რას წერს Washington Times-ი გიორგი გახარიას შესახებ

„მაშინ, როცა შტატები ინარჩუნებს პოზიციებს სპარსეთის ყურესა და ავღანეთში, ყოფილი საბჭოთა რეგიონები, ხშირად ყურადღების მიღმა რჩებიან. თუმცა საქართველო წარმოადგენს მოვლენების ეპიცენტრს, სადაც შეერთებული შტატებისთვის უფრო მეტი დევს ფსონზე, ვიდრე ოდესმე“, - ამის შესახებ The Washington Times-ი წერს.

ვეს მარტინის სტატიაში ყურადღება გამახვილებულია საერთაშორისო მისიებში საქართველოს კონტრიბუციასა და ოკუპაციის პრობლემაზე. ავტორი ამბობს, რომ ეს გამოწვევაა ეკონომიკისთვისაც და იშველიებს პრემიერმინისტრ გიორგი გახარიას განცხადებას, რომლის მიხედვითაც ქვეყნის განვითარების პოტენციალის 20 პროცენტი ოკუპირებულია.

აქვე ავტორი მთავრობის მეთაურის შესაძლებლობებსა და ბიოგრაფიაზე წერს და ამბობს, რომ რუსეთთან სამხედრო კონფრონტაცია კატასტროფის ტოლფასია და ამას ქვეყნის პრემიერი აცნობიერებს.

ავტორი ასევე მიიჩნევს, რომ გიორგი გახარიას, რომელსაც ქვეყანა ევროპული და ევროატლანტიკური ინტეგრაციის გზაზე მიჰყავს რუსეთთან ურთიერთობების გამწვავების გარეშე, საკუთარი ხალხი, აშშ და ევროპა გვერდში უნდა დაუდგეს.

რაც შეეხება სტატიის ავტორს, ის შეერთებული შტატების თადარიგის პოლკოვნიკი უეს მარტინია, რომელსაც მეთაურობის ათწლიანი გამოცდილება აქვს. მარტინმა სამხედრო სამსახური კორეაში განლაგებული ძალების სარდლობის საინფორმაციო ოპერაციების უფროსის თანამდებობაზე დაასრულა. ერაყში ანტიტერორიზმის ოფიცერი იყო და სწორედ მან შეუშალა ხელი "ალ ქაიდას", ზომიერი შიიტი ლიდერის, სისტანის მკვლელობის გეგმის განხორციელებაში. მარტინი ასევე ავტორია ხელმძღვანელობისა და სამხედრო ისტორიის თემებზე გამოქვეყნებული სტატიებისა.

ქართველი ექსპერტების განცხადებით Washington Times-ი შემთხვევით არც სტატიის ფიგურანტებს არჩევს და არც სამიზნე აუდიტორიას. სტატიას შეფასებები მოჰყვა მმართველ გუნდშიც.