გახარია: თუ საჭირო გახდა, ვიქნები პირველი პრემიერი, რომელიც პროკურატურაში ჩვენებას მისცემს

ქვეყანაში გამოხატვის თავისუფლება არის დაცული ისევე, როგორც პრემიერმინისტრს ირჩევს საქართველოს პარლამენტი და ამისთვის საჭირო იყო კენჭისყრა, ასე გამოეხმაურა პრემიერმინისტრი გიორგი გახარია დღეს პარლამენტთან დაგეგმილ აქციას. 

გახარიამ ჟურნალისტების შეკითხვებს გუდიაშვილის მოედანზე მიმდინარე სამუშაოების დათვალიერების შემდეგ უპასუხა. 

„მორალურ პასუხისმგებლობას ვგრძნობ იმ ადამიანების წინაშე, რომლებიც ამ აქციის შეწყვეტის პერიოდში დაზიანდნენ. მათი დამზიანებლები არიან დაკავებულები და გამოძიება გრძელდება. ყველას, ვინც ამ აქციის დროს ჩაიდინა გადაცდომა, დააკავებენ. რაც შეეხება მაკო გომურს, მასთან ურთიერთობებს როგორმე გავარკვევ, ჩემი პასუხისმგებლობის გათვალისწინებით“, - აღნიშნა პრემიერმინისტრმა. 

მისივე თქმით, 21 ივნისის ღამეს „რა თქმა უნდა, იყო ერთეული გადაცდომები, რომელზეც გამოძიება დაწყებულია და თუ იქნება საჭირო 10 ადამიანის დაკავება, დააკავებენ, 18 ადამიანი ციხეში ზის იმიტომ, რომ მათ ჩაიდინეს ძალადობა სახელმწიფო ინსტიტუტის წინააღმდეგ“. 

„მე ვიყავი შს პირველი მინისტრი, რომელიც პროკურატურაში მივიდა და გამოძიებას მისცა ჩვენება. თუ საჭირო გახდა, მე ვიქნები პირველი პრემიერმინისტრი, რომელიც ასევე მივა პროკურატურაში და მისცემს ჩვენებას. პროკურატურა გადაწყვეტს, რამდენი ადამიანი იქნება დასაკავებელი, ან სად იქნება დევნა დასაწყები“, - განაცხადა გიორგი გახარიამ. 

ჟურნალისტებმა მას სამართალდამცავების მხრიდან აქციის მონაწილეთა წინააღმდეგ „დამიზნებით სროლასა“ და „ცინიკურ ღიმილზეც“ ჰკითხეს.

„ამ აღჭურვილობით დამიზნებით სროლა შეუძლებელია, რაღაც მაინც წაიკითხეთ. ცინიკური ღიმილის გამო კი დაისჯება. სამწუხაროდ, 250 ადამიანი დაშავდა იმის გამო, რომ შტურმი განახორციელეს უპასუხისმგებლო პოლიტიკურმა ლიდერებმა“, - განაცხადა პრემიერმინისტრმა. 

20 სექტემბერს რუსთაველის გამზირზე მოძრაობა „სირცხვილია“ ფართომასშტაბიან საპროტესტო აქციას აანონსებს. ამასთან დაკავშირებით დღეს პარლამენტის შენობაში შესვლა შეიზღუდება. აქციის ორგანიზატორთა უკმაყოფილება მათი პროტესტის ადრესატის, გიორგი გახარიას შს მინისტრობიდან პრემიერის პოსტზე გადანაცვლებამ გამოიწვია. 

20 ივნისს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად, საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი მხედველობა დაკარგა. 

რუსთაველის გამზირზე საპროტესტო აქციები მას შემდეგ დაიწყო, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 

20-21 ივნისის აქციების საქმის გამოძიების დასრულებამდე შსს-ს განსაკუთრებულ დავალებათა დეპარტამენტის უფროსს უფლებამოსილება შეუჩერდა.