიდევ ერთი ტექნიკური შეხვედრა ამჯერად სოფელ ერგნეთში, რომელზეც დავაფიქსირებთ ჩვენს პოზიციებს.

მიუხედავად განსხვავებული პოზიციებისა, რომელიც დაფიქსირდა, როგორც ცენტრალური ხელისუფლების, ასევე დეფაქტო ხელისუფლების წარმომადგენლების მიერ, შეხვედრის პათოსი ემსახურებოდა ვითარების სრულ დეესკალაციას და განმუხტვას. ეს არის სწორი მიმართულებით გადადგმული ნაბიჯი, რომლის განხორციელებასაც ჩვენ დღეიდანვე შევუდგებით. რაც შეეხება საგუშაგოს, ამ თემაზე გავუზიარეთ ერთმანეთს განსხვავებული პოზიციები და შევთანხმდით, რომ ვითარების დეესკალაცია ყველას ინტერესშია“, - განაცხადა ქემოკლიძემ. 

მისივე თქმით, საგუშაგოს დაშლის საკითხი დღევანდელ შეხვედრაზე არ განხილულა.

ცხინვალის დეფაქტო რეჟიმმა საქართველოს ულტიმატუმი 29 აგვისტოს ერგნეთში გამართულ შეხვედრაზე წაუყენა. ე.წ. სამხრეთ ოსეთის დელეგაციამ ბლოკპოსტის დაშლა და საქართველოსგან პროვოკაციების შეწყვეტა მოითხოვა. ულტიმატუმის გამხმოვანებელი ეგორ კოჩიევი იყო, რომელიც მიიჩნევს, რომ ქართული ბლოკპოსტი ე.წ. სამხრეთ ოსეთის ტერიტორიაზეა განთავსებული. დე ფაქტო რეჟიმი იმუქრებოდა, რომ თუ საქართველოს ხელისუფლება არ შეასრულებს მათ მოთხოვნას, „სამხრეთ ოსეთის რესპუბლიკა ყველა კანონიერ ზომას მიიიღებს მოსახლეობის უსაფრთხოებისთვის და საზღვრის დაცვისთვის“. ქართული მხარე აცხადებდა, რომ საგუშაგოს დაშლის საკითხი არც განიხილება. 

დავით ზალკალიანის განცხადებით, კრიტიკული სიტუაციიდან მშვიდად გამოსასვლელად ყველა მექანიზმი ამოქმედებულია.  

ევროკავშირის მონიტორინგის მისიის ხელმძღვანელი ჩორჩანაში ჩავიდა. 

საგარეო საქმეთა სამინისტრომ შეშფოთება გამოხატა საქართველოს ხელისუფლების მიერ კონტროლირებად ტერიტორიაზე მდებარე სოფელ ჩორჩანას სიახლოვეს, საოკუპაციო ხაზთან, საოკუპაციო ძალების მიერ სამხედრო ტექნიკისა და პერსონალის მობილიზების გამო.

სოფელი ჩორჩანაში 29 აგვისტოს გვიან ღამით საოკუპაციო ძალების ჯავშანტექნიკა გამოჩნდა. სახელმწიფო უსაფრთხოების სამსახურის განცხადებით, ხაშურის მუნიციპალიტეტის სოფელ ჩორჩანას სიახლოვეს, ოკუპირებულ ტერიტორიაზე, შეინიშნებოდა საოკუპაციო ძალის სამხედრო ტექნიკის გადაადგილება. 

მოგვიანებით ცხინვალის დე ფაქტო რეჟიმის მიზეზით ერგნეთში ინციდენტების პრევენციისა და მათზე რეაგირების ფარგლებში 95-ე სამუშაო შეხვედრა ჩაიშალა.  10 საკითხიდან განიხილეს მხოლოდ ერთი, ისიც ნაწილობრივ. საუბარია სოფელ ჩორჩანასთან მძიმე ტექნიკის გადაადგილებაზე.