ზალკალიანი: ლიეტუვა ყოველთვის იყო და დღესაც რჩება ჩვენს ერთ-ერთ ყველაზე აქტიურ მხარდამჭერად

საგარეო საქმეთა მინისტრი დავით ზალკალიანის განხცადებით, საქართველოში ოფიციალური ვიზიტით მყოფ ლიეტუველ კოლეგასთან ლინას ლინკევიჩუსთან შეხვედრაზე კიდევ ერთხელ მაღალი შეფასება მიეცა ლიეტუვისა და საქართველოს ისტორიულ მეგობრობას და ლიეტუვის აქტიურ მხარდაჭერას საქართველოს ტერიტორიული მთლიანობისა და სუვერენიტეტისადმი, ისევე როგორც საქართველოს ევროპული და ევროატლანტიკური მისწრაფებების მიმართ.

„ლიეტუვა, საქართველოს უახლოესი მოკავშირეა. ჩვენ განსაკუთრებულად ვაფასებთ იმ ერთგულებასა და მეგობრობას, რომელსაც ლიეტუვა, და განსაკუთრებით ლინას ლინკევიჩუსი წლების განმავლობაში იჩენს საქართველოს მიმართ. იგი საქართველოს ევროპული და ევროატლანტიკური ინტეგრაციის განსაკუთრებული მხარდამჭერია“, - აღნიშნა ზალკალიანმა.

მისივე თქმით, შეხვედრაზე მინისტრებმა მაღალი შეფასება მისცეს ქვეყნებს შორის არსებულ პოლიტიკურ დიალოგს. ასევე, პოზიტიურად შეფასდა მაღალი და უმაღლესი დონის ვიზიტების გაცვლის დინამიკა, ისევე როგორც საკანონმდებლო ორგანოებსა და დარგობრივ უწყებებს შორის ნაყოფიერი თანამშრომლობა.

„ჩვენს ორმხრივ ურთიერთობების დღის წესრიგში არ არსებობს პრობლემური საკითხები, დარწმუნებული ვარ რომ ჩვენი ურთიერთობები მომავალშიც ისეთი თანმიმდევრული და წარმატებული იქნება როგორიც დღეს“, - განაცხადა მინისტრმა.

საგარეო უწყების ხელმძღვანელმა სავაჭრო ურთიერთობებზეც ისაუბრა და განაცხადა, რომ იზრდება ლიეტუვადან ტურისტების რიცხვი საქართველოში, რასაც, თავის მხრივ, ხელს უწყობს პირდაპირი საჰაერო მიმოსვლა ქუთაისსა და ვილნიუსს შორის. როგორც მინისტრმა აღნიშნა, შეხვედრაზე ძირითადი საკითხები საქართველოს ევროპულ ინტეგრაციას უკავშირდებოდა.

„აღინიშნა, რომ საქართველო არის ლიდერი ქვეყანა აღმოსავლეთ ევროპის პარტნიორ ქვეყნებს შორის და ჩვენ გვაქვს მართლაც ხელშესახები შედეგები ამ თვალსაზრისით. წარმატებულად ვახორციელებთ საგზაო რუკას და ასოცირების დღის წესრიგს. მნიშვნელოვანი იყო ასევე ის შეფასებები, რომელიც ბათუმის საერთაშორისო კონფერენციას მოჰყვა. ჩვენ დარწმუნებული ვართ, რომ ხელშეწყობა და თანადგომა, რაც გვაქვს ლიეტუველი მეგობრების მხრიდან, ევროპული ინტეგრაციის პროცესების დასაჩქარებლად გვაძლევს ხელშესახებ შედეგებს, რომ მომავალშიც ინტენსიური იქნება და გვექნება შესაძლებლობა, მეტი კონკრეტული ნაბიჯი გადავდგათ ქვეყნის ფუნქციური მომზადებისთვის იმ საბოლოო მიზნისკენ, რასაც ჰქვია ევროკავშირში გაწევრიანება“, - განაცხადა ზალკალიანმა.

მისივე თქმით, საუბარი შეხვედრაზე ასევე შეეხო ევროატლანტიკურ ინტეგრაციასაც, სადაც საქართველო არის ასევე ერთ-ერთი წარმატებული ქვეყანა.

ლინას ლინკევიჩუსის ვიზიტის ფარგლებში, საგარეო საქმეთა სამინისტროში ჩატარდა საქართველო-ლიეტუვის ევროპული და ევროატლანტიკური ინტეგრაციის კომისიის მე-6 სხდომა, რომლის ფარგლებშიც ხელი მოეწერა ერთობლივ ოქმს.  როგორც მინისტრებმა აღნიშნეს, თანამშრომლობის ეს ფორმატი არის უმნიშვნელოვანესი, რადგან მხარეებს რეგულარულად ეძლევათ შესაძლებლობა, განიხილონ ურთიერთობებში არსებული პროგრესი და შეაჯერონ ევროპული და ევროატლანტიკური დღის წესრიგის შესრულების პროცესი.

2019 წელს აღინიშნება ლიეტუვა-საქართველოს 25 წლის იუბილე და თბილისისა და ვილნიუსის დამეგობრების 10 წლის იუბილე, რომლის საპატივცემულოდ თბილისში გაიხსნება ვილნიუსის პარკი.

ვიზიტის ფარგლებში ლიეტუვის პირველი დიპლომატი შეხვდება პრემიერმინისტრ გიორგი გახარიას, პრეზიდენტ სალომე ზურაბიშვილსა და პარლამენტის თავმჯდომარე არჩილ თალაკვაძეს. ლიეტუვის საგარეო საქმეთა მინისტრი, ვიზიტის ფარგლებში ასევე მონაწილეობას მიიღებს ვილნიუსის სკვერის გახსნის ცერემონიაში. ვიზიტი 11 სექტემრამდე გაგრძელდება.