„ბი ემ ჯი ჰოლდინგის“ დამფუძნებელი „მთავარი არხის“ წინააღმდეგ სარჩელს ამზადებს

„ბი ემ ჯი ჰოლდინგის“ დამფუძნებელი მენი ბენიში (რომლის შვილობილი კომპანიაც არის „ბი ემ ჯი ჯორჯია“) 16 ოქტომბერს მთავარ არხზე გასულ სიუჟეტთან დაკავშირებით, რომელიც პროგრეს ბანკის ისტორიას შეეხებოდა განცხადებას ავრცელებს. მენი ბენიშის თქმით, მისი იურისტები უკვე მუშაობენ და უახლოეს მომავალში წარადგნენენ სარჩელს მთავარი არხის წინააღმდეგ ცილისწამებისა და საქმიანი რეპუტაციის შელახვისთვის.

მენი ბენიში მთავარ არხზე გასულ სიუჟეტს „გამაოგნებელს და ცილისმწამებლურს“ უწოდებს. მისი თქმით, „ბი ემ ჯი ჰოლდინგი“ დომინიკის რესპუბლიკაში რეგისტრირებული კომპანიაა, რომელიც დეკლარირებულია ისრაელის საგადასახადო დეპარტამენტში და იხდის ისრაელის კანონმდებლობით დაწესებულ ყველა გადასახადს. მენი ბენიშის განცხადებით, მისი კომპანიის საქართველოს წარმომადგენლობის დირექტორი თენგიზ წულაია, კომპანიის საბანკო ანგარიშები კი გახსნილია ქართულ ბანკში, რომელიც წარსულში ეს იყო „პროგრეს ბანკი“, ახლა კი „თიბისი ბანკი“.

„მსგავსი ცილისწამება მიმართულია საქართველოში ინვესტიციების განხორციელებისა და უცხოელი ინვესტორების წინააღმდეგ, პირდაპირ აზიანებს საქართველოს ბიზნესგარემოს“, - წერს წერილში კომპანიის დამფუძნებელი მენი ბენიში და დასძენს, რომ მას და მის პარტნიორებს საქართველოში ათეულობით მილიონი ლარის ინვესტიცია აქვთ ჩადებული და თითოეული მათგანი კანონის სრული დაცვით არის შესრულებული.

„მთავარ არხმა“ ჟურნალისტური გამოძიება ჩაატარა, რომლის თანახმად, „პროგრეს ბანკში“ აუდიტორული შემოწმება უცხოელმა ექსპერტებმა 2016 წელს ჩაატარეს. შემოწმების დროს სპეციალისტებმა დაადგინეს, რომ ბანკის ათობით გადარიცხვა ფულის გათეთრების ნიშნებს შეიცავდა. მათ შორის მედიასაშუალება მიუთითებს, რომ არის „ბი ემ ჯი ჰოლდინგის“ მიერ გაკეთებული გადარიცხვაც, რომელსაც საქართველოში „ბი ემ ჯი ჯორჯია“ ეკუთვნის. 

ტელეკომპანიის ინფორმაციით, „პროგრეს ბანკში“ 22% ბიძინა ივანიშვილს ეკუთვნოდა, 78% კი პანამაში რეგისტრირებულ კომპანიას, რომლის უკანაც რუსეთში ფულის გათეთრებაში ეჭვმიტანილი ილია გავრილოვი იდგა. „პროგრეს ბანკი“ 2007 წელს კახა კალაძემ დააფუძნა, 9-წლიანი არსებობის განმავლობაში ბანკმა 8 წელი წაგებით დაასრულა და ჯამში 5 მილიონ ოთხასი ათასი ლარი იზარალა. 2013 წელს კახა კალაძემ ბანკის საკონტროლო პაკეტი 78% ოფშორში რეგისტრირებულ კომპანიას გადასცა, რომლის უკანაც ილია გავრილოვი იდგა. ამავე დროს ბანკის 22%-ის მფლობელი ბიძინა ივანიშვილი გახდა. 2016 წელს „პროგრეს ბანკის“ აქციების ნაწილი მამუკა ხაზარაძემ „ბანკ რესპუბლიკასთან“ ერთად იყიდა.

მამუკა ხაზარაძე „პროგრეს ბანკთან“ დაკავშირებით ბიძინა ივანიშვილის პროკურატურაში დაბარებას ელოდება.

საქართველოს ეროვნულმა ბანკმა „პროგრეს ბანკს“ საბანკო საქმიანობის ლიცენზია 2016 წლის 18 ოქტომბერს გაუუქმა.