დეპუტატების კითხვებს უზენაესის მოსამართლეობის კანდიდატი ლევან მიქაბერიძე პასუხობს

პარლამენტის იურიდიულ საკითხთა კომიტეტში დღეს უზენაესი სასამართლოს უვადო მოსამართლეობის კანდიდატების მოსმენა განახლდა. დეპუტატების კითხვებს ლევან მიქაბერიძე პასუხობს. დეპუტატების კითხვები ძირითადად მოსამართლის საქმიანობას და სასამართლო სისტემაში არსებულ მდგომარეობას შეეხება.

საპარლამენტო უმრავლესობის წევრის ნინო გოგუაძის კითხვაზე, „ვინმემ რომ მოინდომოს თქვენს საქმიანობაში ჩარევა, თქვენს მიერ წარმოებულ საქმეზე მისაღებ გადაწყვეტილებაში რომ ჩაერიოს, თქვენ რას გააკეთებთ? როგორ დაიცავთ საკუთარ დამოუკიდებულებას?“, მიქაბერიძემ განაცხადა, რომ ის გამოიყენებს იმ კონსტიტუციურ გარანტიებს, რომელიც მოსამართლის დამოუკიდებლობას განამტკიცებს.

ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე სოფო კილაძე დაინტერესდა, რამდენად ხშირად იყენებს მიქაბერიძე სტრასბურგის გადაწყვეტილებებს თავის არგუმენტაციაში.

„დავის სპეციფიკისა და კატეგორიის გათვალისწინებით ხდება ადამიანის უფლებათა ევროპული კონვენციის და პრეცედენტული სამართლის გამოყენება. ნებისმიერი კატეგორიის საქმეზე მისი გამოყენება არარელევანტურია, თუმცა ისეთ საკითხებთან დაკავშირებით, რომელიც ადამიანის ძირითად უფლებებს და თავისუფლებებს შეეხება, ბუნებრივია, ვიყენებთ როგორც ადამიანის უფლებათა ევროპულ კონვენციას, ასევე ადამიანის უფლებათა ევროპული სასამართლოს პრეცედენტულ გადაწყვეტილებებს, ვინაიდან მოგეხსენებათ, რომ თვითონ პრეცედენტი ეს არის კონვენციის დებულების შემავსებელი წინაპირობები. ცალკე აღებული ეს თუ ის დებულება, თუ ის არ განიმარტა პრეცედენტული გადაწყვეტილების შინაარსიდან გამომდინარე, ვიწრო გაგებით შეიძლება იყოს გაზიარებული და აღქმული ამა თუ იმ გადაწყვეტილებაში და ამან შეიძლება მეტ-ნაკლებად შელახოს ადამიანის უფლება ან უფრო ფართო განმარტება მისცეს ადამიანის უფლებების ფარგლებს. რა თქმა უნდა, ვიყენებთ აღნიშნულ გადაწყვეტილებებს ცალკეული საკითხების დროს. ეს შეეხება პროცესუალურ საკითხებს, თუნდაც სარჩელის დასაშვებობის პირობებს, როცა სახელმწიფო ბაჟის გადავადების საკითხი წყდება ან გათავისუფლება ბაჟისგან ან გათავისუფლებაზე უარის თქმის საფუძველი და მატერიალური უფლების გადაწყვეტის ფარგლებშიც, როდესაც ხდება ამა თუ იმ პრობლემატური საკითხის მოგვარება და გვეხმარება ეს ყველაფერი იმაში, რომ უფრო დასაბუთებული და დამაჯერებელი გავხადოთ შიდა კანონმდებლობის საფუძველზე მიღებული გადაწყვეტილება“, - განაცხადა ლევან მიქაბერიძემ.

ლევან მიქაბერიძე 2011-2012 წლებში თბილისის საქალაქო სასამართლოს ადმინისტრაციულ საქმეთა სექტორის უფროსად მუშაობდა, 2013 წლიდან კი ბათუმის საქალაქო სასამართლოს მოსამართლეა.

იურიდიულ საკითხთა კომიტეტმა უზენაესი სასამართლოს მოსამართლეობის კანდიდატების მოსმენა 23 სექტემბერს დაიწყო. წინა დღეების განმავლობაში პარლამენტის იურიდიულ კომიტეტში უკვე მოუსმინეს უზენაესი სასამართლოს უვადო მოსამართლეობის კანდიდატებს: შოთა გეწაძეს, მერაბ გაბინაშვილს, თამარ ალანიას, მირანდა ერემაძეს, მამუკა ვასაძეს, მაია ვაჩაძეს, თამარ ზამბახიძეს, შალვა თადუმაძეს, ზაზა თავაძეს და ვლადიმერ კაკაბაძეს.