სოხუმის დაცემიდან 26 წელი გავიდა

სოხუმის დაცემიდან 26 წელი გავიდა. აფხაზეთში სამხედრო დაპირისპირება 13 თვეს და 13 დღეს გაგრძელდა. 1992-1993 წლების დაპირისპირების შედეგად, საქართველომ აფხაზეთის ტერიტორიაზე იურისდიქცია დაკარგა, აფხაზეთმა კი ე.წ. დამოუკიდებლობა მოიპოვა. საერთაშორისო თანამეგობრობამ მოგვიანებით ეს ფაქტი რუსეთის მიერ ოკუპაციად აღიარა. ​

დილიდან გმირთა მემორიალთან დაღუპულთა ოჯახის წევრები და პოლიტიკოსები იკრიბებიან. 

„ყველაზე მძიმე თარიღი თანამედროვე საქართველოს ისტორიაში“ - ასე შეაფასა საქართველოს პრემიერმინისტრმა სოხუმის დაცემის დღე. გიორგი გახარიასთან ერთად გმირთა მემორიალთან იმყოფებოდნენ მთავრობის სხვა წევრები, პარლამენტის დეპუტატები და ადგილობრივი თვითმმართველობის წარმომადგენლები.

„რა თქმა უნდა, ამის შემდეგ ჩვენც და აფხაზებმაც ბევრი რამ ვისწავლეთ. ჩვენ ბევრი რამ გვაერთიანებს, მათ შორის იმის გაგება და შეგრძნება, რომ ომი იყო ჩვენი ყველაზე დიდი ტრაგედია. ეს არის ფუნდამენტი, რომელზეც შემდგომში ერთიანი სახელმწიფო უნდა ავაშენოთ. მშვიდობა კრიტიკულად მნიშვნელოვანია ქართველებისთვის და აფხაზებისთვის“, - განაცხადა გახარიამ.

ამ დრომდე დაუზუსტებელი მონაცემებით, ომს აფხაზეთში ქართულ მხრიდან 10 ათასზე მეტი ჯარისკაცი და მშვიდობიანი მოქალაქე ემსხვერპლა. აფხაზეთიდან დევნილი 250 000-ზე მეტი ქართველი კი უსახლკაროდ დარჩა. აფხაზური მხარე კი აცხადებს, რომ დაიღუპა 3 500 და დაიჭრა 2 ათასამდე აფხაზი.

1993 წლის 27 სექტემბერს აფხაზური სეპარატისტული დაჯგუფების წევრებმა ტყვედ აიყვანეს და დახვრიტეს აფხაზეთის ავტონომიური რესპუბლიკის მინისტრთა საბჭოს თავმჯდომარე ჟიული შარტავა.

სოხუმის დაცემას წინ უძღოდა რუსეთის მონაწილეობით მხარეებს შორის მოლაპარაკებები. 27 ივლისს ხელი მოეწერა სოჭის ხელშეკრულებას, რომელიც აფხაზურმა მხარემ ცალმხრივად დაარღვია, მაშინ როცა ქართულ მხარეს აფხაზეთიდან გამოყვანილი ჰყავდა მძიმე სამხედრო ტექნიკა.

ომის შედეგად აფხაზეთის ტერიტორიის დატოვება 300 ათასამდე ადამიანს მოუწია.