ერიკ ჰოგი: წნელისში გამართული შეხვედრა შედარებით კონსტრუქციული იყო

ევროკავშირის სადამკვირვებლო მისიის ხელმძღვანელი ერიკ ჰოგი სოფელ წნელისში გამართულ შეხვედრას Twitter-ზე გამოეხმაურა. ის სოფელ წნელისში ქართულ და ოსურ მხარეს შორის გამართულ შეხვედრას შედარებით კონსტრუქციულს უწოდებს.

ის Twitter-ზე წერს, რომ  გამოიკვეთა შემდგომი შესაძლო ნაბიჯები დაძაბულობის განსამუხტად. აღნიშნულ საკითხზე ახალი მოლაპარაკებები მომავალ კვირას გაიმართება. ერიკ ჰოგი მხარეებს კიდევ ერთხელ მოუწოდებს თავშეკავებულობისკენ.

#EUMM and OSCE teams on our way to  tech. IPRM meeting  held today  in Tsnelisi. Meeting rather constructive. Possible steps towards defusing tensions identified. New talks planned for next week.  Essential that all  relevant actors show maximum restraint. pic.twitter.com/2EotpeazLT

— Erik Hoeg (@erik_hoeg) August 30, 2019

მანამდე ოკუპირებული ცხინვალის დე-ფაქტო ლიდერმა ანატოლი ბიბილოვმა განაცხადა, რომ სოფელ წნელისში საგუშაგო განთავსდება.

ცხინვალის დეფაქტო რეჟიმმა საქართველოს ულტიმატუმი 29 აგვისტოს ერგნეთში გამართულ შეხვედრაზე წაუყენა. ე.წ. სამხრეთ ოსეთის დელეგაციამ ბლოკპოსტის დაშლა და საქართველოსგან პროვოკაციების შეწყვეტა მოითხოვა.

ულტიმატუმის გამხმოვანებელი ეგორ კოჩიევი იყო, რომელიც მიიჩნევს, რომ ქართული ბლოკპოსტი ე.წ. სამხრეთ ოსეთის ტერიტორიაზეა განთავსებული. დე ფაქტო რეჟიმი იმუქრებოდა, რომ თუ საქართველოს ხელისუფლება არ შეასრულებს მათ მოთხოვნას, „სამხრეთ ოსეთის რესპუბლიკა ყველა კანონიერ ზომას მიიიღებს მოსახლეობის უსაფრთხოებისთვის და საზღვრის დაცვისთვის“. ქართული მხარე აცხადებდა, რომ საგუშაგოს დაშლის საკითხი არც განიხილება.