თსუ სახელმწიფო აუდიტის ანგარიშის ნაწილს არ ეთანხმება

თსუ სახელმწიფო აუდიტის სამსახურის ანგარიშთან დაკავშირებით განცხადებას ავრცელებს და განმარტავს, რომ აუდიტმა უნივერსიტეტის 2014-2017 წლების ანგარიშში მოყვანილი ფაქტების ნაწილი არასწორად შეაფასა.

კერძოდ, როგორც თბილისის სახელმწიფო უნივერსიტეტი აცხადებს, დასკვნაში მითითებულია, რომ თსუ-ს მიერ პრინტერების კარტრიჯების შესყიდვის მიზნით გამოცხადებულ ტენდერებში აუდიტის სამსახური კონკურენციის შეზღუდვის მაღალ რისკს ხედავს, რაც უსაფუძვლოა, რადგან აუდიტის სამსახურს განემარტა, რომ კარტრიჯების შესყიდვის მიზნით გამოცხადებულ ტენდერებში სიტყვა „ორიგინალის“ მითითება პრინტერების მწარმოებელ რომელიმე კომპანიის მიერ წარმოებულ პროდუქტზე არაპირდაპირ მითითებას არ გულისხმობს. 

„სატენდერო დოკუმენტებში სიტყვა „ორიგინალი“ გულისხმობს პრინტერის მწარმოებლის მიერ დამზადებულ, ან ამავე მწარმოებლის მიერ სერტიფიცირებული კომპანიის მიერ დამზადებულ პროდუქტს“, - ნათქვამია განცხადებაში და განმარტებულია, რომ თავად შესყიდვების სააგენტო ითხოვს ტენდერებში ორიგინალი პრინტერების და კარტრიჯების შესყიდვას შემდეგი ტექსტით: „შემოთავაზებული სტანდარტული კარტრიჯი განკუთვნილი უნდა იყოს შემოთავაზებული სტანდარტული პრინტერისათვის, იგი უნდა იყოს ორიგინალი და ახალი (არამეორადი) პროდუქცია“.

ასევე, თსუ-ს წარმომადგენლობა აღნიშნავს, რომ აუდიტის ანგარიშში ავეჯის შესყიდვასთან დაკავშირებითაც არასწორი ინტერპრეტაცია იყო, სადაც თსუ-ის მიერ გამოცხადებულ ტენდერებში შესყიდვის ობიექტის პარამეტრები (ზომები, მასალები, ფერი და ა.შ.) სატენდერო დოკუმენტაციით განსაზღვრული იყო ფიქსირებულ სიდიდეებში.

„სატენდერო დოკუმენტაციით განსაზღვრული მოთხოვნები კონკრეტულ კომპანიაზე მორგებას არ გულისხმობდა. დასამზადებელი ავეჯის შესყიდვის მიზნით პირველ რიგში ხდება ავეჯის განთავსების, ადგილმდებარეობის და ფართის შესწავლა, მზადდება შესაბამისი ნახაზები ზუსტი პარამეტრების მითითებით, რათა ტექნიკური დავალება დამამზადებელი კომპანიებისათვის დამაბრკოლებელ გარემოებას არ ქმნიდეს“, - აღნიშნულია განცხადებაში.

თსუ აუდიტის სამსახურის მიერ ავტომანქანების ტექნიკური მომსახურების შესასყიდად ჩატარებულ ტენდერებში ფულადი სახსრების რაციონალური ხარჯვის თვალსაზრისით მითითებულ არსებულ რისკებზეც აკეთებს განმარტებას და აცხადებს, რომ საკითხი მანქანების ტექნიკური მომსახურების შესყიდვისას პრეისკურანტის სავარაუდო ღირებულების განსაზღვრის და სატენდერო წინადადების ფასის კლების მეთოდს ეხება.

„პრეისკურანტის სავარაუდო ღირებულება ბაზრის კვლევის ეტაპზე განისაზღვრება. რაც შეეხება პრეისკურანტის სავარაუდო ღირებულების და პრეისკურანტის საბოლოო ღირებულების განსაზღვრის წესს, ის დარეგულირებულია სახელმწიფო შესყიდვების სააგენტოს თავმჯდომარის 2017 წლის 14 ივნისის №12 ბრძანების მე-11 მუხლით, რომლის მიხედვითაც, ტენდერის პრეისკურანტის საფუძველზე ჩატარებისას სატენდერო კომისია სატენდერო დოკუმენტაციაში თავად განსაზღვრავს პრეისკურანტში მოცემული სამუშაოს ან მომსახურების ერთეულების ღირებულების დადგენის წესს გამარჯვებული პრეტენდენტის მიერ სისტემის მეშვეობით წარდგენილი წინადადების საბოლოო ფასთან მიმართებით. გარდა ამისა, მსგავსი პრინციპით სარგებლობა სირთულეებს ნამდვილად არ იწვევს და უფრო მეტიც - აღნიშნული პრინციპით სარგებლობს შემსყიდველი ორგანიზაციების უმრავლესობა, მათ შორის სახელმწიფო აუდიტის სამსახურიც“, - ნათქვამია განცხადებაში.

