ბესელია პროკურატურას ეტყვის ვინ იყენებს პირად სტატუსს საკუთარი ინტერესების ლობირებისთვის

ეკა ბესელია პროკურატურაში გამოკითხვაზე მივიდა. გამომძიებლები „ქართული ოცნებიდან“ წასულ დეპუტატს პირადი ცხოვრების ამსახველი ჩანაწერების საქმეზე გამოკითხავენ. ეკა ბესელია გეგმავს საგამოძიებო უწყებას მიაწოდოს ინფორმაცია ყოფილი თანაგუნდელების შესახებაც.

მისი განცხადებით, ის პროკურატურას არ მიაწვდის ინფორმაციას იმ პირების შესახებ, რომლებზეც ფარული ჩანაწერებით ზეწოლა ხორციელდება და ვინც ეს ინფორმაცია ბესელიას მიაწოდა. არამედ დეპუტატი პროკურატურას კონკრეტულ გვარებს დაუსახელებს, რომლებიც საკუთარ სტატუსს იყენებენ და უკანონო კავშირი აქვთ სასამართლოს წარმომადგენლებთან. ამის შესახებ ბესელიამ პირადი ცხოვრების ამსახველი ფარული ჩანაწერების საქმესთან დაკავშირებით განაცხადა, რაზეც დღეს გენერალურ პროკურატურაში გამოკითხავენ.

ეკა ბესელიამ ამ თემაზე საუბრის დროს დეპუტატები ვანო ზარდიაშვილი და დავით მათიკაშვილი ახსენა და ჟურნალისტების შეკითხვის პასუხად განაცხადა, რომ ამ საქმეებთან მათ პირდაპირ კავშირს ხედავს.

„ამის ფაქტები მაქვს. შეუძლებელია, რომ ეს ვერ დაადგინო. რა დროც არ უნდა დასჭირდეს, დარწმუნებული ვარ, რომ თავის დროზე ამას სახელი დაერქმევა", - აღნიშნა ეკა ბესელიამ.

მისივე თქმით, არ გაასაჯაროებს ინფორმაციას, რომელიც მას გაანდეს და სხვის პირად ცხოვრებას ეხება. „მე რა თქმა უნდა, თავს უფლებას არ მივცემ გავასაჯაროო ინფორმაცია, რომელიც გამანდეს და ეხება სხვის პირად სივრცეს, მაგრამ რაც საჭიროა ამ ტიპის პრევენციული ქმედებისთვის, რომ დაცული იყოს ზოგადად ნებისმიერი ადამიანის პირადი სივრცე, ამისთვის შემიძლია გარკვეული ნაბიჯები გადავდგა და ვისაუბრო საგამოძიებო ორგანოსთან. ვისაუბრებ კონკრეტულ გვარებთან დაკავშირებით, რაც ეხება საკუთარი სტატუსის გამოყენებას და უკანონო კავშირს სასამართლოს წარმომადგენლებთან, რისი საშუალებითაც პირადი ინტერესების ლობირება ხდება. პარლამენტის წევრი არ შეიძლება ლობირებდეს საკუთარი ოჯახის წევრს და უკანონოდ იყენებდეს საკუთარ მდგომარეობას იმისთვის, რომ საკუთარი თუ ოჯახის წევრების მატერიალური და ანგარებით მიზნების რეალიზება მოახერხოს. ამას ჰქვია ზეგავლენით ვაჭრობა", - განაცხადა ეკა ბესელიამ და დასძინა, რომ გამოძიებას შესაძლებლობას მისცემს „საგამოძიებო არეალი გაშალოს".

საქმე ეხება პირადი ცხოვრების ამსახველი ფარული ჩანაწერებით სხვადასხვა ადამიანის მიმართ ზეწოლისა და შანტაჟის შესახებ ეკა ბესელიას განცხადებას. 

კერძოდ, 24 სექტემბერს ეკა ბესელიამ განცხადა, რომ პირადი ცხოვრების ამსახველი ფარული ჩანაწერებით ადამიანებზე ზეწოლა და შანტაჟი ახლაც ხდება და მისთვის რამდენიმე მსგავსი შემთხვევის შესახებ არის ცნობილი.

2019 წლის 23 ივლისს, შინაგან საქმეთა სამინისტრომ პასუხისგებაში მისცა კაცი, რომელმაც უწყების განცხადებით, ერთ-ერთი დეპუტატის პირადი ცხოვრების ამსახველი კადრები საჯარო სივრცეში პირველმა ატვირთა და გაავრცელა. ამ საკითხზე ცენტრალური კრიმინალური პოლიციის დეპარტამენტის დირექტორის მოვალეობის შემსრულებელმა მამუკა ჭელიძემ ბრიფინგზე განაცხადა.

საქმეზე გრძელდება გამოძიება საქართველოს სისხლის სამართლის კოდექსის 157-ე პრიმა მუხლის პირველი და მეორე ნაწილებით, რომ დადგინდეს აღნიშნულ დანაშაულში შესაძლო მონაწილე სხვა პირების ვინაობა. მოცემულ სისხლის სამართლის საქმეზე საქართველოს სისხლის სამართლის კოდექსის 157-ე პრიმა მუხლით დაკავებულია და სისხლის სამართლებრივ პასუხისგებაში მიცემულია 19 ადამიანი.