ბესელიამ თქვა, რა უთხრა ივანიშვილმა ფარულ ჩანაწერებზე

 „ივანიშვილმა მითხრა, რომ ამ ამბავმა მე უფრო დამაზარალა ვიდრე შენ და ეს„ ნაციონალების“ გაკეთებულიაო“, - განაცხადა ეკა ბესელიამ ტელეკომპანია „პირველის“ გადაცემაში „რეაქცია.“

დამოუკიდებელმა დეპუტატმა თქვა, რომ მის შესახებ ფარული ჩანაწერების გავრცელების შემდეგ ბიძინა ივანიშვილს შეხვდა.

„ჩამოვედი, ივანიშვილს შევხვდი კადრების გავრცელების შემდეგ. მან მითხრა რაიმე ეჭვი ხომ არ გაქვსო ჩვენთან. მე ვუთხარი, რომ არ მინდა ამის დაჯერება, რომ ეს მოხდა შენი თანხმობით. მე ვარ ადამიანი, რომელმაც 7 წელი მასთან ერთად გაიარა ეს გზა. ჩემთვის ძალიან მძიმე დასაჯერებელი იქნება. შეიძლება შინაგანად ეჭვები მქონდეს. ივანიშვილმა მითხრა, რომ ამ ამბავმა მე უფრო დამაზარალა ვიდრე შენ. ეს „ნაციონალების“ გაკეთებულიაო“, - აცხადებს ბესელია.  

მისი თქმით, მან ივანიშვილს საქმის გახსნა სთხოვა: „ვუთხარი გახსენით ეს საქმე და დამიდეთ კონკრეტული პირი ან პირები - სახელი და გვარი, ვინ ჩაიდინა და რატომ გააკეთა. იმიტომ, რომ ეს ემთხვევა სასამართლოსთან დაკავშირებულ კონფლიქტს. მიპასუხა კიო, ეს საქმე გაიხსნებაო, მაგრამ ამას მოჰყვა შემდეგი ფრაზა მისგან და აქ გავჩერდები, მეტს არ გავაგრძელებ. მან მითხრა გაჩერდიო, მე შენ ვერ დაგიცავო. ეს იყო მრავალმნიშვნელოვნად ნათქვამი სიტყვა. ერთ თვეში კიდევ ერთხელ გავრცელდა ეს კადრები. არ ვიცი ეს იყო გაფრთხილება, მინიშნება. ჩემი პასუხი იყო, რომ არავის დაცვა არ მჭირდება. აქეთ გიცავთ ყველასთქო“, - განაცხადა ბესელიამ. 

მისი თქმით, რადგან საქმე რვა თვეა გახსნილი არ არის, ეჭვი აქვს, რომ კვალი ხელისუფლებასთან მიდის:  

„ეს საქმე რომ გახსნილი არ არის დღემდე, ჩემი ეჭვები ღრმავდება რომ მართლაც არის ხელისუფლების კვალი. პირველწყარო ნაპოვნი არ არის. 27 იანვარს გავრცელდა კადრები და 30-ში ატვირთა. ლოგიკური დაშვების გარდა არ მაქვს პირდაპირი მტკიცებულება, მაგრამ 8 თვე გავიდა და საქმე გამოძიებული არ არის, კვალი მიდის ხელისუფლებასთან. რაც წამოვედი ბიძინა ივანიშვილი არ მინახავს“, - ამბობს ბესელია. 

პარლამენტის წევრი ეკა ბესელია გენერალურ პროკურატურაში გამოკითხვაზე დაიბარეს. პროკურატურის პრესსამსახურის ინფორმაცით, საქმე ეხება პირადი ცხოვრების ამსახველი ფარული ჩანაწერებით სხვადასხვა ადამიანის მიმართ ზეწოლისა და შანტაჟის შესახებ მის განცხადებას. 

24 სექტემბერს ეკა ბესელიამ განცხადა, რომ პირადი ცხოვრების ამსახველი ფარული ჩანაწერებით ადამიანებზე ზეწოლა და შანტაჟი ახლაც ხდება და მისთვის რამდენიმე მსგავსი შემთხვევის შესახებ არის ცნობილი.

2019 წლის 23 ივლისს, შინაგან საქმეთა სამინისტრომ პასუხისგებაში მისცა კაცი, რომელმაც უწყების განცხადებით, ერთ-ერთი დეპუტატის პირადი ცხოვრების ამსახველი კადრები საჯარო სივრცეში პირველმა ატვირთა და გაავრცელა. ამ საკითხზე ცენტრალური კრიმინალური პოლიციის დეპარტამენტის დირექტორის მოვალეობის შემსრულებელმა მამუკა ჭელიძემ ბრიფინგზე განაცხადა.

საქმეზე გრძელდება გამოძიება საქართველოს სისხლის სამართლის კოდექსის 157-ე პრიმა მუხლის პირველი და მეორე ნაწილებით, რომ დადგინდეს აღნიშნულ დანაშაულში შესაძლო მონაწილე სხვა პირების ვინაობა. მოცემულ სისხლის სამართლის საქმეზე საქართველოს სისხლის სამართლის კოდექსის 157-ე პრიმა მუხლით დაკავებულია და სისხლის სამართლებრივ პასუხისგებაში მიცემულია 19 ადამიანი.

დღეს პარლამენტში უზენაესი სასამართლოს მოსამართლეობის კანდიდატის მოსმენის დროს ეკა ბესელია უმრავლესობის დეპუტატ ვანო ზარდიაშვილს ფიზიკურად დაუპირისპირდა, რაც კამათის დროს ზარდიაშვილის მხრიდან ბესელიას მორალზე მინიშნებას მოჰყვა. მოგვიანებით ბესელიამ განაცხადა, რომ პასუხისმგებლობას ბიძინა ივანიშვილს აკისრებს, რომლის პარტიის სახელითაც ვანო ზარდიაშვილი ლაპარაკობდა.