აუდიტის ანგარიშში, შოთა რუსთაველის ეროვნული სამეცნიერო ფონდის გრანტით დაფინანსებული სამეცნიერო პროექტის თაობაზე გამოთქმულ მოსაზრებებს, თსუ შემდეგნაირად პასუხობს: 

„აუდიტის სამსახურს გაეგზავნა გრანტის მიმღები პასუხისმგებელი ფიზიკური პირის დამატებითი განმარტებები. ამასთან, დაფინანსებული კვლევა გრანტის მიმღები პირის მიერ ჩატარდა სრულყოფილად და შესაბამისი ანგარიში წარედგინა სამეცნიერო ფონდს“.

და ბოლოს, თბილისის სახელმწიფო უნივერსიტეტი აცხადებს, რომ ანგარიშში აღნიშნულია უნივერსიტეტის II კორპუსის რეაბილიტაციაზე ხარჯთაღრიცხვის გაზრდის შესახებ, რამაც „საბიუჯეტო სახსრების არარაციონალური და არაეკონომიური ხარჯვის რისკი“ შექმნა და ეს სიმართლეს არ შეესაბამება. 

„მეორე სასწავლო კორპუსის სარეაბილიტაციო სამუშაოების შესყიდვა საქართველოს განათლებისა და მეცნიერების სამინისტროს რეკომენდაციით ე.წ. Design-Build (DB) მეთოდით განისაზღვრა. აღნიშნული საკითხი დაფინანსების გამოყოფის ეტაპზე შეთანხმებული იქნა საქართველოს მთავრობის 2013 წლის 8 ნოემბრის N289 დადგენილებით შექმნილი საქართველოს განათლებისა და მეცნიერების სამინისტროს მმართველობის სფეროში მოქმედი საჯარო სამართლის იურიდიული პირების უმაღლესი საგანმანათლებლო დაწესებულებების ინფრასტრუქტურის განვითარების ხელშეწყობის მიზნით დაფინანსების გამოყოფის საკითხის შემსწავლელი უწყებათაშორის კომისიასთან.

აღნიშნულ კონცეფციას აქვს დადებითი მხარეები. კერძოდ, DB მეთოდი (რომელიც მოქმედ კანონმდებლობასთან სრულ შესაბამისობაშია და ფართოდაა აპრობირებული) გულისხმობს ერთი კონტრაქტორის შერჩევას, რომელიც პასუხისმგებელი იქნება როგორც პროექტის შექმნაზე, ასევე - სამუშაოების წარმოებაზე. პასუხისმგებლობა პროექტის ხარისხზე და პასუხისმგებლობა სამუშაოების სათანადოდ წარმართვაზე გადადის მხოლოდ ერთ პირზე. შესაბამისად, მცირდება სადაო საკითხები და პროექტში ცვლილებების შეტანის საჭიროება. DB მეთოდი შესაძლებლობას იძლევა მნიშვნელოვანი პროექტები შემჭიდროებულ ვადებში და ხარისხიანად განხორციელდეს.

რაც შეეხება შემსყიდველის მხრიდან სახსრების რაციონალურად ხარჯვას, - მეორე კორპუსის რეაბილიტაციაზე ბაზრის კვლევა 100-ზე მეტ კომპანიასთან ჩატარდა, სადაც დაფიქსირდა პროექტის მაქსიმალური ღირებულება - 6,1 მლნ ლარი. ტენდერი გამოცხადდა უმცირეს ფასზე. ტენდერში მონაწილეობდა 3 კომპანია. საბოლოოდ, ხელშეკრულება გაფორმდა 5,19 მლნ ლარის ღირებულების პროექტზე, რითაც გაწეულია 1 მლნ ლარზე მეტი ეკონომია“, - ნათქვამია თბილისის სახელმწიფო უნივერსიტეტის განცხადებაში.