მედპერსონალზე ძალადობა ან მუქარა კანონით დაისჯება

გახშირებული ძალადობის შემთხვევების გამო, ექიმებისა და სოციალური მუშაკებისთვის საქმიანობის ხელის შეშლა კანონით დაისჯება. კანონპროექტის მიხედვით, სამედიცინო პერსონალზე ფიზიკური, ფსიქოლოგიური ზეწოლა ან მუქარა სისხლის სამართლის პასუხისმგებლობით, მათ შორის პატიმრობით დაისჯება. 

რამდენიმე თვის წინ სოციალურ ქსელში ვიდეო გავრცელდა, თუ როგორ უსწორდება პაციენტი ფიზიკურად მედპერსონალს. დაპირისპირების შედეგად ექიმმა თავის ტვინის შერყევა მიიღო. ეს ერთ-ერთი ბოლო შემთხვევაა, თუმცა „იმედის დილის“ სიუჟეტში ექიმები ჰყვებიან, რომ ხშირია პაციენტის ნათესავების მხრიდან აგრესია, ფსიქოლოგიური ზეწოლა და ფიზიკური შეურაცხყოფა, რაც ბუნებრივია მათ საქმიანობაზე უარყოფითად აისახება. 

სასწრაფო სამედიცინო დახმარების თანამშრომლების თქმით, საჭიროა მექანიზმის შემუშავება, რომლითაც როგორც პაციენტის ჯანმრთელობის, ისე ექიმების უფლებებს დაიცავენ, რადგან რთულია საპასუხისმგებლო საქმის შესრულება წნეხის ქვეშ, ამ დროს შეიძლება პაციენტის სიცოცხლესაც კი საფრთხე შეექმნას.

ჯანდაცვის სამინისტროს მონაცემებით, 2018-2019 წლებში თბილისის სასწრაფო დახმარების ცენტრში მედპერსონალის მიმართ ფიზიკური შეურაცხყოფის 6 ფაქტი დაფიქსირდა. მათ შორის ორ შემთხვევაში ცეცხლსასროლი და ცივი იარაღი იყო გამოყენებული. რაც შეეხება რეგიონებს, 15 თვის მონაცემებით 10 ფიზიკური და 25 სიტყვიერი შეურაცხყოფის ფაქტი დაფიქსირდა. 

ექიმების მსგავსად, სოციალურ მუშაკებსაც მუშაობა სტრესულ გარემოში უწევთ, რომლებსაც ბენეფიციარები და მათი ოჯახის წევრები სხვადასხვა სახის შეუაცხყოფებს აყენებენ. როგორც სიუჟტში ერთ-ერთი სოციალური მუშაკი ჰყვება, ხშირად დაძაბულ და სტრესულ გარემოში უმუშავია.

ჯანდაცვის კომიტეტის თავმჯდომარის აკაკი ზოიძის თქმით, ექიმებზე გახშირებული ძალადობის ფაქტების გამო კომიტეტის წევრებმა ახალ კანონპროექტზე იმუშავეს, რომ ექიმთან ერთად პაციენტის უსაფრთხო მდგომარეობაც დაცული იყოს, რადგან საერთაშორისო პრაქტიკიდან ცნობილი ფაქტია, რომ თუ ექიმი სტრესული პირობების ქვეშ იმყოფება, შეცდომის დაშვების ალბათობა 30%-ით იზრდება.

ამ დრომდე თუ მედპერსონალზე ძალადობა ადმინისტრაციული წესით ისჯებოდა, ახალი კანონპროექტის ამოქმედების შემდეგ ექიმებზე და სოციალურ მუშაკებზე რამე ტიპის ძალადობა ან ხელის შეშლა დამამძიმებელ გარემოებად ჩაითვლება.

კაონპროექტი ამ დროისთვის საკომიტეტო მოსმენაზე განიხილება და უახლოეს მომავალში დამტკიცდება.